ନୂଆଦିଲ୍ଲୀ,୧୨।୧(ପି.ଟି.)- ୨୦୧୯ରେ ଭାରତ ଶୁଟିଂରେ ଜବରଦସ୍ତ ପ୍ରଦର୍ଶନ କରିଛ। ଫଳରେ ବିଶ୍ୱର ୧ ନମ୍ବର ଶୁଟିଂ ଦେଶ ଭାବେ ଭାରତ ୨୦୧୯ ବର୍ଷ ଶେଷ କରିଛି। ଏହି କ୍ରମରେ ସେ ଅଲିମ୍ପିକ୍ ହେଭିଓ୍ବେଟ୍ ଚାଇନା ଓ ଆମେରିକାକୁ ମଧ୍ୟ ଭାରତ ପଛରେ ପକାଇଛି।
ପଦକ ହାସଲରେ ଭାରତ ସର୍ବାଗ୍ରେ ରହିଛି। ଭାରତ ମୋଟ ଉପରେ ଏହି ବର୍ଷ ୨୧ଟି ସ୍ବର୍ଣ୍ଣ, ୬ ରୌପ୍ୟ ଓ ୩ଟି ବ୍ରୋଞ୍ଜ୍ ପଦକ ହାସଲ କରି ରାଇଫଲ- ପିସ୍ତଲ ବିଶ୍ୱକପ୍ ଓ ଫାଇନାଲ୍ସରେ ଶୀର୍ଷ ସ୍ଥାନ ଅଧିକାର କରିଥିଲା। ଗତବର୍ଷ ଭାରତ ପ୍ରକୃତରେ ଶ୍ରେଷ୍ଠ ପ୍ରଦର୍ଶନ କରିଥିଲା। ଏ ନେଇ ରାଇଫଲ ଆସୋସିଏଶନ ଅଫ୍ ଇଣ୍ଡିଆ (ଏନ୍ଆରଏଆଇ) ଅଧ୍ୟକ୍ଷ ରନିନ୍ଦର ସିଂ ଖୁସି ଜାହିର କରିଛନ୍ତି। ସେ ଅନ୍ତର୍ଜାତୀୟ ଶୁଟିଂ ଫେଡେରେଶନ (ଆଇଏସ୍ଏସ୍ଏଫ୍)ର ୨୦୧୯ ଓଭରଅଲ ର଼୍ୟାଙ୍କିଙ୍ଗ୍ ତାଲିକାକୁ ସ୍କ୍ରିନ୍ ଶଟ୍ କରି ସେ ଟୁଇଟ୍ କରିଛନ୍ତି। ୩୦ଟି ପଦକ ପାଇଁ ଭାରତ ଶୀର୍ଷରେ ରହିଥିବା ବେଳେ ଚାଇନା ୧୧ ସ୍ବର୍ଣ୍ଣ, ୧୫ ରୌପ୍ୟ ଓ ୧୮ ବ୍ରୋଞ୍ଜ ପଦକ ସହ ମୋଟ ୪୪ଟି ପୋଡିୟମ ଫିନିସ ସହ ଦ୍ୱିତୀୟ ସ୍ଥାନରେ ରହିଛି। ଅପରପକ୍ଷରେ ଆମେରିକା ୬ ସ୍ବର୍ଣ୍ଣ, ୬ ରୌପ୍ୟ ଓ ୩ଟି ବ୍ରୋଞ୍ଜ୍ ପଦକ ସହ ମୋଟ ୧୫ଟି ପଦକ ହାସଲ କରି ତୃତୀୟ ସ୍ଥାନରେ ରହିଛି।
ଭାରତ ମଧ୍ୟ ରେକର୍ଡ ୧୫ଟି ଅଲିମ୍ପିକ୍ କୋଟା ପ୍ଲେସ ହାସଲ କରିଛି। ଏହା ଶୁଟିଂରେ ଭାରତର ଦ୍ରୁତ ଉନ୍ନତିକୁ ଦର୍ଶାଉଛି। ଫଳରେ ଆଗାମୀ ଟୋକିଓ ଅଲିମ୍ପିକ୍ସରେ ଭାରତ ଶୁଟିଂ ଭଲ ପ୍ରଦର୍ଶନ କରି ଅଧିକ ସଂଖ୍ୟାରେ ପଦକ ହାସଲ କରିବ ବୋଲି ଆଶା କରାଯାଉଛି। ତେବେ ରିଓ ଅଲିମ୍ପିକ୍ସରେ ଭାରତର ପ୍ରଦର୍ଶନ ଆଶାନୁରୂପ ହୋଇପାରି ନ ଥିଲା। ଶୁଟରଙ୍କ ସମେତ ଫେଡେରେଶନର କଠିନ ପରିଶ୍ରମ ଯୋଗୁ ଭାରତରେ ଶୁଟିଂର ଆଜି ଶ୍ରେଷ୍ଠ ସୋପାନରେ ପହଞ୍ଚିଛି। ୨୦୧୨ ଲଣ୍ଡନ ଅଲିମ୍ପିକ୍ସରେ ଭାରତ ଶୁଟିଂରେ ଦୁଇଟି ପଦକ ହାସଲ କରିଥିଲା। ଏହା ଅଲିମ୍ପିକ୍ସରେ ଭାରତ ପାଇଁ ଶ୍ରେଷ୍ଠ ଶୁଟିଂ ପ୍ରଦର୍ଶନ ଥିଲା। ତେବେ ଏଥର ଟୋକିଓ ଅଲିମ୍ପିକ୍ସ ଭାରତର ପ୍ରଦର୍ଶନ ଆହୁରି ଭଲ ହେବ ବୋଲି ଆଶା କରାଯାଉଛି।
