ନୂଆଦିଲ୍ଲୀ,୩୦-୫: ପଳାତକ ହୀରା ବ୍ୟବସାୟୀ ନୀରବ ମୋଦିଙ୍କୁ ଗୁରୁବାର ଲଣ୍ଡନର ଓ୍ବେଷ୍ଟମିନିଷ୍ଟର ଅଦାଲତରେ ହାଜର କରାଯିବ। ପ୍ରାୟ ସାଢ଼େ ୧୩ ହଜାର କୋଟି ଟଙ୍କାର ପିଏନ୍ବି ମହାଠକେଇ ମାମଲାରେ ଭାରତକୁ ପ୍ରତ୍ୟର୍ପଣ କରାଯିବା ନେଇ ଶୁଣାଣି ହେଉଛି। ଇତିମଧ୍ୟରେ ଓ୍ବେଷ୍ଟମିନିଷ୍ଟର ମାଜିଷ୍ଟ୍ରେଟ୍ ଅଦାଲତରେ ଗତ ଶୁଣାଣି ବେଳେ ବିଚାରପତି ଚିଫ୍ ମାଜିଷ୍ଟ୍ରେଟ୍ ଏମ୍ମା ଆର୍ବୁଥନଟ୍ ୪୮ ବର୍ଷୀୟ ମୋଦିଙ୍କ ଜାମିନ ଆବେଦନକୁ ଖାରଜ କରିଦେଇଥିଲେ। ତାଙ୍କୁ ଏବେ ଦକ୍ଷିଣ-ପଶ୍ଚିମ ଲଣ୍ଡନର ଓ୍ବାଣ୍ଡ୍ସଓ୍ବର୍ଥ ଜେଲ୍ରେ ରଖାଯାଇଛି। କ୍ରମାଗତ ୩ ଥର ମୋଦିଙ୍କ ଜାମିନ ଆବେଦନ ଖାରଜ ହୋଇସାରିଲାଣି। ଗୁରୁବାର ବିଚାରପତି ଆର୍ବୁଥନଟ ପ୍ରତ୍ୟର୍ପଣ ସମ୍ପର୍କିତ ମାମଲାର ଶୁଣାଣି ଲାଗି ସମୟସୀମା ଧାର୍ଯ୍ୟ କରିପାରନ୍ତି। ଏଥିପୂର୍ବରୁ ବିଚାରପତି ମୋଦିଙ୍କ ଜାମିନ ଆବେଦନକୁ ନାମଞ୍ଜୁର କରି ଦର୍ଶାଇଥିଲେ ଯେ, ମହାଠକେଇ ବଡ଼ ମାତ୍ରାରେ ହୋଇଛି। ଏଭଳି ଅବସ୍ଥାରେ ଜାମିନ ଲାଗି ଆବେଦନ କରାଯାଇଛି। ଜାମିନ ରାଶି ଦୁଇଗୁଣା କରି ୨୦ ଲକ୍ଷ ପାଉଣ୍ଡ କରାଯିବାକୁ ମଧ୍ୟ ପ୍ରସ୍ତାବ ଦିଆଯାଇଛି। ଏହାସତ୍ତ୍ୱେ ଅଭିଯୁକ୍ତଙ୍କ ଆମତ୍ସମର୍ପଣ ନେଇ ଚିନ୍ତା ଦୂର ହେଉନାହିଁ। ଇଣ୍ଟରପୋଲର ରେଡକର୍ନର ନୋଟିସ୍ ଓ ପ୍ରତ୍ୟର୍ପଣ ଓ୍ବାରେଣ୍ଟ ବଳରେ ଲଣ୍ଡନ ପୋଲିସ ମୋଦିଙ୍କୁ ମେଟ୍ରୋ ବ୍ୟାଙ୍କରୁ ଗିରଫ କରିଥିଲା। ସେ ସେତେବେଳେ ଏହି ବ୍ୟାଙ୍କରେ ଏକ ଆକାଉଣ୍ଟ ଖୋଲିବାକୁ ପ୍ରୟାସ କରୁଥିଲେ।
