ଦଶମନ୍ତପୁର,୩୦।୧୨(ଡି.ଏନ୍.ଏ.) କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ପରଜା ବେଡ଼ାପଦର ପଞ୍ଚାୟତରେ ଆବାସ ଯୋଜନାରେ ହୋଇଥିବା ଦୁର୍ନୀତିର ଗୁମର ଧୀରେଧୀରେ ଖୋଲିବାରେ ଲାଗିଛି। ଏହି ଅଞ୍ଚଳର ଆବାସ ଘର ନିର୍ମାଣ କାମ ସଲାସୁତୁରାରେ ଠିକାଦାରଙ୍କ ହାତକୁ ଯାଉଛି। କିନ୍ତୁ କେଉଁଠି ହିତାଧିକାରୀଙ୍କ ଆବାସ ଘର ଶେଷ ହୋଇଥିଲେ ମଧ୍ୟ ଏଯାବତ୍ ବିଲ୍ ମିଳିପାରୁ ନାହିଁ। ଅନ୍ୟ କେଉଁଠି ଆବାସ ଶେଷ ହୋଇଛି, କିନ୍ତୁ ଘରର ଅବସ୍ଥା ଦେଖି ମୁଣ୍ଡ ଗୁଞ୍ଜିବାକୁ ଭୟ କରୁଛନ୍ତି ହିତାଧିକାରୀ। ଅନ୍ୟ କେତେକଙ୍କ ଆବାସ ଅନୁଦାନ ଉଠିଯାଇଥିଲେ ମଧ୍ୟ ବର୍ଷାଧିକ କାଳ ଘର ଅଧାପନ୍ତରିଆ ପଡ଼ିଛି। ଏନେଇ ପୂର୍ବରୁ ବହୁ ଖବର ପ୍ରକାଶ ପାଇଛି।
ପରଜା ବେଡ଼ାପଦର ପଞ୍ଚାୟତରେ ଥିବା ସେମ୍ବି ଗ୍ରାମର ଦୁକି ମୁଦୁଲି (୬୫)ଙ୍କର ମଧ୍ୟ ସେହି ସମାନ ଅବସ୍ଥା। ତାଙ୍କ କହିବାନୁସାରେ ୩ ବର୍ଷ ତଳେ ତାଙ୍କୁ ଏକ ଆବାସ ଘର ମିଳିଥିଲା। ନିଜେ କଲେ ଡେରି ହେବ, ତେଣୁ ଆମେ ଠିକାରେ କରିଦେବୁ ବୋଲି ପ୍ରଲୋଭନ ଦେଖାଇ ଜଣେ ଠିକାଦାର କାମ ହାତେଇଥିଲେ। ତେବେ ସେ ଏଭଳି ଘରଟି ତିଆରି କରିଛନ୍ତି, ଯେଉଁଥିରେ ଜଣେ ଚଳିବା କଷ୍ଟକର। ୩ବର୍ଷ ବିତି ଯାଇଥିଲେ ସୁଦ୍ଧା ଘରଟି ସମ୍ପୂର୍ଣ୍ଣ ହୋଇନାହିଁ। ଠିକାଦାରଙ୍କୁ ବହୁବାର କହିଥିଲେ ମଧ୍ୟ ସେ କାନ ଦେଉ ନ ଥିବା ଦୁକିଙ୍କ ସ୍ବାମୀ କେଶରି ମୁଦୁଲି କହିଛନ୍ତି। ଗୋଟିଏ ବୋଲି ଝିଅ ବିବାହ କରିବା ପରଠୁ ଦୁକି ଓ କେଶରୀ ପରିଣତ ବୟସରେ ଏହି ଘରେ ଚଳୁଛନ୍ତି। କେବଳ ଦୁକି ନୁହନ୍ତି, ଗ୍ରାମର ଶରତ ମୁଦୁଲିଙ୍କ ସ୍ତ୍ରୀ ସନମତି ମୁଦୁଲିଙ୍କ ନାଁରେ ମଧ୍ୟ ଆସିଥିବା ଆବାସ ଘର ଏକ ବର୍ଷରୁ ଊଦ୍ଧର୍ବ ହେବ ଫାଉଣ୍ଡେଶନରେ ହିଁ କାମ ସୀମିତ ରହିଛି। ସନମତି, ତାଙ୍କର ସ୍ବାମୀ ଓ ପୁଅ ଅନ୍ୟ ଘରେ ଆଶ୍ରୟ ନେଉଛନ୍ତି। ଏ ସମ୍ପର୍କରେ ପଞ୍ଚାୟତ ନିର୍ବାହୀ ଅଧିକାରୀ ସୁଶାନ୍ତ ଶତପଥୀଙ୍କୁ ଯୋଗାଯୋଗ କରିବାରୁ, ମୁଁ ଟିକେ ବ୍ୟସ୍ତ ଅଛି। ସେ ବିଷୟରେ ପରେ କଥା ହେବି ବୋଲି ଉତ୍ତର ଦେଇଛନ୍ତି।
