ବଅଁରପାଳ,୧୧।୫(ଡି.ଏନ.ଏ.)- ମାତ୍ର ୮ ଦିନ ତଳେ ବିବାହ କରିଥିଲେ। ନୂଆ ଘର, ବରକୁ ନେଇ କେତେ କ’ଣ ସ୍ବପ୍ନ ଦେଖିଥିଲେ। ହେଲେ ୮ ଦିନରେ ସରିଗଲା ସଂସାର। ସୁଖ ଦୁଃଖର ଦୁନିଆକୁ ସାଥିରେ ନେଇ ଚାଲିବା ଆଗରୁ ଦୁନିଆ ଛାଡ଼ିଦେଲେ ଜଣେ ନବବଧୂ। ଅନୁଗୋଳ ଜିଲା ନାଲ୍କୋ ଥାନା କାଣ୍ଡସର ଗ୍ରାମରେ ଶୁକ୍ରବାର ଘଟିଛି ଏପରି ଏକ ଅଭାବନୀୟ ଘଟଣା। ଗଁାର ଏକ ଭଡ଼ା ଘରୁ ରାତିରେ ପୋଲିସ ନବବଧୂ ଜିନାରାଣୀ ପ୍ରଧାନ(୨୫)ଙ୍କ ଝୁଲନ୍ତା ମୃତଦେହ ଉଦ୍ଧାର କରିଛି। ତେବେ ମୃତ୍ୟୁର କାରଣ ଜଣାପଡ଼ି ନ ଥିଲେ ବି ସ୍ବାମୀଙ୍କ ସହ ମନାନ୍ତରରୁ ସେ ଆତ୍ମହତ୍ୟା କରିଥିବା ସାଧାରଣରେ ସନ୍ଦେହ କରାଯାଉଛି।
ପୋଲିସ କହିଛି, ବଅଁରପାଳ ଥାନା ତୁଳସୀପାଳ ଗ୍ରାମର ଧର୍ମେନ୍ଦ୍ର ସାହୁ ନାଲ୍କୋରେ ଠିକା ଶ୍ରମିକ ଭାବେ କାର୍ଯ୍ୟ କରନ୍ତି। ଗତ ୨ ତାରିଖରେ ସେ ତାଳଚେର ଅଞ୍ଚଳର ଜିନାରାଣୀଙ୍କୁ କୋର୍ଟରେ ବିବାହ କରିଥିଲେ। ପରେ ନବଦମ୍ପତି କାଣ୍ଡସରସ୍ଥିତ ଏକ ଭଡା ଘରେ ରହୁଥିଲେ। ଶୁକ୍ରବାର ମଧ୍ୟାହ୍ନରେ ଧର୍ମେନ୍ଦ୍ର ଘରକୁ ଆସି କବାଟ ବାଡେଇଥିଲେ। ହେଲେ ଭିତରୁ କେହି କବାଟ ନ ଖୋଲିବାରୁ ସେ କେଉଁଆଡ଼େ ଚାଲିଯାଇଥିଲେ। ପରେ ପଡ଼ୋଶୀମାନେ ଘର ଭିତରେ ଜିନାରାଣୀଙ୍କ ମୃତଦେହ ଝୁଲୁଥିବା ଦେଖି ପୋଲିସକୁ ସୂଚନା ଦେଇଥିଲେ। ଖବରପାଇ ମାଜିଷ୍ଟ୍ରେଟ ଜିତେନ୍ଦ୍ର ସାହୁ ଓ ପୋଲିସ ଘଟଣାସ୍ଥଳରେ ପହଞ୍ଚି କବାଟ ଭାଙ୍ଗିବା ପରେ ମୃତଦେହ ଝୁଲୁଥିବା ଦେଖିଥିଲେ। ମୃତ ଜିନାରାଣୀଙ୍କ ସ୍ବାମୀ ଧର୍ମେନ୍ଦ୍ର ଆସିବା ପରେ ଶନିବାର ମୃତଦେହ ଉଦ୍ଧାର କରାଯାଇ ବ୍ୟବଚ୍ଛେଦ କରାଯିବ ବୋଲି ପୋଲିସ ସୂଚନା ଦେଇଛି। ଖବରପାଇ ଜିନାରାଣୀଙ୍କ ଭାଇ ଘଟଣାସ୍ଥଳରେ ପହଞ୍ଚିଛନ୍ତି।
