ନୂଆଦିଲ୍ଲୀ,୨୫।୫: ଗତ କିଛିଦିନ ତଳେ ଫେସ୍ବୁକ୍ର ମାର୍କ ଜୁକରବର୍ଗ ବେଶ୍ ଚର୍ଚ୍ଚାରେ ରହିଥିଲେ। ମୁକେଶ ଅମ୍ବାନୀଙ୍କ ଜିଓ ପ୍ଲାଟ୍ଫର୍ମରେ ୪୪ ହଜାର କୋଟି ଟଙ୍କା ନିବେଶ ଦ୍ୱାରା ସେ ୧୦% ଅଂଶଧନ ହାସଲ କରିଛନ୍ତି। ବ୍ଲୁମ୍ବର୍ଗର ଏକ ରିପୋର୍ଟ ମୁତାବକ ଗତ ୨ ମାସରେ ଜୁକରବର୍ଗଙ୍କ ସମ୍ପତ୍ତି ଗତ ୨ ମାସରେ ୩୦ ବିଲିୟନ ଡଲାର ବଢିଛି। ଫଳରେ ତାଙ୍କ ସମ୍ପତ୍ତି ପ୍ରାୟ ୮୭.୫ ବିଲିୟନ ଡଲାର ଛୁଇଁଛି। ମାର୍ଚ୍ଚ ମଧ୍ୟଭାଗରେ ତାଙ୍କ ସମ୍ପତ୍ତି ୫୭.୫ ବିଲିୟନ ଡଲାର ରହିଥିଲା। ଏଭଳି ସମ୍ପତ୍ତି ବଢ଼ିବା ଯୋଗୁ ସଦ୍ୟତମ ର଼୍ୟାଙ୍କିଙ୍ଗ୍ ମୁତାବକ ସେ ବିଶ୍ୱର ୩ ନମ୍ବର ସବୁଠାରୁ ଅଧିକ ଧନଶାଳୀ ବ୍ୟକ୍ତି ଭାବେ ବିବେଚିତ ହୋଇଛନ୍ତି। ଓ୍ବର୍କସାୟାର ହାଥାଓ୍ବେର ଚେୟାରମ୍ୟାନ ଓ୍ବାରେନ ବଫେଟଙ୍କୁ ସେ ବର୍ତ୍ତମାନ ପଛରେ ପକାଇ ଦେଇଛନ୍ତି। ଏକ ଗଣମାଧ୍ୟମ ରିପୋର୍ଟ ମୁତାବକ ଫେସ୍ବୁକ୍ ବର୍ତ୍ତମାନ ନିଜର ଅନ୍ଲାଇନ ଶପିଂ ଫିଚର ଶପ୍ସର ଶୁଭାରମ୍ଭ କରିଛି। ଏହା ଯୋଗୁ କମ୍ପାନୀର ଶେୟାର ଉଚ୍ଚ ସ୍ତରରେ ପହଞ୍ଚିଛି। ଫେସ୍ବୁକର ଗୋଟିଏ ଶେୟାର ମୂଲ୍ୟ ୨୩୦ ଡଲାରରେ ପହଞ୍ଚିଛି। ବର୍ତ୍ତମାନ ଓ୍ବାର୍କଫ୍ରମ ହୋମ୍ ଚାହିଦା ବଢିଛି। ଫଳରେ ଲୋକଙ୍କ ମଧ୍ୟରେ ଭିଡିଓ କଲିଂ ଆପ୍ ଜୁମ୍ ଲୋକପ୍ରିୟ ହୋଇଛି। ଜୁମ୍କୁ ଟକ୍କରଦେବା ଲାଗି କମ୍ପାନୀ ନିକଟରେ ମେସେଞ୍ଜର ରୁମ୍ସ ଫିଚର ଆଣିଛି। ଏହାଦ୍ୱାରା ୫୦ ଲୋକ ଭିଡିଓକଲିଂର ସୁବିଧା ପାଇପାରିବେ।
