ଦୁବାଇ,୩୦।୧୦- ଆଇସିସି ପକ୍ଷରୁ ଦୁଇବର୍ଷ ବାସନ୍ଦ ହେବା ପରେ ଶକିବ ଅଲ ହସନ ଦୁର୍ନୀତି ସମ୍ପର୍କୀତ ତଥ୍ୟ ପ୍ରଦାନ କରିବାରେ ବିଫଳ ହୋଇଥିବା ସ୍ପଷ୍ଟ କରିଛନ୍ତି। ଆଇସିସି ବୁଧବାର ଶକିବଙ୍କ ନିକଟକୁ ଭାରତୀୟ ବୁକି ଦୀପକ ଅଗ୍ରଓ୍ବାଲଙ୍କ ଆଡ଼ୁ ହୋଇଥିବା ହ୍ବାଟସଆପ ମେସେଜ ଅଫିସିଆଲ ଓ୍ବେବସାଇଟ୍ରେ ପ୍ରକାଶ କରିଛି। ୭ ପୃଷ୍ଠା ସମ୍ଭଳିତ ରିପୋର୍ଟ ଅନୁଯାୟୀ, ଶକିବ ୧୯ ଜାନୁୟାରୀ ୨୦୧୮ ଦିନ ଏକ ହ୍ବାଟସଆପ ମେସେଜ ରିସିଭ କରିଥିଲେ। ସେଥିରେ ଲେଖାଥିଲା, ସେହିଦିନର ମ୍ୟାଚ୍ରେ ମ୍ୟାନ ଅଫ୍ ଦ ମ୍ୟାଚ୍ ହେବା ପାଇଁ ଶୁଭେଚ୍ଛା। ପରବର୍ତ୍ତୀ ମେସେଜରେ ଆମେ ସାଥି ହୋଇ କାର୍ଯ୍ୟ କରୁଛୁ ନା ମୁଁ ଆଇପିଏଲ ପର୍ଯ୍ୟନ୍ତ ମୁଁ ଅପେକ୍ଷା କରିବି ବୋଲି ପ୍ରଶ୍ନ କରାଯାଇଥିଲା। ଏଠାରେ କାର୍ଯ୍ୟ ମାନେ ଦଳୀୟ ତଥ୍ୟ ଯଥା ଷ୍ଟାଟେଜି ପ୍ରକାଶ କରିବା। ଶକିବ ଏହି ମେସେଜ ସମ୍ପର୍କରେ ଆଇସିସିର ଦୁର୍ନୀତି ନିରୋଧି ବିଭାଗ (ଏସିୟୁ)କୁ ଜଣାଇ ନ ଥିଲେ। ଉକ୍ତ ମେସେଜ ବାଂଲାଦେଶ, ଶ୍ରୀଲଙ୍କା ଓ ଜିମ୍ବାଓ୍ବେକୁ ନେଇ ଅନୁଷ୍ଠିତ ହୋଇଥିବା ତ୍ରିରାଷ୍ଟ୍ରୀୟ ସିରିଜ୍ବେଳେ ହୋଇଥିଲା। ଜାନୁୟାରୀ ୨୩ ତାରିଖରେ ଅଗ୍ରଓ୍ବାଲ ଆଉ ଥରେ ଉଦ୍ୟମ କରି ଲେଖିଥିଲେ ‘ଭାଇ, ଏ ସିରିଜ୍ରେ କିଛି ହେବ?’। ସମାନ ବୁକି ଶକିବଙ୍କୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ବେଳେ ସନରାଇଜର୍ସ ଓ କିଙ୍ଗ୍ସ ଏକାଦଶ ମଧ୍ୟରେ ଖେଳାଯିବାକୁ ଥିବା ମ୍ୟାଚ୍ ପୂର୍ବରୁ ମଧ୍ୟ ମେସେଜ କରିଥିଲେ। ସେହି ମ୍ୟାଚ୍ରେ ଜଣେ ନିର୍ଦ୍ଧିଷ୍ଟ ଖେଳାଳିଙ୍କୁ ସୁଯୋଗ ମିଳିବ କି ନାହିଁ ବୋଲି ବୁକି ପ୍ରଶ୍ନ କରିଥିଲେ। ନିକଟରେ ଶକିବଙ୍କ ନେତୃତ୍ୱରେ ଦେଶର ଖେଳାଳିମାନେ ଷ୍ଟ୍ରାଇକ କରିଥିଲେ। ଗତ ୨୩ ତାରିଖରେ ଷ୍ଟ୍ରାଇକରୁ ଫେରିବା ପରେ ଦକ୍ଷ ଅଲରାଉଣ୍ଡର ଭାରତ ସିରିଜ୍ ପାଇଁ ପ୍ରସ୍ତୁତ ହେଉଥିଲେ। ଭାରତ ବିପକ୍ଷ ଟି୨୦ ସିରିଜ୍ ଆସନ୍ତା ୩ ତାରିଖରୁ ନୂଆଦିଲ୍ଲୀସ୍ଥିତ ଅରୁଣ ଜେଟଲି ଷ୍ଟାଡିୟମରୁ ଆରମ୍ଭ ହେବ।
