ବାଙ୍ଗାଲୋର,୧୯-୧୧ଁଦେଶର ସୂଚନା ଏବଂ ପ୍ରଯୁକ୍ତି ସେବା ପ୍ରଦାନକାରୀ କମ୍ପାନୀଗୁଡିକ ୩୦ରୁ ୪୦ ହଜାର କର୍ମଚାରୀଙ୍କୁ ଛଟେଇ କରିପାରନ୍ତି। କମ୍ପାନୀଗୁଡିକର ଅଭିବୃଦ୍ଧି ମାନ୍ଦା ରହିବା କାରଣରୁ ମଧ୍ୟମ ଲେଭଲରେ ଆସନ୍ତା ଗୋଟିଏ ବର୍ଷରେ ଏହି ଛଟେଇ ହୋଇପାରେ ବୋଲି ଆଇଟି ଶିଳ୍ପ ବିଶେଷଜ୍ଞ ଟି.ଭି. ମୋହନଦାସ ପାଇ ସୋମବାର ସୂଚନା ଦେଇଛନ୍ତି। ପ୍ରମୁଖ ଆଇଟି କମ୍ପାନୀ ଇନ୍ଫୋସିସ ଲିମିଟେଡରେ ପାଇ ମୁଖ୍ୟ ବିତ୍ତ ଅଧିକାରୀ ଭାବେ କାର୍ଯ୍ୟ କରିଛନ୍ତି। ଶିଳ୍ପରେ ସମୟ ସମୟରେ ଏଭଳି ସ୍ଥିତି ଦେଖାଦେଇଥାଏ। ଶିଳ୍ପରେ ନିର୍ଦ୍ଦିଷ୍ଟ ବ୍ୟବସ୍ଥାରେ ପରିପକ୍ୱତା ଦେଖାଦେଲେ ଏଭଳି ଘଟଣାମାନେ ସାମ୍ନାକୁ ଆସିଥାଏ ବୋଲି ପାଇ ମତ ରଖିଛନ୍ତି। ସାଧାରଣତଃ ପାଞ୍ଚ ବର୍ଷ ସମୟ ବ୍ୟବଧାନରେ ଏଭଳି ସ୍ଥିତି ଆସିଥାଏ। କେବଳ ଭାରତ ନୁହେଁ ପାଶ୍ଚାତ୍ୟ ଦେଶଗୁଡିକରେ ମଧ୍ୟ ଏଭଳି ସମାନ ଘଟଣା ଦେଖାଯାଇଥାଏ। କୌଣସି କ୍ଷେତ୍ର ପରିପକ୍ୱ ସ୍ଥିତିକୁ ଆସିଲେ ମିଡିଲ ଲେଭଲରେ କାମ କରୁଥିବା ଲୋକମାନେ ସେମାନେ ଲାଭ କରୁଥିବା ବେତନରେ ଆଉ ଭାଲ୍ୟୁ ସଂଯୋଗ କରିପାରନ୍ତି ନାହିଁ ବୋଲି ପାଇ କହିଛନ୍ତି।
କମ୍ପାନୀ ତ୍ୱରିତ ଭାବେ ଅଭିବୃଦ୍ଧି କରୁଥିବା ବେଳେ ପଦୋନ୍ନତି ମିଳିବା ଦେଖାଯାଇଥାଏ। ମାତ୍ର ମାନ୍ଦାବସ୍ଥା ସମୟରେ କର୍ମଚାରୀମାନେ ଉଚ୍ଚ ହାରରେ ବେତନ ଲାଭ କରୁଥିଲେ କମ୍ପାନୀଗୁଡିକ ସେମାନଙ୍କ ସ୍ଥିତିକୁ ସମ୍ଭାଳିବା ଲାଗି ପୁଣି ଥରେ ନୂଆ ଯୋଜନା ହାତକୁ ନେଇଥାନ୍ତି। ଫଳରେ ଉଚ୍ଚ ବେତନ ଲାଭ କରୁଥିବା କ୍ଷେତ୍ରରେ ଏଭଳି ଛଟେଇ ଦେଖାଯାଇଥାଏ ବୋଲି ପାଇ ମତ ଦେଇଛନ୍ତି। ମାତ୍ର ନିର୍ଦ୍ଦିଷ୍ଟ ୫ ବର୍ଷ ବ୍ୟବଧାନରେ ଏଭଳି ସମୟ ଆସିଥାଏ ବୋଲି ମଣିପାଲ ଗ୍ଲୋବାଲ ଏଜୁକେଶନ ସର୍ଭିସ ଏବଂ ଆରିନ କ୍ୟାପିଟାଲର ଅଧ୍ୟକ୍ଷ ଥିବା ପାଇ ସ୍ପଷ୍ଟ କରିଛନ୍ତି। ଠିକ୍ ଭାବେ ପରଫରମାନ୍ସ କିମ୍ବା ଭାଲ୍ୟୁ ସଂଯୋଗ ଦିଗରେ ଉଚିତ ଯୋଗଦାନ ନ ରଖିଲେ କେହି ସମାନ ବେତନ ଏବଂ ଉଚ୍ଚ ପଦବୀରେ ତିଷ୍ଠି ରହିବା କଷ୍ଟକର ହୋଇପଡେ। ଛଟେଇ ହେଉଥିବା ୮୦% କର୍ମଚାରୀ ଯଦି ସ୍ପେଶାଲିଷ୍ଟ ହୋଇଥାନ୍ତି ତେବେ ତାଙ୍କୁ ଅନ୍ୟ ଶିଳ୍ପ ଚାକିରୀ ମିଳିଯିବ ବୋଲି ପାଇ ମତ ରଖିଛନ୍ତି।
