ବାଲେଶ୍ୱର ଅଫିସ,୧୪।୯-ଦାରିଦ୍ର୍ୟର ତାଡନା ସହି ନ ପାରି ଏକ ଦମ୍ପତି ତାଙ୍କ ୭ଦିନର ପୁଅକୁ ୨୦ହଜାର ଟଙ୍କାରେ ବିକ୍ରି କରିଦେବା ଘଟଣା ବାଲେଶ୍ୱର ଜିଲା ଦରଘାପଡିଆ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ମୂଲମଜୁରି ଲାଗୁଥିବା ଅସହାୟ ପିତା ଓ ପର ଘରେ ବାସନ ମାଜୁଥିବା ମା’ ପିଲାକୁ ଲାଳନପାଳନ କରିବାରେ ଅସମର୍ଥ ହୋଇ ଏପରି କରିଥିବା କହିଛନ୍ତି।
ଦରଘାପଡ଼ିଆ ଅଞ୍ଚଳର ଏକ ଦମ୍ପତି(ସେକ୍ ପୀରୁ ଖଁା, ସ୍ତ୍ରୀ ହୁଶେନ ବିବି) ଙ୍କର ମୋଟ ୭ଟି ସନ୍ତାନ। ପୂର୍ବରୁ ଥିବା ୬ ସନ୍ତାନଙ୍କୁ ଚଳାଇବା ଉଭୟଙ୍କ ପକ୍ଷେ କଷ୍ଟକର ଥିଲା। ସେଥିମଧ୍ୟରୁ ୨ ପୁତ୍ର ସନ୍ତାନଙ୍କୁ ସେମାନେ ତାଙ୍କ ସମ୍ପର୍କୀୟଙ୍କୁ ଦେଇ ସାରିଛନ୍ତି। ଏବେ ପୁଣି ଏକ ସନ୍ତାନ ଜନ୍ମ ହେବାରୁ ଉଭୟେ ମାନସିକ ଚିନ୍ତାରେ ଥିଲେ। ସେମାନେ ଏହି ସପ୍ତମ ସନ୍ତାନକୁ ବିକ୍ରି କରିଦେବାକୁ ମନସ୍ଥ କରିଥିଲେ। ଶୁକ୍ରବାର ଅପରାହ୍ନରେ ଏହି ଦମ୍ପତି ତାଙ୍କର ୭ ଦିନର ପୁଅକୁ ଫୁଲବଜାର ଅଞ୍ଚଳର ଜଣେ ବ୍ୟକ୍ତିଙ୍କୁ ବିକି ଦେଇଥିଲେ। ଉକ୍ତ ବ୍ୟକ୍ତି ୨୦ହଜାର ଟଙ୍କା ଦେଇ ପିଲାକୁ ନେବା ସହ କାଗଜପତ୍ରରେ ଦସ୍ତଖତ ମଧ୍ୟ କରାଇ ନେଇଥିବା ସମ୍ପୃକ୍ତ ମହିଳା କହିଛନ୍ତି। ସରକାରୀ ସହାୟତା ମିଳିଲେ ସେ ପୁଅକୁ ଫେରାଇ ଆଣିବେ ବୋଲି ଗଣମାଧ୍ୟମ ପ୍ରତିନିଧିଙ୍କ ନିକଟରେ କହିଛନ୍ତି।
ଏ ସମ୍ପର୍କରେ ଟାଉନ ଥାନାଧିକାରିଣୀ ସରୋଜିନୀ ନାୟକ କହିଛନ୍ତି ଯେ, ଥାନାରେ ଏଭଳି କୌଣସି ଅଭିଯୋଗ ହୋଇନାହଁି। ଜିଲା ଶିଶୁ ମଙ୍ଗଳ ସୁରକ୍ଷା ଅଧିକାରୀ ଯୁବକ ମାଝିଙ୍କୁ ଯୋଗାଯୋଗ କରାଯିବାରୁ ସେ କହିଛନ୍ତି ଯେ, ମୋ ପାଖରେ ଏ ସମ୍ପର୍କିତ କିଛି ତଥ୍ୟ ନାହିଁ। ତଦନ୍ତ ପରେ ଯାହା ପଦକ୍ଷେପ ନିଆଯିବ। ଉପଜିଲାପାଳ ନୀଲୁ ମହାପାତ୍ର କହିଛନ୍ତି, ଘଟଣା ସମ୍ପର୍କରେ ଅବଗତ ନ ଥିଲେ। ସଙ୍ଗେ ସଙ୍ଗେ ଏହାର ତଦନ୍ତ କରିବା ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯିବ।
