ବ୍ରହ୍ମପୁର ଅଫିସ, ୨୮ା୫: ଘରୋଇ ବସ୍ ଚଳାଚଳ ସ୍ବାଭାବିକ କରିବା ନେଇ ସରକାରଙ୍କ ପକ୍ଷରୁ ଅନୁମତି ମିଳିବା ପରେ ମଧ୍ୟ ଗୁରୁବାର ବ୍ରହ୍ମପୁରରେ ସ୍ବାଭାବିକ ହୋଇପାରିଲା ନାହିଁ ଘରୋଇ ବସ୍ ଚଳଚଳ। ବସ ସେବା ସ୍ବାଭାବିକ କରିବା ନେଇ ସରକାରଙ୍କ ଅନୁମତି ପରେ ଗୁରୁବାର ସକାଳୁ କିଛି ବସ୍ ବ୍ରହ୍ମପୁର ନୂଆ ବସଷ୍ଟାଣ୍ଡରେ ପହଞ୍ଚିଥିଲା। ମାତ୍ର ଯାତ୍ରୀ ନ ଥିବାରୁ ବସ୍ଗୁଡିକ ବସଷ୍ଟାଣ୍ଡରୁ ନିଜ ଗନ୍ତବ୍ୟ ସ୍ଥଳକୁ ଗଡିପାରିିଲା ନାହିଁ। ମାତ୍ର ଗୋଟିଏ ଘରୋଇ ବସ୍ କମ ଯାତ୍ରୀ ସତ୍ତ୍ବେ ବ୍ରହ୍ମପୁରର ଭୁବନେଶ୍ୱର ଅଭିମୁଖେ ଯାଇଥିବା ସୂଚନା ମିଳିଛି।
ପ୍ରକାଶ ଯେ, କୋଭିଡ-୧୯ ସଂକ୍ରମଣର ପ୍ରତିରୋଧ କରିବା ନେଇ ସାମାଜିକ ଦୂରତା ରକ୍ଷା, ସାନିଟାଇଜର ଓ ମାସ୍କ ବ୍ୟବହାର ନିୟମ ପାଳନ ପୂର୍ବକ ରାଜ୍ୟରେ ଗୁରୁବାରଠାରୁ ବସ୍ ଚଳାଚଳ ସ୍ବାଭାବିକ କରିବା ନେଇ ବୁଧବାର ରାଜ୍ୟ ଘରୋଇ ବସ୍ ମାଲିକ ସଂଘର ସାଧାରଣ ପରିଷଦ ବୈଠକରେ ନିଷ୍ପତ୍ତି ନିଆଯାଇଥିଲା। ଏହି ନିଷ୍ପତ୍ତି ପରେ ଗୁରୁବାର ପୂର୍ବାହ୍ନରେ ଘରୋଇ ବସ୍ ନୂଆ ବସଷ୍ଟାଣ୍ଡରେ ପହଞ୍ଚିଥିଲା। କିନ୍ତୁ ଯାତ୍ରୀ ଆସି ନ ଥିବାରୁ ଗଞ୍ଜାମ ଜିଲା ତଥା ଜିଲାବାହାରକୁ କୌଣସି ବସ ଯାତାୟତ ଆରମ୍ଭ କରିପାରି ନାହିଁ। କେବଳ ୧୧ ଯାତ୍ରୀଙ୍କୁ ନେଇ ୪୧ ସିଟ ବିଶିଷ୍ଟ ଖମ୍ଭେଶ୍ୱରୀ ବସ୍ ବ୍ରହ୍ମପୁରରୁ ଭୁବନେଶ୍ୱର ଅଭିମୁଖେ ଗତିକରିଛି। ଅନ୍ୟପକ୍ଷରେ କୋଭିଡ-୧୯ ସଂକ୍ରମଣ ଭୟ ତଥା ରାଜ୍ୟର ସମସ୍ତ ସ୍ଥାନରେ ସରକାରଙ୍କ ପକ୍ଷରୁ ଆନୁସଙ୍ଗିକ ବ୍ୟବସ୍ଥା ସ୍ବାଭାବିକ ହୋଇପାରି ନ ଥିବାରୁ ଯାତ୍ରୀମାନେ ଅସୁ ନ ଥିବା କହିଛନ୍ତି ଗଞ୍ଜାମ ଜିଲା ଘରୋଇ ବସ୍ ମାଲିକ ସଂଘର ସାଧାରଣ ସମ୍ପାଦକ ସୁବାଷ ଚନ୍ଦ୍ର ପଟ୍ଟନାୟକ। ବର୍ତ୍ତମାନ ବ୍ରହ୍ମପୁରରୁ ଗଞ୍ଜାମ ଜିଲା ତଥା ଜିଲା ବାହାରକୁ ବିଭିନ୍ନ ରୁଟ୍ରେ ଯାତାୟତ କରୁଥିବା ୫୦୦ରୁ ୬୦୦ ବସ୍ ଚଳାଚଳ କରିପାରି ନାହିଁ। ବସ୍ଚଳାଚଳକୁ ସ୍ବାଭାବିକ କରିବା ପାଇଁ ରାଜ୍ୟର ସମସ୍ତ ସ୍ଥାନରେ ଆନୁସଙ୍ଗିକ ବ୍ୟବସ୍ଥାଗୁଡିକୁ ସ୍ବାଭାବିକ କରିବା ସହ ବସ୍ଯାତ୍ରାରେ କୋଭିଡ-୧୯ ସଂକ୍ରମଣ ଭୟ ନ ଥିବା ନେଇ ସରକାର ଘୋଷଣା କରିବା ଆବଶ୍ୟକ। ଯାହାଦ୍ୱାରା ପୁନଃ ବସ୍ ଚଳାଚଳ ସ୍ବାଭାବିକ ହୋଇପାରିବ ବୋଲି ସଂଘର ସାଧାରଣ ସମ୍ପାଦକ କହିଛନ୍ତି।
