ଭୁବନେଶ୍ୱର, ୫।୯(ବ୍ୟୁରୋ): ଶ୍ରୀମନ୍ଦିର ଚତୁଃପାର୍ଶ୍ୱ ଉଚ୍ଛେଦ ପ୍ରସଙ୍ଗରେ ସରକାରଙ୍କୁ କଡ଼ା ସମାଲୋଚନା କରିଛନ୍ତି ଭାଜପା ବରିଷ୍ଠ ନେତା ବିଜୟ ମହାପାତ୍ର। ଶ୍ରୀକ୍ଷେତ୍ର ବର୍ତ୍ତମାନ କୁରୁକ୍ଷେତ୍ରରେ ପରିଣତ ହୋଇଥିବା ବିଜୟ କହିଛନ୍ତି। ସେ ସରକାରଙ୍କୁ ଟାର୍ଗେଟ କରି ଆହୁରି କହିଛନ୍ତି ଯେ, ଗତ ୭ଦିନ ହେଲା ୫୦ପ୍ଲାଟୁନ ଫୋର୍ସ ମୁତୟନ କରି ଓ ୨୨ ବୁଲଡୋଜର ଲଗାଇ ଆତଙ୍କବାଦୀ ଶିବିର ଉପରେ ଆକ୍ରମଣ କରିବା ଭଳି ମଠ, ମନ୍ଦିରକୁ ଧ୍ୱଂସ କରାଯାଉଛି। ଏଥିଲାଗି ସରକାରଙ୍କର କୌଣସି ସାମ୍ବିଧାନିକ କିମ୍ବା ମୌଳିକ ଅଧିକାର ନାହିଁ। ଶ୍ରୀମନ୍ଦିର ଚାରିପଟ ଉଚ୍ଛେଦ କରି ସରକାର କ’ଣ କରିବେ ତାହା ପ୍ରଥମେ ସ୍ପଷ୍ଟ କରନ୍ତୁ। ବି.ପି. ଦାସ କମିଶନ ଶ୍ରୀମନ୍ଦିର ସଂସ୍କାର ନେଇ ଚୂଡାନ୍ତ ରିପୋର୍ଟ ଦେଇନାହାନ୍ତି। ଏହା ଆସିବା ଆଗରୁ ତାଙ୍କ କାର୍ଯ୍ୟକାଳ ଶେଷ କରିଦିଆଗଲା। କମିଶନଙ୍କ ରିପୋର୍ଟ ବିଧାନସଭାରେ ଉପସ୍ଥାପିତ ହୋଇନାହିଁ। ଯଦି ବି.ପି. ଦାଶ କମିଶନଙ୍କ ସୁପାରିଶରେ ଏହା କରାଯାଉ ଥାଏ ତେବେ ଏହା ବେଆଇନ ବୋଲି ବିଜୟ ମତ ରଖିଛନ୍ତି।
