ଭୁବନେଶ୍ୱର,୧୯।୪(ବ୍ୟୁରୋ)- ବୟସ ମାତ୍ର ୧୮ବର୍ଷ। ହେଲେ ପ୍ୟାଶନ ଫିଲ୍ମ ମେକିଂ। ଏତେ କମ୍ ବୟସରେ ଏକ ଡକ୍ୟୁମେଣ୍ଟାରୀ ଫିଲ୍ମ ନିର୍ମାଣ କରି ଚର୍ଚ୍ଚା ପରିସରକୁ ଆସିଛନ୍ତି ଓଡ଼ିଶାର ରାଜକିଶୋର ମହାପାତ୍ର। ସମାଜ ପାଇଁ କିଛି କରିବାର ଇଚ୍ଛା ତାଙ୍କୁ ଦେଇଛି ନୂଆ ପରିଚୟ। କେବଳ ଏତିକି ନୁହେଁ, ତାଙ୍କ ଡକ୍ୟୁମେଣ୍ଟାରୀ ବହୁ ଜାତୀୟ ଏବଂ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ପ୍ରଦର୍ଶନ ପାଇଁ ମନୋନୀତ ହେବା ସହ ପ୍ରଶଂସିତ ମଧ୍ୟ ହୋଇଛି।
ଭୁବନେଶ୍ୱରର ଛାତ୍ର ରାଜକିଶୋର ଏକ ସାମାଜିକ କାହାଣୀକୁ ଆଧାର କରି ନିର୍ମାଣ କରିଛନ୍ତି ପ୍ରାମାଣିକ ଚଳଚ୍ଚିତ୍ର ‘ମାୟା: ଏ ଷ୍ଟେଟ୍ ଅଫ୍ ଟ୍ରାନ୍ସ’। ୨୦୧୯ ଜାନୁୟାରୀ ୭ରେ ୟୁଟ୍ୟୁବ୍ରେ ରିଲିଜ ହୋଇଥିବା ଏହି ଶର୍ଟ ଡକ୍ୟୁମେଣ୍ଟାରୀ ଫିଲ୍ମ ନିକଟରେ ଆମେରିକାର ଫିଲାଡେଲ୍ଫିଆ ସହରରେ ଅନୁଷ୍ଠିତ ଫିଲାଡେଲ୍ଫିଆ ୟୁଥ୍ ଫିଲ୍ମ ଫେଷ୍ଟିଭାଲରେ ପ୍ରଦର୍ଶିତ ହୋଇ ଶ୍ରେଷ୍ଠ ଡକ୍ୟୁମେଣ୍ଟାରୀ ଫିଲ୍ମର ଆଓ୍ବାର୍ଡ ପାଇଛି। ଏହାବ୍ୟତୀତ ଏହି ଫିଲ୍ମ ମୁମ୍ବାଇର ଦାଦା ସାହେବ ଫାଲ୍କେ ଫିଲ୍ମ ଫେଷ୍ଟିଭାଲରେ ପ୍ରଦର୍ଶନ ହେବାକୁ ମଧ୍ୟ ମନୋନୀତ ହୋଇଥିଲା। ସହରାଞ୍ଚଳ ବସ୍ତିରେ ରହୁଥିବା ଶିଶୁ ଓ କିଶୋରମାନେ କିଭଳି ପରିସ୍ଥିତିରେ ଫସି ନିଶା କବଳରେ ପଡ଼ୁଛନ୍ତି ଓ ଅତି ସାଧାରଣରେ ମିଳିପାରୁଥିବା ଅଠା, ଜୋତା ପଲିସ୍, ନେଲ୍ ପଲିସ୍ ଭଳି ଘରୋଇ ସାମଗ୍ରୀର ଅପବ୍ୟବହାର କରୁଛନ୍ତି, ତାହା ଉପରେ ଏହି ଫିଲ୍ମ ଆଧାରିତ ହୋଇଛି। ଏହି ସମ୍ବେଦନଶୀଳ ଘଟଣା ଉପରେ ଅଧିକ ଗବେଷଣା କରିବା ସହ ରାଜକିଶୋର ଫିଲ୍ମ ତିଆରି ପାଇଁ ପ୍ରାୟ ଦେଢ଼ବର୍ଷ କାମ କରିଥିଲେ। ଆଉ ଏଥିପାଇଁ ସେ ଭୁବନେଶ୍ୱରର ବିଭିନ୍ନ ବସ୍ତିକୁ ଯାଇ ସେଠାରେ ପିଲାମାନଙ୍କ ସହିତ କଥାବାର୍ତ୍ତା ହେବା ସହ ତାଙ୍କ ପରିସ୍ଥିତି ବୁଝିବାକୁ ପ୍ରୟାସ କରିଥିଲେ। ଏହାଛଡ଼ା ମନସ୍ତତ୍ତ୍ୱବିତ୍ ଡ. ଶୁଭେନ୍ଦୁ ନାରାୟଣ ମିଶ୍ର, ଡ. ସୁଶାନ୍ତ ସାହୁ, ସାମାଜିକ କର୍ମୀ ଘାସିରାମ ପଣ୍ଡା, ଡଲି ଦାସ ପ୍ରମୁଖଙ୍କଠାରୁ ଏହାର କାରଣ, ନକାରାତ୍ମକ ପ୍ରଭାବ ଓ ପ୍ରତିକାର ସମ୍ପର୍କରେ ଅବଗତ ହୋଇଥିଲେ। କେବଳ ‘ମାୟା’ ନୁହେଁ, ସେ ଅନ୍ୟ କେତେକ କ୍ଷୁଦ୍ର ଚଳଚ୍ଚିତ୍ର ମଧ୍ୟ ନିର୍ମାଣ କରିଛନ୍ତି। ଏହାସହ ଅଜିତ୍ ଦାସ ଓ ବିକାଶ ଚୌଧୁରୀଙ୍କ ପରି ବରିଷ୍ଠ ଅଭିନେତାଙ୍କ ସହ କାମ କରିଛନ୍ତି। ଆଗକୁ ମଧ୍ୟ ଏହିଭଳି ସାମାଜିକ ଘଟଣାବଳୀକୁ ନେଇ ଫିଲ୍ମ ତିଆରି କରିବାକୁ ରାଜକିଶୋର ଲକ୍ଷ୍ୟ ରଖିଛନ୍ତି।
