ସିଡ୍ନୀ, ୮।୬(ପି.ଟି.): ଅଷ୍ଟ୍ରେଲିଆର ବିଶ୍ୱକପ୍ ବିଜୟୀ ଅଧନାୟକ ମାଇକେଲ କ୍ଲାର୍କଙ୍କୁ ଏକ ନୂଆ ତଥା ବଡ ଦାୟିତ୍ୱ ଦିଆଯିବା ସହ ସମ୍ମାନିତ କରାଯାଇଛି। ତାଙ୍କୁ ଅର୍ଡର ଅଫ୍ ଅଷ୍ଟ୍ରେଲିଆରେ ଅଧିକାରୀ ଭାବେ ନିଯୁକ୍ତ କରାଯାଇଛି। ପୂର୍ବରୁ ପୂର୍ବତନ ଅଧିନାୟକ ଆଲାନ ବର୍ଡର, ଷ୍ଟିଭ୍ ଓ୍ବ, ରିକି ପଣ୍ଟିଂ, ମାର୍କ ଟେଲର ଓ ବବ୍ ଥମ୍ପସନଙ୍କୁ ମଧ୍ୟ ଏହି ପଦରେ ନିଯୁକ୍ତ କରାଯାଇଥିଲା। ଫଳରେ ଏହି ପୂର୍ବତନ ଦୁଇ ଅଧିନାୟକଙ୍କ ସହ କ୍ଲାର୍କ ଜାତୀୟ ତଥା ରାଷ୍ଟ୍ରୀୟ ମାନ୍ୟତା ହାସଲ କରିଛନ୍ତି। କ୍ଲାର୍କଙ୍କ ନେତୃତ୍ୱରେ ଅଷ୍ଟ୍ରେଲିଆ ଘରୋଇ ପରିବେଶରେ ୨୦୧୫ ଦିନିକିଆ ବିଶ୍ୱକପ୍ରେ ଟାଇଟଲ ହାସଲ କରିଥିଲା। ତାଙ୍କୁ ଅର୍ଡର ଅଫ୍ ଅଷ୍ଟ୍ରେଲିଆର ଜେନେରାଲ ଡିଭିଜନ୍ରେ ଆନ ଅଫିସର (ଏଓ) ଭାବେ ନିଯୁକ୍ତି ଦିଆଯାଇଛି। କ୍ରୀଡ଼ା କ୍ଷେତ୍ରରେ ଉଲ୍ଲେଖନୀୟ ଅବଦାନ ତଥା ମେଧାବୀ ସେବା କ୍ଲାର୍କଙ୍କୁ ଏହି ସମ୍ମାନରେ ସମ୍ମାନିତ କରାଯାଇଛି।
ଏହି ଖବର ମିଳିବା ପରେ କ୍ଲାର୍କ ଏହାକୁ ବିଶ୍ୱାସ କରିପାରି ନ ଥିଲେ। ଏପ୍ରିଲ ଫୁଲ୍ ଭଳି ତାଙ୍କୁ ଜୁନ୍ରେ ବୋକା ବନାଇବାକୁ ଚେଷ୍ଟା କରାଯାଇଛି ବୋଲି ସେ ଭାବିଥିଲେ। ଏଥିରେ ଆଶ୍ଚର୍ଯ୍ୟ ହୋଇଥିଲି ଓ ଶେଷରେ ସମ୍ମାନ ବୋଧ କରିଥିଲି। କ୍ରିକେଟରେ କ୍ଲାର୍କଙ୍କ ଅସାଧାରଣ ଅବଦାନ ରହିଛି। ଜଣେ ଖେଳାଳି ଓ ଅଧିନାୟକ ଭାବେ ସେ ଅଷ୍ଟ୍ରେଲିଆ କ୍ରିକେଟ ଦଳ ପାଇଁ ବେଶ୍ ଗୁରୁତ୍ୱପୂର୍ଣ୍ଣ ଥିଲେ। ୨୦୧୫ ବିଶ୍ୱକପ୍ ପରେ ୩୯ ବର୍ଷୀୟ କ୍ଲାର୍କ କ୍ରିକେଟରୁ ଅବସର ନେଇଥିଲେ। ସେ ୧୧୫ ଟେଷ୍ଟ, ୧୪୫ ଦିନିକିଆ ଓ ୩୪ଟି ଟି୨୦ ଖେଳି ଯଥାକ୍ରମେ ୮୬୪୩, ୭୯୮୧ ଓ ୪୮୮ ରନ ସଂଗ୍ରହ କରିଥିଲେ।
ଅଷ୍ଟ୍ରେଲିଆରେ କ୍ରିକେଟ ସଂସ୍କୃତିରେ ପରିଣତ ହୋଇଛି। ଏହା ଆମ ରକ୍ତରେ ମିଶିକରି ରହିଛି। କ୍ରିକେଟକୁ ବାଦ୍ ଦେଲେ ଅଷ୍ଟ୍ରେଲିଆରେ ଗ୍ରୀଷ୍ମଋତୁ କଥା ଚିନ୍ତା କରିହେବ ନାହିଁ। କୋଭିଡ୍-୧୯ ଯୋଗୁ କ୍ରିକେଟ ଗୁରୁତର ଭାବେ ପ୍ରଭାବିତ ହୋଇଥିଲେ ମଧ୍ୟ କ୍ରିକେଟ ତଥା ଅନ୍ୟ କ୍ରୀଡ଼ାଗୁଡିକ ସ୍ଥିତି ବଞ୍ଚାଇବାକୁ ସକ୍ଷମ ହେବେ ଓ ଏଥିରେ ସଫଳତା ଲାଭ କରିବେ ବୋଲି କ୍ଲାର୍କ କହିଛନ୍ତି। ଏହି ମହାମାରୀ କାରଣରୁ ସାରା ବିଶ୍ୱ ଓ ଅଷ୍ଟ୍ରେଲିଆରେ କ୍ରିକେଟ ସାଂଘାତିକ ଭାବେ କ୍ଷତିଗ୍ରସ୍ତ ହୋଇଛି। ଏଥିପାଇଁ କ୍ରିକେଟ ଅଷ୍ଟ୍ରେଲିଆ (ସିଏ) ୩୦୦ ମିଲିୟନ ଅଷ୍ଟ୍ରେଲୀୟ ଡଲାର କ୍ଷତି ସହିଛି। ଏବେ ସିଏ ଏହି କ୍ଷତିରୁ ମୁକୁଳିବା ପାଇଁ ଭାରତ ବିପକ୍ଷ ଘରୋଇ ଟେଷ୍ଟ ସିରିଜ ଉପରେ ଅତ୍ୟଧିକ ଭାବେ ନିର୍ଭରଶୀଳ ହୋଇପଡିଛି।
