ବାରଙ୍ଗ,୨୭ା୭(ଡି.ଏନ୍.ଏ.): ବାରଙ୍ଗ ବ୍ଲକର ଭୁବନପୁର ଗ୍ରାମବାସୀ ଦୀର୍ଘଦିନ ହେବ ଠିକଭାବେ ବିଦ୍ୟୁତ ସେବା ପାଉନାହାନ୍ତିି। ଏ ନେଇ ବିଭାଗୀୟ ଅଧିକାରୀଙ୍କୁ ଜଣାଇଥିଲେ ମଧ୍ୟ ସମାଧାନ ହେଉ ନ ଥିବା ଅଭିିଯୋଗ ହୋଇଛି। ଏହି ପ୍ରତିବାଦରେ ଗ୍ରାମବାସୀ ଖୁବଶୀଘ୍ର ରାଜରାସ୍ତାକୁ ଓହ୍ଲାଇ ପ୍ରତିବାଦ କରିବେ ବୋଲି ପ୍ରଶାସନକୁ ସର୍ତକ କରାଇଛନ୍ତି। ଏହି ଗ୍ରାମକୁ ଗୁରୁବାର ସନ୍ଧ୍ୟାରୁ ଲାଇନ ନ ଥିବାବେଳେ ଲାଇନମ୍ୟାନଠାରୁ ଆରମ୍ଭ କରି ଜେଇ ପର୍ଯ୍ୟନ୍ତ ଗୁହାରି କରିଥିଲେ ମଧ୍ୟ କେହି ଶୁଣିନାହାନ୍ତି। ଲାଇନମ୍ୟାନକୁ ଜଣାଇବାରୁ ଜେଇ ନ କହିଲେ ମୁଁ ଯିବିନାହିଁ କହୁଥିତ୍ବାବେଳେ ଜେଇ କହୁଛନ୍ତି ମୁଁ କ’ଣ ଲାଇନ ସଜାଡିବି ତୁମେ ଲାଇନମ୍ୟାନ କୁହ ବୋଲି ଗୋଡିସାହି ବିଦ୍ୟୁତ୍ ବିଭାଗ ଗ୍ରାମବାସୀଙ୍କୁ ଭୁଅଁା ବୁଲାଉଛନ୍ତି। ଗ୍ରାମବାସୀ ବିଦ୍ୟୁତ ବ୍ୟବହାର କରୁଛନ୍ତି ସତ ମାତ୍ର ଖରାପ ହେଲେ ମରାମତି ପାଇଁ ଦୀର୍ଘଦିନ ପର୍ଯ୍ୟନ୍ତ ଅପେକ୍ଷା କରିବାକୁ ପଡୁଥିବାରୁ ସେମାନଙ୍କର କ୍ଷୋଭ ରହିଛି। ଏହି ଗ୍ରାମରେ ପ୍ରାୟ ୭୦ଟି ହରିଜନ ଓ ଆଦିବାସୀ ପରିବାର ରହୁଛନ୍ତି। ସମସ୍ତେ ବିପିଏଲ ପରିବାରର ହୋଇଥିବାରୁ ୨୦୦୯ରେ ଗ୍ରାମକୁ ବିଜୁଜ୍ୟୋତି ମାଧ୍ୟମରେ ୬୩କେଭି ଟ୍ରାନ୍ସଫର୍ମର ଗ୍ରାମମୁଣ୍ଡରେ ବସିବା ସହ ଗ୍ରାମବାସୀଙ୍କୁ ଗୋଡିସାହି ବିଦ୍ୟୁତ ବିଭାଗ ପକ୍ଷରୁ ଏହିଠାରୁ ସଂଯୋଗ ଦିଆଯାଇଥିଲା। ଜମିମୂଲ୍ୟ ବୃଦ୍ଧି ସହ ବ୍ୟବସାୟିକ ଦୃଷ୍ଟିରୁ ଗ୍ରାମପାଖରେ କେତେକ ଜମି ବ୍ୟବସାୟୀ ପ୍ଲଟିଂକରି ଜମି ବିକିଥିଲେ। ଏହି ପ୍ଲଟିଂ ଜମିରେ ପ୍ରାୟ ୨୦ରୁ ୨୫ଟି ଲୋକ ଘର କରି ରହିବା ସହ ଏହି ୬୩କେଭି ଟ୍ରାନ୍ସଫର୍ମରରୁ ସେମାନଙ୍କୁ ବିଦ୍ୟୁତ ସଂଯୋଗ ଗୋଡିସାହିି ବିଦ୍ୟୁତ ବିଭାଗ ଦେଇଥିଲେ। ଯାହାକୁ ନେଇ ଗ୍ରାମବାସୀ ଓ ଗୋଡିସାହି ବିଦ୍ୟୁତ ବିଭାଗ ମଧ୍ୟରେ ବିବାଦ ଦେଖାଯାଇଥିଲା। କାରଣ ନୂଆ ଲୋକଙ୍କୁ ଏହି ଟ୍ରାନ୍ସଫର୍ମରୁ ବିଦ୍ୟୁତ ଦେବାରୁ ବିପିଏଲ ପରିବାରଙ୍କ ଘରେ ସନ୍ଧ୍ୟା ସମୟରେ ସମ୍ପୂର୍ଣ୍ଣ ଲୋ-ଭଲଟେଜ ହୋଇଯାଏ। ଏପରିକି ନୂଆକରି ରହିଥିବା ଲୋକମାନଙ୍କ ପାଇଁ ଏକ ଅଲଗା ଟ୍ରାନ୍ସଫର୍ମର ବସାଇବାକୁ ଗ୍ରାମବାସୀ ଦାବି କରୁଥିଲେ ମଧ୍ୟ ତାହା ଅଦ୍ୟାବଧି କାର୍ଯ୍ୟକାରୀ ହୋଇପାରି ନାହିଁ। ଫଳରେ ସରକାରଙ୍କର ଏହି ସୁବିଧାକୁ ଗରିବ ବିପିଏଲଧାରୀ ପାଉଥିଲେ ମଧ୍ୟ ସନ୍ଧ୍ୟାହେବା ମାତ୍ରେ ଡିବିରି ଭଳି ଆଲୁଅ ଜଳୁଛି। ଗୁରୁବାର ସନ୍ଧ୍ୟାରୁ ଟ୍ରାନ୍ସଫର୍ମର ପାଖରୁ ଫେଜ କଟିଯିବାରୁ ସମସ୍ତଙ୍କୁ କହିଥିଲେ ମଧ୍ୟ କେହି ଶୁଣି ନ ଥିଲେ। ଏ ନେଇ ଗ୍ରାମବାସୀ ଶୁକ୍ରବାର ବାରଙ୍ଗ ଥାନାରେ ଅଭିଯୋଗ କରିଥିଲେ ମଧ୍ୟ ଥାନାରୁ ନିରାଶ ହୋଇ ଫେରିବାକୁ ପଡିଛି। ଫଳରେ ଗ୍ରାମରେ ପ୍ରବଳ ଉତ୍ତେଜନା ଦେଖାଦେବା ସହ ନିଜ ହକ ପାଇଁ ଏଥର ରାଜରାସ୍ତାକୁ ଯାଇ ବିରୋଧ କରିବୁ ବୋଲି ଭୁବନପୁର ଗ୍ରାମ୍ୟ କମିଟିର ସଭାପତି ରଞ୍ଜନ କୁମାର ଭଟ ଓ ସମ୍ପାଦକ ତ୍ରିଲୋଚନ ଭୋଇ ଚେତାବନୀ ଦେଇଛନ୍ତି। ଏ ସମ୍ପର୍କରେ ଗୋଡିସାହି ବିଦ୍ୟୁତ ବିଭାଗର ଜେଇ ଭବାନି ଶଙ୍କର ମହନ୍ତ କୁହନ୍ତି, ବାତ୍ୟାପରେ ମନଇଚ୍ଛା ସେହି ଗ୍ରାମବାସୀ ଲାଇନ ଦେବାନବା କରୁଥିଲେ। ଏ ବିଷୟକୁ ନେଇ ଲାଇନମ୍ୟାନ ସହ ଗ୍ରାମବାସୀଙ୍କର ପାଟିତୁଣ୍ଡ ହୋଇଛି। ଏବେ ଯେଉଁ ଫେଜ କଟିଛି ଲାଇନମ୍ୟାନକୁ ମୁଁ ବୁଝାଇଛି ବୋଲି କହିଥିଲେ।
