ବଇଣ୍ଡା,୨୪।୧୧: ଟିଏ ପଟେ ବୁଡ଼ି ଯାଉଥିବା କଳା, ସଂସ୍କୃତିକୁ ଉଜ୍ଜୀବିତ କରିବାକୁ ପ୍ରୟାସ ତ ଅନ୍ୟପଟେ ଧାର୍ମିକ ଭାବନା ବା ମାନସିକ ପୂରଣ ପାଇଁ ଚାଲିଛି ପ୍ରଚେଷ୍ଟା। ଏମିତି ବର୍ଷ ପରେ ବର୍ଷ ୨୯ ବର୍ଷ ଧରି ପାଲା ପରିବେଷଣ କରିଆସୁଛନ୍ତି ଅନୁଗୋଳ ଜିଲା କିଶୋରନଗର ବ୍ଲକ ନୁନୁକାପଶି ବଇଣ୍ଡା ଗ୍ରାମର ଜଗତ ମୋହନ ମିଶ୍ର।
ଜଗତ ମୋହନ କହିଛନ୍ତି, ୧୯୮୬ରେ ସେ ବିବାହ କରିଥିଲେ। ୪ ବର୍ଷ ବିତିଯିବା ପରେ ବି ପିଲାଟିଏ ନ ହେବାରୁ ସେ ଚିନ୍ତିତ ହୋଇପଡ଼ିଥିଲେ। ପୁଅଟିଏ ହେଲେ ଆଜୀବନ ପାଲା ପରିବେଷଣ କରିବେ ବୋଲି ପ୍ରଭୁ ସତ୍ୟନାରାୟଣଙ୍କ ନିକଟରେ ମାନସିକ କରିଥିଲେ। ଈଶ୍ୱରଙ୍କ କୃପାରୁ ୧୯୯୧ରେ ତାଙ୍କୁ ପୁତ୍ର ସନ୍ତାନଟିଏ ପ୍ରାପ୍ତ ହେଲା। ତେଣୁ ଠାକୁରଙ୍କ ନିକଟରେ କରିଥିବା ମାନସିକ ପୂରଣ ପାଇଁ ସେ ପାଲା ପରିବେଷଣ କ୍ଷେତ୍ରରେ ପାଦ ଦେଲେ। ଗୁରୁ ନବୀନ କୁମାର ରଥଙ୍କଠାରୁ ଶିକ୍ଷା ନେଇ ସେ ୫ଜଣ ସାଥୀଙ୍କୁ ଧରି ପାଲା ଗାୟନ ଆରମ୍ଭ କଲେ। ବର୍ଷକୁ ୧୦୦ରୁ ଅଧିକ ପାଲା ପରିବେଷଣ କରୁଛନ୍ତି। ପାରିଶ୍ରମିକ ବାବଦରେ କଳାକାର ପିଛା ମାତ୍ର ୪ରୁ ୫ଶହ ଟଙ୍କା ପାରିଶ୍ରମିକ ମିଳୁଥିବାରୁ ପରିବାର ଚଳାଇବା ବଡ଼ କଷ୍ଟକର ହେଉଛି। ତଥାପି ଏହାକୁ ନେଇ ସେ କେବେ ନିରାଶ ହୋଇନାହାନ୍ତି କି କାର୍ଯ୍ୟ ପ୍ରତି ବିମୁଖ ଭାବ ପ୍ରକଟ କରିନାହାନ୍ତି। କାରଣ ଈଶ୍ୱରଙ୍କ ଆଶୀର୍ବାଦ ତାଙ୍କ ସହ ପରିବାର ଉପରେ ଥିବାରୁ ସେ ମାନସିକ ପୂରଣ କରିବାକୁ ଜିଇଁଥିବା ଯାଏ ସତ୍ୟନାରାୟଙ୍କ ପାଲା ଗାନ କରି ଚାଲିଥିବେ। ଏହାଛଡ଼ା ସାମାଜିକ, ଧାର୍ମିକ ସଚେତନତା ସୃଷ୍ଟିରେ ପାଲାର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ହେଲେ ଏହି କଳା, ସଂସ୍କୃତି ଧୀରେ ଧୀରେ ତା’ର ଦିଗ ହରାଉଥିବାରୁ ତାହାକୁ ବଞ୍ଚାଇ ରଖିବା ନିମନ୍ତେ ତାଙ୍କ ଉଦ୍ୟମ ଫଳପ୍ରସୂ ହେଉ ବୋଲି ସେ ଚାହାନ୍ତି। କିଶୋରନଗର ବ୍ଲକ ଅଞ୍ଚଳରେ ସେ ପାଲା ପରିବେଷଣ କରି ୨୧ଟି ପୁରସ୍କାର ପାଇଛନ୍ତି। ଏହାଛଡ଼ା ଜିଲାରୁ ୨୨ଟି ଶେଷ୍ଠ ପୁରସ୍କାର ତାଙ୍କୁ ମିଳିଛି। ଗ୍ରାମାଞ୍ଚଳରେ ସରକାରଙ୍କ ପକ୍ଷରୁ ବିଭିନ୍ନ ଯୋଜନାର ପ୍ରଚାର ପ୍ରସାର କରାଯାଉଥିବା ବେଳେ ତାଙ୍କ ସାଥୀଙ୍କୁ ଏପରି କିଛି କାର୍ଯ୍ୟ ଦିଆଯାଇଛି। କିନ୍ତୁ କଳାକାରଟିଏ ବଞ୍ଚିବା ପାଇଁ ସେଥିରୁ ମିଳୁଥିବା ପ୍ରାପ୍ୟ ପର୍ଯ୍ୟାପ୍ତ ହେଉନାହିଁ। ଏ ଦିଗରେ ସରକାର ଦୃଷ୍ଟି ଦେବା ସହ କଳାକାରଙ୍କ ଉନ୍ନତି ପାଇଁ ଅଧିକ ଯୋଜନା କଲେ ତାଙ୍କ ପରି ଅନ୍ୟମାନେ ଉପକୃତ ହେବା ସହ କଳା, ସଂସ୍କୃତିକୁ ଅବକ୍ଷୟ ମୁହଁରୁ ଫେରାଇ ଅଣାଯାଇପାରିବ ବୋଲି ଜଗତମୋହନ ପ୍ରକାଶ କରିଛନ୍ତି।
ପରିକ୍ଷିତ ସାହୁ
