ପ୍ୟାରିସ୍,୧୪।୩: ବିଭିନ୍ନ ଲୋକଙ୍କର ଭିନ୍ନ ଭିନ୍ନ ଖାଇବା ଶୈଳୀ ରହିଥାଏ। ଫ୍ରାନ୍ସ୍ର ଜଣେ ବ୍ୟକ୍ତି ୨ ବର୍ଷ ମଧ୍ୟରେ ଏକ ବଡ଼ ଏରୋପ୍ଲେନ୍କୁ ଖଣ୍ଡ ଖଣ୍ଡ କରି ଖାଇଦେଇଥିଲେ। ଏଭଳି ନିଆରା ଖାଦ୍ୟ ଶୈଳୀ ଥିବା ବ୍ୟକ୍ତି ଥିଲେ ମିଚେଲ ଲୋଟିଟୋ। ଏଭଳି କରି ସେ ଗିନିଜ୍ ରେକର୍ଡ ବୁକ୍ରେ ସ୍ଥାନ ପାଇଥିଲେ। ୧୯୫୦ ଜୁନ୍ ୧୫ରେ ତାଙ୍କର ଜନ୍ମ ସ୍ଥାନୀୟ ଗ୍ରେନୋବଲଠାରେ ହୋଇଥିଲା। ୧୬ ବର୍ଷ ବୟସରୁ ବିଭିନ୍ନ ମେଟାଲରେ ନିର୍ମିତ ଜିନିଷ ଖାଇବା ସେ ଆରମ୍ଭ କରିଥିଲେ। ପ୍ରକୃତରେ ମିଚେଲଙ୍କୁ ଏକ ପ୍ରକାର ରୋଗ ହୋଇଥିବାରୁ ସେ ଏଭଳି କରୁଥିବା ଡାକ୍ତର କହୁଥିଲେ। ଏହାକୁ ଡାକ୍ତରୀ ଭାଷାରେ ପିକା କୁହାଯାଇଥାଏ। ରୋଗ ଯୋଗୁ ମିଚେଲ ନିଜ ନଖଠାରୁ ଆରମ୍ଭ କରି କାଚ ଟୁକୁଡ଼ା ମଧ୍ୟ ସହଜରେ ଖାଇପାରୁଥିଲେ। ଏସବୁ ସହଜରେ ହଜମ ବି ହେଉଥିଲା। ମାତ୍ର ସାଧାରଣ ମଣିଷଙ୍କ ଉପଯୋଗୀ ଖାଦ୍ୟ ସେ ହଜମ କରି ପାରୁ ନ ଥିଲେ। ୧୯୬୬ରେ ସେ ନିଜ ଅଜବ ଖାଦ୍ୟ ଶୈଳୀର ପ୍ରଦର୍ଶନ ମଧ୍ୟ କରିଥିଲେ । ୧୯୭୮ରେ ସେ ସୈନ୍ୟବାହିନୀର ୧୫୦-ହଓ୍ବାର୍ଡ ବିମାନକୁ ଖାଇବା ଆରମ୍ଭ କରିଥିଲେ। ୧୯୮୦ ବେଳକୁ ବିମାନଟି ଶେଷ ହୋଇଯାଇଥିଲା। ୧୯୫୯ଠାରୁ ୧୯୯୭ ମଧ୍ୟରେ ମିଚେଲ ୮୧୬୪ କିଲୋଗ୍ରାମ୍ ମେଟାଲ ଖାଇଦେଇଥିଲେ। ୨୦୦୭ ଜୁନ୍ ୨୫ରେ ୫୭ ବର୍ଷ ବୟସରେ ମିଚେଲଙ୍କର ମୃତ୍ୟୁ ଘଟିଥିଲା।
