ଭୁବନେଶ୍ୱର, ୧୨ା୧୧(ବ୍ୟୁରୋ): ବହୁଚର୍ଚ୍ଚିତ ଅଯୋଧ୍ୟା ବିବାଦର ସୁପ୍ରିମକୋର୍ଟଙ୍କ ରାୟ ଉପରେ ସୋମବାର ପ୍ରଥମଥର ପାଇଁ ମନ୍ତବ୍ୟ ରଖିଛନ୍ତି ଜଗଦଗୁରୁ ଶଙ୍କରାଚାର୍ଯ୍ୟ ନିଶ୍ଚଳାନନ୍ଦ ସରସ୍ବତୀ। ସୁପ୍ରିମକୋର୍ଟଙ୍କ ରାୟକୁ ବିରୋଧ କରି ଏହା ଦେଶ ପାଇଁ ବିପଜ୍ଜନକ ହେବ ଏବଂ ଅଶାନ୍ତି ସୃଷ୍ଟି କରିବ ବୋଲି ଶଙ୍କରାଚାର୍ଯ୍ୟ ପ୍ରତିକ୍ରିୟା ରଖିିଛନ୍ତି। ଅଯୋଧ୍ୟାରେ ମସ୍ଜିଦ ନିର୍ମାଣ ପାଇଁ ସୁପ୍ରିମକୋର୍ଟ ସୁନ୍ନୀ ଓ୍ବାକ୍ଫ ବୋର୍ଡକୁ ୫ଏକର ଜମି ପ୍ରଦାନ କରିବା ଦୁର୍ଭାଗ୍ୟଜନକ ଏବଂ ଭବିଷ୍ୟତରେ ଏହା ଆତଙ୍କବାଦୀଙ୍କ ପ୍ରମୁଖ ଠିକଣାରେ ପରିଣତ ହେବ ବୋଲି ସେ କହିଛନ୍ତି। ସ୍ଥାନୀୟ ରେଲ୍ଓ୍ବେ ଅଡିଟୋରିୟମ୍ଠାରେ ଆୟୋଜିତ ଏକ ସ୍ବତନ୍ତ୍ର ଖବରଦାତା ସମ୍ମିଳନୀକୁ ସମ୍ବୋଧନ କରି ଶଙ୍କରାଚାର୍ଯ୍ୟ କହିଥିଲେ, ହିନ୍ଦୁ ଓ ମୁସଲମାନ୍ମାନେ ଶାନ୍ତିରେ ରହିବେ ବୋଲି ପାକିସ୍ତାନ ଓ ଭାରତ ପରସ୍ପରଠାରୁ ଅଲଗା ହୋଇଥିଲେ। ହେଲେ ଏବେ ଦୁଇ ଦେଶ ମଧ୍ୟରେ ଶାନ୍ତି ନାହିଁ। ପାକିସ୍ତାନ ଆତଙ୍କବାଦୀଙ୍କ କେନ୍ଦ୍ରସ୍ଥଳୀ ବୋଲି ଖୋଦ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍ ସ୍ବୀକାର କରିଛନ୍ତି। ଏହାପରେ ମଧ୍ୟ ଆମେ ନିଜ ଜମିକୁ ଆତଙ୍କବାଦୀଙ୍କୁ ଦେଉଛୁ। ଉକ୍ତ ୫ଏକର ଜମିରେ ଯଦି ମସ୍ଜିଦ ନିର୍ମାଣ ହୁଏ ତାହେଲେ ଅଯୋଧ୍ୟା ଆଉ ଏକ ମକ୍କାରେ ପରିଣତ ହେବ। ଆତଙ୍କବାଦୀଙ୍କ ପ୍ରବେଶ ଦ୍ୱାର ହେବା ସହ ଉତ୍ତରପ୍ରଦେଶ ଆଉ ଏକ ପାକିସ୍ତାନରେ ପରିଣତ ହେବ ବୋଲି ଶଙ୍କରାଚାର୍ଯ୍ୟ କହିଛନ୍ତି। ଗୋଟିଏ ସ୍ଥାନରେ ଯଦି ଉଭୟ ମନ୍ଦିର ଓ ମସ୍ଜିଦ ନିର୍ମାଣ ହେବାର ଥିଲା ତା’ହେଲେ ଆଗରୁ କ’ଣ ପାଇଁ ହେଉ ନ ଥିଲା ବୋଲି ସେ ଓଲଟା ପ୍ରଶ୍ନ କରିଛନ୍ତି। ନରସିମ୍ହା ରାଓ, ବାଜପେୟୀ ସରକାରଙ୍କ ସମୟରେ ଏହି ସମାନ ନିଷ୍ପତ୍ତି ନିଆଯାଇଥିଲା। ହେଲେ ଆମେ ଏଥିରେ ରାଜି ନ ହେବାରୁ ନିଷ୍ପତ୍ତିକୁ ରଦ୍ଦ କରାଯାଇଥିଲା। ସୁପ୍ରିମକୋର୍ଟ ରାୟ ପ୍ରକାଶ କରିବା ପୂର୍ବରୁ ୪ ଧାମର ଶଙ୍କରାଚାର୍ଯ୍ୟମାନଙ୍କ ପରାମର୍ଶ କିମ୍ବା ମତାମତ ଲୋଡ଼ିନାହାନ୍ତି। ରାଜନେତାମାନେ ନିଜ ସ୍ବାର୍ଥକୁ ଦୃଷ୍ଟିରେ ରଖି ଧର୍ମଗୁରୁ ସୃଷ୍ଟି କରୁଛନ୍ତି ଓ ସେମାନଙ୍କ ମତକୁ ଆଧାର କରି ନିଜ ନିଜର ସ୍ବାର୍ଥସାଧନ କରୁଛନ୍ତି। ତେଣୁ ପାର୍ଲାମେଣ୍ଟରେ ସ୍ବତନ୍ତ୍ର ଅଧିବେଶନ କରି ସୁପ୍ରିମକୋର୍ଟ ଦେଇଥିବା ରାୟକୁ ଖାରଜ କରିବାକୁ ଶଙ୍କରାଚାର୍ଯ୍ୟ ଦାବି କରିଛନ୍ତି।
