ଖୋର୍ଦ୍ଧା ଅଫିସ,୨୯ା୩ : କରୋନା ଭୂତାଣୁ ସଂକ୍ରମଣ ଲାଗି ସାରା ଲକ୍ଡାଉନ ହୋଇଛିି। ଏହାର ପ୍ରଭାବରେ ଅସହାୟ, ଗରିବ, ଖଟିଖିଆ, ବୃଦ୍ଧାବୃଦ୍ଧା ବିଶେଷ ପ୍ରଭାବିତ ହୋଇଛନ୍ତି। ଭୋକ ଉପାସରେ ଦିନ କାଟୁଥିବାରୁ ଏମାନଙ୍କ ଲାଗି ଆଗେଇ ଆସିଛନ୍ତି ଖୋର୍ଦ୍ଧା ବିକାଶ ପରିଷଦ, ପୌର ପ୍ରଶାସନ ଏବଂ ସ୍ଥାନୀୟ ସ୍ବେଚ୍ଛାସେବୀ। ରବିବାର ଏହି ଅଭିଯାନ ଆରମ୍ଭ ହୋଇଥିବାବେଳେ ପ୍ରାୟ ୨ଶହ ଗରିବ ଲୋକଙ୍କୁ ରନ୍ଧାଖାଦ୍ୟ ଯୋଗାଇ ଦିଆଯାଇଛି। ପ୍ରଥମ ଦିନରେ ପରିଷଦର କର୍ମକର୍ତ୍ତାମାନେ ଡମ ସାହି, ଭାଲିଆବାଡି, ଟାଉନ ହଲ ସମେତ ବସ୍ତି ଅଞ୍ଚଳ ବୁଲି ରନ୍ଧା ଖାଦ୍ୟ ପ୍ରଦାନ କରୁଛନ୍ତି। ଖୋର୍ଦ୍ଧା ଆରକ୍ଷୀ ଅଧୀକ୍ଷକ ଅଜୟ ପ୍ରତାପ ସ୍ବାଇଁ, ଏସଡିପିଓ ସୁଶୀଲ କୁମାର ମିଶ୍ର ପ୍ରମୁଖ ଉପସ୍ଥିତ ରହି ଏହି ଅଭିଯାର ଶୁଭାରମ୍ଭ କରିଥିଲେ। ସେହିପରି ପୌର ପ୍ରଶାସନ ପକ୍ଷରୁ ମଧ୍ୟ ସହରରେ ଚିହ୍ନଟ କରାଯାଇଥିବା ବୃଦ୍ଧାବୃଦ୍ଧଙ୍କୁ ରନ୍ଧା ଖାଦ୍ୟ ପ୍ରଦାନ କରାଯାଉଛି ବୋଲି କାର୍ଯ୍ୟନିର୍ବାହୀ ଅଧିକାରୀ ଶ୍ୱେତପଦ୍ମା ଶତପଥୀ କହିଛନ୍ତି। ସେହିପରି ପରିବେଶପ୍ରେମୀ ଧନେଶ୍ୱର ବହିଦାର ରାସ୍ତାକଡ଼ରେ ବୁଲା ଗୋରୁ, କୁକୁରଙ୍କୁ ଶୁଖିଲା ଖାଦ୍ୟ, ପାଣି ପ୍ରଦାନ କରୁଛନ୍ତି। ପରିଷଦ ପକ୍ଷରୁ ଏହି ଅଭିଯାନରେ ସାମାଜିକ କର୍ମୀ ଶକ୍ତିଶଙ୍କର ମିଶ୍ର, ଦୟାନିଧି ରାଉତ, ନିକୁଞ୍ଜ ପଟ୍ଟନାୟକ, ମିହିର ବିଧାର, ମନ୍ମଥ ମିଶ୍ର ପ୍ରମୁଖ ସାମିଲ ହୋଇଛନ୍ତି।
