ବାଲେଶ୍ୱର ଅଫିସ,୨୬।୮- ବାଲେଶ୍ୱର ସହରର ଅଙ୍ଗାରଗଡ଼ିଆ, କରଞ୍ଜିଆ, ଆଇଟିଆଇ ପମ୍ପହାଉସ ନିକଟବର୍ତ୍ତୀ ଅଞ୍ଚଳରେ ସରକାରୀ ଜମିରେ ଦୀର୍ଘଦିନ ଧରି ଗଢ଼ି ଉଠିଥିବା ସ୍ଥାୟୀ ବାସିନ୍ଦାଙ୍କୁ ଉଚ୍ଛେଦ କରିବା ଲାଗି ପ୍ରଶାସନ ଉଦ୍ୟମ ଆରମ୍ଭ କରିଛି। ଏହାକୁ ସ୍ଥାନୀୟ ବାସିନ୍ଦର ବିରୋଧ କରି ସେମାନଙ୍କ ଆଗ ଥଇଥାନ କରିବାକୁ ଦାବି କରିଛନ୍ତି। ସେମାନେ ସୋମବାର ପୂର୍ବାହ୍ନ ୧୧ଟା ସମୟରେ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କୁ ଏହି ମର୍ମରେ ଏକ ଦାବି ପତ୍ର ପ୍ରଦାନ କରି ସେମାନଙ୍କୁ ଆଗ ଜମି ଦେବା ସହିତ ଘର ନିର୍ମାଣ ପାଇଁ ଅର୍ଥ ପ୍ରଦାନ କରିବାକୁ ଦାବି କରିଛନ୍ତି।
ସହରର ଉତ୍ତରପୂର୍ବ ଦିଗରେ ଥିବା ଓଟିରୋଡ୍ରେ ସରକାରୀ ଆଇଟିଆଇ ପାର୍ଶ୍ୱରେ ଯାଇଥିବା ପକ୍କା ରାସ୍ତାକୁ ଆଇଟିଆଇ କର୍ତ୍ତୃପକ୍ଷ ଦଖଲକୁ ନେବା ପାଇଁ ଯୋଜନା କରୁଥିବା ଜଣାପଡିଛି। ଏହି ରାସ୍ତା ବନ୍ଦ ହେଲେ ଉକ୍ତ ଅଞ୍ଚଳର ୨ଶହରୁ ଉର୍ଦ୍ଧ୍ୱ ପରିବାର ଲୋକେ ସହରର ମୁଖ୍ୟରାସ୍ତାକୁ ବାହାରିବାରେ ଅସୁବିଧାର ସମ୍ମୁଖୀନ ହେବେ ବୋଲି ସେଠାକାର ବାସିନ୍ଦା ଅଭିଯୋଗ କରିଛନ୍ତି। ଜିଲାପାଳଙ୍କୁ ଦାବି ପତ୍ର ପ୍ରଦାନ ସମୟରେ ଦିବାକର ଜେନା, ରମେଶ ଚନ୍ଦ୍ର ପତି, ଭାନୁମତି ନାୟକ, ରଜନୀ ମହାଳିକ, ବିଦ୍ୟାଧର ମହାଳିକ, ସବିତା ଜେନା ପ୍ରମୁଖ ଉପସ୍ଥିତ ଥିଲେ।
