ଛତ୍ରପୁର,୧୯ା୪(ଡି.ଏନ୍.ଏ.)-ଗଞ୍ଜାମ ଜିଲାରେ ଆଦିବାସୀମାନେ ଜଙ୍ଗଲ ଜମି ଅଧିକାରଠାରୁ ଆରମ୍ଭ କରି ପାଣି, ବିଭିନ୍ନ ସରକାରୀ ସହାୟତା ଆଦି ପାଇବାରୁ ବଞ୍ଚିତ ଥିବାବେଳେ ବର୍ତ୍ତମାନର ଲକ୍ଡାଉନ ସମସ୍ୟା ଦ୍ୱିଗୁଣିତ କରିଛି। ଏମାନେ କାମ ପାଇଁ ଘରୁ ବାହାରକୁ ବାହାରି ପାରୁନାହାନ୍ତି। ମହାମାରୀ କରୋନା ସମ୍ପର୍କରେ କେତେଜଣ ମାତ୍ର ଗାଁକୁ ଯାଇ ଲୋକଙ୍କୁ ସଚେତନ କରିଛନ୍ତି। ଆଦିବାସୀଙ୍କ ପାଖରେ ମାସ୍କ ନାହିଁ। ତେଣୁ ପତ୍ରରେ ମାସ୍କ ତିଆରି କରି ପିନ୍ଧୁଛନ୍ତି। ଏବେଠୁ ଆଦିବାସୀମାନେ ଜଳକଷ୍ଟ ଭୋଗିଲେଣି।
ବେଗୁନିଆପଡ଼ା ବ୍ଲକରେ ପାହାଡ଼ ଉପରେ ଥିବା ୧୯ଟି ଆଦିବାସୀ ଗାଁରେ ଥିବା ଲୋକେ ବିଭିନ୍ନ ସମସ୍ୟା ଦେଇ ଗତି କରୁଛନ୍ତି। ଅତ୍ୟାବଶ୍ୟକ ସାମଗ୍ରୀ ଆଣିବାକୁ ୧୫ କି.ମି. ଦୂର ଯିବାକୁ ପଡ଼ୁଛି। ଆଦିବାସୀଙ୍କ ପ୍ରତି ସରକାରଙ୍କ ଦୃଷ୍ଟି ଦିଅନ୍ତୁ ବୋଲି ନିରଞ୍ଜନ ଶବର, ଜଗବନ୍ଧୁ ଶବର, ବୁଦ୍ଧିଆ ଶବର, ଲକ୍ଷ୍ମଣ ଶବର ପ୍ରମୁଖ ଦାବି କରିଛନ୍ତି। ସେହିପରି ଜଗନ୍ନାଥପ୍ରସାଦ, ବେଗୁନିଆପଡା, ପାତ୍ରପୁର, ସୋରଡ଼ା, ଧରାକୋଟ, ଖଲ୍ଲିକୋଟ, ଦିଗପହଣ୍ଡି, ପୋଲସରା ଆଦି ୧୬ଟି ବ୍ଲକରେ ବସବାସ କରୁଥିବା ଆଦିବାସୀମାନେ ନଦୀ, ଝରଣାରୁ ପିଇବା ପାଣି ଆଣୁଛନ୍ତି। କେତେକ ଆଦିବାସୀ ପରିବାର ରାଶନ, ସରକାରୀ ସହାୟତା ପାଇ ନ ଥିବା ଅଭିଯୋଗ ହୋଇଛି। ଆଧାର ନମ୍ବର ରାଶନ କାର୍ଡ ସହ ଲିଙ୍କ ହୋଇ ନ ଥିବାରୁ କେତେକ ସହାୟତା ପାଇନାହାନ୍ତି। ଏମ୍ଜିଏନଜିଆରଏସ୍ରେ ପୋଖରୀ ଓ ଜମି କାମ ଏବଂ କୂଅ ଖନନ କାର୍ଯ୍ୟ ଆଦିବାସୀଙ୍କୁ ଯୋଗାଇଦେବାକୁ ଋଷିକୂଲ୍ୟା ରୟତ ମହାସଭାର ସୀମାଞ୍ଚଳ ନାହାକ ଜିଲାପାଳଙ୍କୁ ପଠାଇଥିବା ସ୍ମାରକପତ୍ରରେ ଉଲ୍ଲେଖ କରିଛନ୍ତି ।
