ନୂଆଦିଲ୍ଲୀ,୩୧ା୧୦: ଅଯୋଧ୍ୟା ଜମି ବିବାଦ ବିଶ୍ୱର ସବୁଠୁ ଗୁରୁତ୍ୱପୂର୍ଣ୍ଣ ମାମଲାଗୁଡିକ ମଧ୍ୟରୁ ଅନ୍ୟତମ ବୋଲି ଭାରତର ପ୍ରଧାନ ବିଚାରପତି (ସିଜେଆଇ) ଭାବେ ଦାୟିତ୍ୱ ଗ୍ରହଣ କରିବାକୁ ଯାଉଥିବା ଜଷ୍ଟିସ୍ ଏସ୍.ଏ. ବୋବ୍ଡେ କହିଛନ୍ତି। ରାଜନୈତିକ ଦୃଷ୍ଟିରୁ ଅତ୍ୟନ୍ତ ସମ୍ବେଦନଶୀଳ ଏହି ମାମଲାର ଶୁଣାଣି କରୁଥିବା ୫ ଜଣିଆ ସାମ୍ବିଧାନିକ ପୀଠରେ ଜଷ୍ଟିସ୍ ବୋବ୍ଡେ ଅଛନ୍ତି। ଦୀର୍ଘବର୍ଷର ଏହି ଜମି ବିବାଦ ମାମଲାର କ୍ରମାଗତ ୪୦ ଦିନରୁ ଊର୍ଦ୍ଧ୍ୱ ଶୁଣାଣି ପରେ ରାୟ ସଂରକ୍ଷିତ ରହିଛି। ଆସନ୍ତା ୧୭ରେ ପ୍ରଧାନ ବିଚାରପତି ରଞ୍ଜନ ଗୋଗୋଇ ଅବସର ଗ୍ରହଣ କରିବାକୁ ଯାଉଥିଲାବେଳେ ଏହା ପୂର୍ବରୁ ରାୟ ପ୍ରକାଶ ପାଇବା ଆଶା କରାଯାଉଛି।
ଏକ ଘରୋଇ ଚ୍ୟାନେଲ୍କୁ ସାକ୍ଷାତ୍କାର ଦେବାବେଳେ ଅଯୋଧ୍ୟା ମାମଲା ତାଙ୍କ କ୍ୟାରିୟରର ଏକ ମାଇଲ୍ଖୁଣ୍ଟ ହେବ କି ବୋଲି ପ୍ରଶ୍ନର ଉତ୍ତରରେ ଜଷ୍ଟିସ୍ ବୋବ୍ଡେ କହିଥିଲେ, ଏହା ନିଶ୍ଚିତ ଭାବେ ଏକ ଗୁରୁତ୍ୱପୂର୍ଣ୍ଣ ମାମଲା। ଅଯୋଧ୍ୟାର ୨.୭୭ ଏକର ଜମିକୁ ନେଇ ଦୀର୍ଘଦିନରୁ ହିନ୍ଦୁ ଓ ମୁସଲମାନ ପକ୍ଷଙ୍କ ମଧ୍ୟରେ ବିବାଦ ଲାଗି ରହିଥିଲାବେଳେ ୮୦ ଦଶକରୁ ଏହାକୁ ନେଇ ରାଜନୀତି ଜୋର ଧରିଛି। ଭଗବାନ ରାମଙ୍କ ଜନ୍ମସ୍ଥାନ ଅଯୋଧ୍ୟାରେ ଥିବା ଏକ ମନ୍ଦିରକୁ ଭଙ୍ଗାଯାଇ ସେଠାରେ ବାବ୍ରୀ ମସ୍ଜିଦ ନିର୍ମାଣ ହୋଇଥିବା ବିଶ୍ୱାସ କରାଯାଏ। ୧୯୯୨ ଡିସେମ୍ବର ୬ରେ ହିନ୍ଦୁ କରସେବକମାନେ ଷୋଡ଼ଶ ଶତାବ୍ଦୀର ଉକ୍ତ ମସ୍ଜିଦକୁ ଭାଙ୍ଗି ଦେଇଥିଲେ। ଏହା ପରବର୍ତ୍ତୀ ଦଙ୍ଗାରେ ୩୦୦୦ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଥିଲା। ଦୀର୍ଘଦିନ ଧରି କୋର୍ଟଙ୍କ ବିଚାରାଧୀନ ଥିବା ଏହି ମାମଲା ଗତବର୍ଷ ପୁଣିଥରେ ଜୋର ଧରିଥିଲା। ମାମଲାର ଆପୋସ ସମାଧାନ ଲାଗି ଚଳିତ ବର୍ଷ ଆରମ୍ଭରେ ସୁପ୍ରିମକୋର୍ଟ ଏକ ମଧ୍ୟସ୍ଥ କମିଟି ଗଠନ କରିଥିଲେ। ଉକ୍ତ କମିଟି ସମାଧାନ ସୂତ୍ର ବାହାର କରିବାରେ ବିଫଳ ହେବା ପରେ ଅଗଷ୍ଟ ୬ରୁ ଅଦାଲତ ଦୈନନ୍ଦିନ ଶୁଣାଣି ଆରମ୍ଭ କରିଥିଲେ।
ନଭେମ୍ବର ୧୮ରେ ଜଷ୍ଟିସ୍ ବୋବ୍ଡେ ସିଜେଆଇ ଭାବେ ଶପଥ ଗ୍ରହଣ କରିବେ। ମଧ୍ୟପ୍ରଦେଶ ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ଜଷ୍ଟିସ୍ ବୋବ୍ଡେ ୨୦୧୩ ଏପ୍ରିଲରେ ସୁପ୍ରିମକୋର୍ଟ ବିଚାରପତି ଭାବେ ପଦୋନ୍ନତି ପାଇଥିଲେ। ଗୋପନୀୟତା ସାମ୍ବିଧାନିକ ଅଧିକାର କି ନୁହେଁ ତାହା ଉପରେ ନିଷ୍ପତ୍ତି ନେବା ଲାଗି ଗଠିତ ୯ ଜଣିଆ ପୀଠରେ ଜଷ୍ଟିସ୍ ବୋବ୍ଡେ ଥିଲେ। ସେହିପରି ସିଜେଆଇ ଜଷ୍ଟିସ୍ ରଞ୍ଜନ ଗୋଗୋଇଙ୍କ ବିରୋଧରେ ପୂର୍ବତନ ମହିଳା କର୍ମଚାରୀ ଆଣିଥିବା ଯୌନ ନିର୍ଯାତନା ଅଭିଯୋଗର ଅନୁଧ୍ୟାନ ପାଇଁ ଜଷ୍ଟିସ୍ ବୋବ୍ଡେଙ୍କ ନେତୃତ୍ୱରେ ୩ ଜଣିଆ ଇନ୍ହାଉସ୍ କମିଟି ଗଠନ କରାଯାଇଥିଲା। ଉକ୍ତ କମିଟିରେ ଜଷ୍ଟିସ୍ ଇନ୍ଦିରା ବାନାର୍ଜୀ ଓ ଇନ୍ଦୁ ମାଲହୋତ୍ରା ସଦସ୍ୟ ଥିଲେ।
