ମୁମ୍ବାଇ,୧୦ା୭ (ଆଇଏଏନ୍ଏସ୍): ଦୁର୍ନୀତି ବିରୋଧରେ ମୁହଁଖୋଲୁଥିବା ସାମାଜିକ କର୍ମୀ ଆନ୍ନା ହାଜାରେଙ୍କୁ ମାରିବା ଲାଗି ଠିକା ଦିଆଯାଇଥିଲା। ଏନେଇ ସେ ମଙ୍ଗଳବାର ସ୍ବତନ୍ତ୍ର ସିବିଆଇ କୋର୍ଟରେ ମୁହଁଖୋଲି କହିଛନ୍ତି। ଓସ୍ମାନାବାଦ୍ ତେର୍ନା ଚିନିକଳ ଦୁର୍ନୀତି ସମ୍ପର୍କରେ ମୁହଁ ଖୋଲିଲେ ତାଙ୍କୁ ହତ୍ୟା କରାଯିବ ବୋଲି ଧମକ ଦିଆଯାଇଥିଲା। କଂଗ୍ରେସ ନେତା ପଓ୍ବନ ରାଜେ ନିମ୍ବଲକର୍ ହତ୍ୟା ମାମଲାରେ ସାକ୍ଷୀଭାବେ କୋର୍ଟରେ ହାଜର ହୋଇଥିବା ଆନ୍ନା ଏଭଳି ମତ ରଖିଛନ୍ତି। ସ୍ବତନ୍ତ୍ର ବିଚାରପତି ଆନନ୍ଦ ୟାଭଲ୍କରଙ୍କ ଆଗରେ ଆନ୍ନା କହିଛନ୍ତି, ମିଡିିଆରୁ ଧମକ ସମ୍ପର୍କରେ ଜାଣିବା ପରେ ସେ ଅହମଦାବାଦର ପାର୍ନର ପୋଲିସ ଷ୍ଟେଶନରେ ମାମଲା ଦାଏର କରିଥିଲେ। ୨୦୦୬ ନିମ୍ବଲକର ହତ୍ୟା ମାମଲାର ମୁଖ୍ୟ ଅଭିଯୁକ୍ତ ତଥା ଏନ୍ସିପି ନେତା ପଦମ୍ସିଂ ପାଟିଲଙ୍କ ଓସ୍ମାନାବାଦସ୍ଥିତ ତେର୍ନା ଚିନିକଳ ସହ ସମ୍ପର୍କ ରହିଛି। ଏବେ ସେ ତେର୍ନା ପବ୍ଲିକ ଚାରିଟେବଲ ଟ୍ରଷ୍ଟର ସଭାପତି ଅଛନ୍ତି। ମାମଲା ରୁଜୁ ହେବା ପୂର୍ବରୁ ପ୍ରଧାନମନ୍ତ୍ରୀ ଓ ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କୁ ତାଙ୍କ ଜୀବନ ପ୍ରତି ବିପଦ ରହିଥିବା ହାଜାରେ କହିଥିଲେ ବୋଲି ପ୍ରକାଶ କରିଛନ୍ତି।
