ଭୁବନେଶ୍ୱର,୧୩।୧:ପ୍ରତିବର୍ଷ ପରି ଚଳିତବର୍ଷ ମଧ୍ୟ ଓଡ଼ିଶା ସରକାରଙ୍କ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଅଧୀନ ଓର୍ମାସ ଦ୍ୱାରା ଜାତୀୟସ୍ତରୀୟ ହସ୍ତଶିଳ୍ପ ମେଳା ଶିଶିର ସରସ-୨୦୨୩ ଶୁକ୍ରବାରଠାରୁ ଆରମ୍ଭ ହେଉଛି। ଜାନୁୟରୀ ୧୩ରୁ ୨୯ ତାରିଖ ପର୍ଯ୍ୟନ୍ତ ଏହି ମେଳା ଭୁବନେଶ୍ୱରରେ ଆୟୋଜନ ହେବ ବୋଲି ବିଭାଗ ପକ୍ଷରୁ ସୂଚନା ଦିଆଯାଇଛି। ସେହିପରି ହକି ବିଶ୍ୱକପ୍ ପରିବେଶକୁ ଉତ୍ସବମୁଖର କରିବା ପାଇଁ ରାଉରକେଲାଠାରେ ମଧ୍ୟ ଆଞ୍ଚଳକି ସରସ ମେଳା ଜାନୁୟରୀ ୧୫ରୁ ୨୭ ତାରିଖ ପର୍ଯ୍ୟନ୍ତ ହେବ। ଅପରପକ୍ଷରେ ୩୦ ଜିଲାରେ ମଧ୍ୟ ପଲ୍ଲିଶ୍ରୀ ମେଳା ଏବଂ ଜିଲା ମହୋତ୍ସବର ଆୟୋଜନ କରାଯାଉଛି। ମେଳାକୁ ଅଧିକ ଆକର୍ଷଣୀୟ ଏବଂ ଚିତ୍ତାକର୍ଷକ କରିବା ପାଇଁ ବିଭାଗ ପକ୍ଷରୁ ବିଭିନ୍ନ ପ୍ରକାର ପଦକ୍ଷେପ ମଧ୍ୟ ନିଆଯାଉଛି। ଭୁବନେଶ୍ୱର ଶିଶିର ସରସ ମେଳା ସ୍ଥାନୀୟ ବରମୁଣ୍ଡା ସ୍ଥିତ ବିଜୁ ପଟ୍ଟନାୟକ ଖେଳ ପଡ଼ିଆଠାରେ ଆୟୋଜନ ହେବ। ଏହି ୧୭ ଦିନିଆ ଜାତୀୟସ୍ତରୀୟ ହସ୍ତଶିଳ୍ପ ମେଳାରେ ମୋଟ ୩୫୦ଟି ଷ୍ଟଲ୍ ସହ ଓଡ଼ିଶାର ସମସ୍ତ ୩୦ଟି ଜିଲାରୁ ଏସ୍ଏଚ୍ଜି ଗୁଡ଼ିକର ହାତତିଆରି ସାମଗ୍ରୀ ଏବଂ ୨୪ଟି ରାଜ୍ୟର ହସ୍ତଶିଳ୍ପ, ହସ୍ତତନ୍ତ ଓ ଖାଦ୍ୟ ମସଲା ସାମଗ୍ରୀ ଆଦି ଷ୍ଟଲ୍ ପଡ଼ିବ ବୋଲି ଓର୍ମାସ ପକ୍ଷରୁ ସୂଚନା ଦିଆଯାଇଛି। ଉଲ୍ଲେଖଯୋଗ୍ୟ, ମେଳାର ପ୍ରତି ସନ୍ଧ୍ୟାରେ ନାମୀଦାମୀ କଳାକାରଙ୍କ ଦ୍ୱାରା ଚିତ୍ତାକର୍ଷକ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବା ପାଇଁ ମଧ୍ୟ ଯୋଜନା ରହିଛି। ଏଥର ମେଳାରେ ଗାୟକ ଋତୁରାଜ ମହାନ୍ତିଙ୍କ ସମେତ ଓଡ଼ିଆ ସଙ୍ଗୀତ ଜଗତର ବହୁ ନାମୀଦାମୀ ଗାୟକଗାୟିକା ଓ ନୃତ୍ୟଶିଳ୍ପୀ ସେମାନଙ୍କ କାର୍ଯ୍ୟକ୍ରମ ପରିବେଷଣ କରିବେ ବୋଲି ବିଭାଗୀୟ ଅଧିକାରୀ ସୂଚନା ଦେଇଛନ୍ତି। ଏଥିର ଶିଶିର ସରସ ମେଳାରେ ଯେଭଳି ଦିବ୍ୟାଙ୍ଗମାନେ ସହଜରେ ବୁଲାବୁଲି କରିପାରିବେ ସେଥିପାଇଁ ଓର୍ମାସ ପକ୍ଷରୁ ବ୍ୟାଟେରିଚାଳତି କାର୍, ହୁଇଲ ଚେୟାର ଏବଂ ଭଲ୍ୟୁଣ୍ଟିୟର ବ୍ୟବସ୍ଥା ମଧ୍ୟ କରାଯାଇଛି। ଅପରପକ୍ଷରେ ପ୍ରତିଦିନ ପୂର୍ବାହ୍ନ ୧୧ଟାରୁ ରାତି ୯ଟା ପର୍ଯ୍ୟନ୍ତ ମେଳା ପରିସର ଖୋଲା ରହିବ ବୋଲି ଓର୍ମାସ ପକ୍ଷରୁ ସୂଚନା ଦିଆଯାଇଛି।
