ଜଣଙ୍କ ମନରେ କେତେବେଳେ ପରିବର୍ତ୍ତନ ଆସିବ ତାହା କହିହୁଏନି , ଯେମିତି ଘଟିଛି ଆସାମର ମୋନି ମାନିକ ଗୋଗୋଇଙ୍କ କ୍ଷେତ୍ରରେ। ମୋନିଙ୍କୁ ବୟସ ଏବେ ୫୭ ବର୍ଷ। ଦିବ୍ରୁଗଡ ଜିଲାର ଶାଲମାରି ଦିଘାଲିଆ ଗାଁରେ ତାଙ୍କ ଜନ୍ମ। ପ୍ରଥମରୁ ସେ ଜଣେ ଆଦର୍ଶବାଦୀ ଯୁବକ ଥିଲେ। ପରେ ଆତଙ୍କବାଦୀ ସାଜିଲେ। ଏଥିଲାଗି ତାଙ୍କୁ ଜେଲ୍ ଯିବାକୁ ପଡିଲା। ଜେଲରୁ ଫେରି ସେ ପାଲଟିଛନ୍ତି ସମାଜସେବୀ। ଗରିବୀକୁ ଖୁବ୍ ନିକଟରୁ ଦେଖିଥିବା ଗୋଗୋଇ ପରିବାର ଚଳାଇବା ଲାଗି ଅକ୍ଷମ ହେବା ପରେ ଅଶୀ ଦଶକର ଶେଷ ଆଡକୁ ୟୁନାଇଟେଡ ଲିବରେଶନ ଫ୍ରଣ୍ଟ ଅଫ୍ ଆସାମ(ଉଲ୍ଫା) ଲାଗି କାମ କରିଥିଲେ। କିନ୍ତୁ ସେ କେବେ ବି ଅସ୍ତ୍ର ଧରିନାହାନ୍ତି। ସେ ଉଲ୍ଫାରେ ଜଣେ ଦକ୍ଷ ସଂଗଠକ ଭାବେ କାର୍ଯ୍ୟ କରିଥିଲେ। ପୋଲିସ ତାଙ୍କୁ ଧରିବାକୁ ଲାଗିପଡିଲା ଓ ସେ ଗାଁରୁ ଗାଁ ବୁଲି ସେଠାରେ ରହୁଥିଲେ। ୧୯୯୧ରେ ବିବାହ କରିବା ପରେ କେତେବେଳେ କେମିତି ଲୁଚିଛପି ଘରକୁ ଆସୁଥିଲେ। ଏହାପରେ ୧୯୯୪ରେ ୧୫୦ ଲୋକଙ୍କୁ ଧରି ମ୍ୟାନମାରରେ ଉଲ୍ଫା ଟ୍ରେନିଂ କ୍ୟାମ୍ପରେ ଯୋଗଦେଇଥିଲେ। କିନ୍ତୁ ସେଠାରେ ବିନା ଅସ୍ତ୍ରରେ ସେ ବିଭିନ୍ନ ଶାରୀରିକ ଟ୍ରେନିଂ ନେଇଥିଲେ। ୧୯୯୮ରେ ତାଙ୍କୁ ପୋଲିସ ଗିରଫ କରିବା ପରେ ଦିବ୍ରୁଗଡ ଜିଲା କାରାଗାରରେ ୬ ମାସ ରହିଥିଲେ। ତାଙ୍କ ଗାଁ ପାଖ ସହରରେ ଟିଙ୍ଗଖାଙ୍ଗ କଳା କେନ୍ଦ୍ର ପ୍ରତିଷ୍ଠା କରି ଏଠାରେ ପିଲାମାନଙ୍କୁ ନାଚ, ଗୀତ, ଡ୍ରାମା ଓ ଚିତ୍ର ଆଙ୍କିବା ଉପରେ ଶିକ୍ଷା ଦେଉଛନ୍ତି। ଉଲ୍ଫା ସହ ସମ୍ପର୍କ ଛିନ୍ନ କରିବା ପରେ ୨୦୦୩ରେ ଏହାକୁ ସରକାରୀ ସ୍ତରରେ ସ୍ବୀକୃତି ମିଳିଛି। ତାଙ୍କ ଗାଁରେ ଏକ ମ୍ୟୁଜିକ ସ୍କୁଲ୍ ବି ଖୋଲିଛନ୍ତି। ଏହିଠାରୁ ପିଲାମାନେ ପାସ କରି ବିଭିନ୍ନ କ୍ଷେତ୍ରରେ ପାରଦର୍ଶିତା ପ୍ରଦର୍ଶନ କରିପାରୁଛନ୍ତି। ଏବେ ସେ ସ୍ଥାନୀୟ ଅଞ୍ଚଳର ଅଧିବାସୀମାନେ କିଭଳି ଜୀବିକା ପାଇବେ ସେଥିପାଇଁ
ବିଭିନ୍ନ କାର୍ଯ୍ୟ ହାତକୁ ନେଇଛନ୍ତି।
