ନୂଆଦିଲ୍ଲୀ,୨୨ା୬ : କେରଳର ଏର୍ନାକୁଲମ୍ ଜିଲାର ଏକ ବନ୍ଦରରୁ ଯାତ୍ରାରମ୍ଭ କରିଥିବା ଏକ ଯାତ୍ରୀବାହୀ ଜାହାଜ ନିଖୋଜ ହୋଇଯାଇଛି। ଏଥିରେ ୨୪୩ ଯାତ୍ରୀ ଥିଲେ। ପ୍ରଶାନ୍ତ ମହାସାଗରୀୟ ଅଞ୍ଚଳରେ ଏହା ନିଖୋଜ ହୋଇଯାଇଥିବା ଅନୁମାନ କରାଯାଉଛି। କେରଳ ସରକାରଙ୍କଠାରୁ ସୂଚନା ପାଇବା ପରେ ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ଏନେଇ ସତର୍କ କରାଯିବା ସହ ନିଖୋଜ ଜାହାଜର ସନ୍ଧାନ ଲାଗି ପ୍ରଶାନ୍ତ ମହାସାଗରୀୟ ଦେଶଗୁଡ଼ିକୁ ଅନୁରୋଧ କରାଯାଇଛି। ଗତ ଜାନୁୟାରୀ ୧୨ରୁ ଏହି ଜାହାଜ ନିଖୋଜ ହୋଇଥିବାବେଳେ ଏପର୍ଯ୍ୟନ୍ତ ଏହାର କୌଣସି ଖୋଜଖବର ମିଳିନାହିଁ।
ମନ୍ତ୍ରଣାଳୟର ମୁଖପାତ୍ର ରବୀଶ କୁମାର କହିଛନ୍ତି ଯେ, ୫ ମାସ ତଳର ଏହି ଘଟଣା ସମ୍ପର୍କରେ ପ୍ରଶାନ୍ତ ମହାସାଗରୀୟ ଦେଶଗୁଡ଼ିକୁ ଅବଗତ କରାଯାଇଛି। ନିଖୋଜ ଜାହାଜ ‘ଦେବା ମାଥା ୨’ ସମ୍ପର୍କରେ ଏପର୍ଯ୍ୟନ୍ତ କୌଣସି ସୂଚନା ମିଳିନାହିଁ। ଜାହାଜରେ ଥିବା ଯାତ୍ରୀଙ୍କ ପରିବାରବର୍ଗ ଏନେଇ ବହିର୍ବ୍ୟାପାର ମନ୍ତ୍ରଣାଳୟକୁ ଏକ ଯୁଗ୍ମ ଚିଠି ପ୍ରଦାନ କରି ସହାୟତା ଲୋଡ଼ିଥିବା କୁହାଯାଇଛି।
