ପରଜଙ୍ଗ, ୨୨।୮(ଡି.ଏନ.ଏ.) – ପ୍ରେମ ପ୍ରତାରଣାର ଶିକାର ହୋଇଥିବା ଜଣେ ବିବାହିତା ମହିଳା ସ୍ତ୍ରୀ ମାନ୍ୟତା ଦାବିରେ ତାଲା ଭାଙ୍ଗି ଅଭିଯୁକ୍ତ ପ୍ରେମିକଙ୍କ ଘରେ ପଶିବା ଢେଙ୍କାନାଳ ଜିଲା ପରଜଙ୍ଗ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ଏ ନେଇ ଥାନାରେ ବିଧିବଦ୍ଧ ଭାବେ ଅଭିଯୋଗ ହେବା ପରେ ପୋଲିସ ତଦନ୍ତ ଆରମ୍ଭ କରିଛି।
ଅଭିଯୋଗ ଅନୁଯାୟୀ, ଲୋଧଣୀ ଗ୍ରାମର ଜିତୁ ସାହୁ ଏବଂ ସମ୍ପୃକ୍ତ ଯୁବତୀଙ୍କ ମଧ୍ୟରେ ୫ବର୍ଷ ହେଲା ପ୍ରେମ ସମ୍ପର୍କ ଥିଲା। ହେଲେ ଗତ ଜୁନ୍ ୨୯ରେ ଯୁବତୀଙ୍କ ବିବାହ ଅନ୍ୟତ୍ର ହୋଇଯାଇଥିଲା। ବିବାହର ପଞ୍ଚମ ଦିନ ସମ୍ପୃକ୍ତ ଯୁବତୀ ଶାଶୁଘରୁ ଜିତୁଙ୍କ ସହ ଫେରାର ହୋଇଯାଇଥିଲେ। ଏହାପରେ ଉଭୟେ ଜଣେ ସମ୍ପର୍କୀୟ ଘରକୁ ପଳାଇଥିଲେ। ପ୍ରେମିକାଙ୍କୁ ସେଠାରେ ଛାଡ଼ି ଜିତୁ ଗ୍ରାମକୁ ପଳାଇ ଆସି ଘଟଣା ବିଷୟରେ କିଛି ଜାଣି ନ ଥିବା ଅଭିନୟ କରିଥିଲେ। ଏହାର କିଛିଦିନ ପରେ ପ୍ରେମିକାଙ୍କୁ ଧରି ହାଇଦ୍ରାବାଦ ପଳାଇଥିଲେ। ସେଠାରେ ମାସେ ରହିବା ପରେ ପୁଣି ସମ୍ପର୍କୀୟଙ୍କ ଘରକୁ ଆସିଥିଲେ। କିଛିଦିନ ରହିବା ପରେ ଭୁବନେଶ୍ୱରରେ ବିବାହ କରିବାକୁ କହି ପ୍ରେମିକାଙ୍କୁ ଧରି ଚାଲିଯାଇଥିଲେ। ହେଲେ ମନ୍ଦିର ପାଖରେ ଛାଡ଼ିଦେଇ ଜିତୁ ଫେରାର ହୋଇଯାଇଥିବା ପୀଡ଼ିତା ଅଭିଯୋଗ କରିଛନ୍ତି। ଜିତୁଙ୍କୁ ନ ପାଇ ଯୁବତୀ ଜଣକ ଘରକୁ ଫେରି ଘଟଣା ସମ୍ପର୍କରେ ପରିବାର ଲୋକଙ୍କୁ ଅବଗତ କରାଇଥିଲେ। ଏହାପରେ ଅଗଷ୍ଟ ୧୭ରେ ସେ ବିଧିବଦ୍ଧ ଭାବେ ଥାନାରେ ଲିଖିତ ଅଭିଯୋଗ କରିଛନ୍ତି।
