ଅକ୍ଲାଣ୍ଡ,୫ା୩(ପି.ଟି.)- କରୋନା ଭାଇରସ କାରଣରୁ ବିଶ୍ୱରେ ପ୍ରାୟ ୮୦ ଦେଶ ପ୍ରଭାବିତ ହୋଇସାରିଛନ୍ତି। ଏଥିରୁ ବର୍ତ୍ତି ପାରିନାହିଁ ଭାରତ । ଦେଶରେ ୧୬ ଇଟାଲି ଯାତ୍ରୀଙ୍କ ସମେତ ୨୯ ଜଣ କରୋନା ଭାଇରସରେ ଆକ୍ରାନ୍ତ ହୋଇଛନ୍ତି। ଏଥିଯୋଗୁ ଆଇପିଏଲରେ ଖେଳିବାକୁ ଥିବା ୬ ଖେଳାଳିଙ୍କୁ ନ୍ୟୁଜିଲାଣ୍ଡ କ୍ରିକେଟ (ଏନ୍ଜେଡ୍ସି) ଭାରତରେ କରୋନା ଭାଇରସ ସମ୍ପର୍କରେ ସମ୍ପୂର୍ଣ୍ଣ ତଥ୍ୟ ପ୍ରଦାନ କରୁଛି। ଆଇପିଏଲ ଓ ମହିଳା ଚ୍ୟାଲେଞ୍ଜ ଇଭେଣ୍ଟରେ ଖେଳିବାକୁ ଥିବା ନ୍ୟୁଜିଲାଣ୍ଡର ପୁରୁଷ ଓ ମହିଳା ଖେଳାଳିଙ୍କୁ ଭାରତରେ ସ୍ଥିତି ସମ୍ପର୍କରେ ଅବଗତ କରାଇ ଦିଆଯାଇଛି। ଏହାଦ୍ୱାରା ସେମାନେ ସତର୍କ ରହିପାରିବେ ବୋଲି ଏନ୍ଜେଡ୍ସିର ପବ୍ଲିକ ଆଫାୟର୍ସ ମୁଖ୍ୟ ରିଚାର୍ଡ ବୁକ ଏକ ବିବୃତିରେ କହିଛନ୍ତି। ଆଇପିଏଲରେ ନ୍ୟୁଜିଲାଣ୍ଡ ଜିମି ନିଶାମ (କିଙ୍ଗ୍ସ ଏକାଦଶ ପଞ୍ଜାବ), ଲୋକି ଫର୍ଗୁସନ (କେକେଆର), ମିଚେଲ ମ୍ୟାକ୍ଲେଘାନ ଓ ଟ୍ରେଣ୍ଟ ବୋଲ୍ଟ (ଉଭୟେ ମୁମ୍ବାଇ ଇଣ୍ଡିଆନ୍ସ), କେନ ଓ୍ବିଲିୟମସନ (ସନରାଇଜର୍ସ ହାଇଦ୍ରାବାଦ) ଓ ମିଚେଲ ସାଣ୍ଟନର (ସିଏସ୍କେ) ଖେଳିବେ। ବୁକ ଆହୁରି କହିଛନ୍ତି କ୍ରିକେଟ ବୋର୍ଡ ଭାରତର ସ୍ବାସ୍ଥ୍ୟ, ବିଦେଶ ଓ କ୍ରୀଡ଼ା ମନ୍ତ୍ରଣାଳୟ ସହ ଯୋଗାଯୋଗରେ ରହିଛି। ଉଲ୍ଲେଖଯୋଗ୍ୟ, ବିସିସିଆଇ ପୂର୍ବରୁ କହିସାରିଛି ଆଇପିଏଲ କାର୍ଯ୍ୟସୂଚୀରେ କିଛି ପରିବର୍ତ୍ତନ ହେବ ନାହିଁ। ଆଇପିଏଲବେଳେ ଖେଳାଳିମାନେ ପ୍ରଶଂସକଙ୍କ ସହ ସେଲ୍ଫି ଓ ଅଟୋଗ୍ରାଫ ଦେବାକୁ ପଡ଼େ। ଏହାଦ୍ୱାରା ଭାଇରସ ବ୍ୟାପିବାର ସମ୍ଭାବନା ରହିଛି। ଆଶା କରାଯାଉଛି ଖେଳାଳିଙ୍କୁ ଜନ ଗହଳିପୂର୍ଣ୍ଣ ସ୍ଥାନରୁ ଦୂରେଇ ରହିବାକୁ ପରାମର୍ଶ ଦିଆଯାଇପାରେ। ନିକଟରେ ଶ୍ରୀଲଙ୍କା ଗସ୍ତ କରିଥିବା ଇଂଲଣ୍ଡ ଦଳ ସେଠାରେ ଖେଳାଳିଙ୍କ ସହ ମ୍ୟାଚ୍ ପରେ ହାତ ନ ମିଳାଇବାକୁ କୁହାଯାଇଛି।
