ପୁରୁଣା ଭୁବନେଶ୍ୱର,୧୭-୯(ଡି.ଏନ.ଏ);ମଙ୍ଗଳବାର ଦେବଶିଳ୍ପୀ ବିଶ୍ୱକର୍ମାଙ୍କ ପୂଜା। ଏଥିପାଇଁ ପ୍ରସ୍ତୁତି ସରିଥିବାବେଳେ ସହରଠୁ ଗାଁ ସବୁଠି ଉତ୍ସାହ ଆଉ ଉତ୍କଣ୍ଠା। ବିଶେଷକରି ବିଭିନ୍ନ ସହର ଓ ବଜାରରେ ନିଆରା ମୂର୍ତ୍ତି ନିର୍ମାଣ ସହ ସୁଉଚ୍ଚ ତୋରଣ, ଆଲୋକସଜ୍ଜାକୁ ନେଇ ବିଭିନ୍ନ ପୂଜା ମଣ୍ଡପ ପକ୍ଷରୁ ପ୍ରତିଯୋଗିତା ଚାଲିଛି। ଏସବୁ ଭିତରେ ଶାନ୍ତିସ୍ତୂପ ନିକଟ ଧଉଳି ଚାରୁକଳା ମହାବିଦ୍ୟାଳୟର ଛାତ୍ରୀଛାତ୍ରୀମାନେ ବିଭିନ୍ନ ଦେଶର ୧୬୦୦ କୀର୍ତ୍ତିରାଜି ଫଟୋକୁ ନେଇ ତିଆରି କରିଛନ୍ତି ବିଶ୍ୱକର୍ମାଙ୍କ ମୃଣ୍ମୟ ପ୍ରତିମୂର୍ତ୍ତି। ପେପର କୋଲାଜ ଶୈଳୀରେ ପ୍ରସ୍ତୁତ ଏହି ମୂର୍ତ୍ତି ବେଶ୍ ଆକର୍ଷଣୀୟ ହେବା ସହ ନୂଆ ବାର୍ତ୍ତା ଦେଉଛି। ଏଥିରେ ବିଶ୍ୱର ପ୍ରମୁଖ ଐତିହ୍ୟ କୋଣାର୍କ ମନ୍ଦିର ସହ ଏହାର ଚକ୍ର, ଘୋଡ଼ା, ନର୍ତ୍ତକୀ ସ୍ଥାନ ପାଇଛି। ସେହିପରି ପୁରୀ ଶ୍ରୀଜଗନ୍ନାଥ ମନ୍ଦିର, ଲିଙ୍ଗରାଜ ମନ୍ଦିର ମୁକ୍ତେଶ୍ୱର ତୋରଣ, ବୋଇତାଳ ମନ୍ଦିର, ଶାନ୍ତିସ୍ତୂପ ଧଉଳି, ଖଣ୍ଡଗିରି ଗୁମ୍ଫା ସହ ଅନେକ କୀର୍ତ୍ତିରାଜିର ଫଟୋଚିତ୍ର ଓ ବିଶ୍ୱକର୍ମାଙ୍କ ଶ୍ଳୋକ ସ୍ଥାନିତ ହୋଇଛି।
ମହାବିଦ୍ୟାଳୟର ଭାସ୍କର୍ଯ୍ୟ ବିଭାଗ ଅଧ୍ୟାପକ ଚନ୍ଦନ କୁମାର ସାମଲଙ୍କ ତତ୍ତ୍ୱାବଧାନରେ ରାଜେଶ୍ୱର ମହାପାତ୍ର, ରଣଜିତ୍ ପାଣି, ସୁଧାଂଶୁ ବକ୍ସି, ରାକେଶ ବିଶ୍ୱାଳ, ବିଶ୍ୱଜିତ୍ ସାହୁ, ଅବିନାଶ ସାହୁ, ରାକେଶ ଦାସ, ନୀଳମଣି ଗୌଡ, ସୁମିତ୍ କୁମାର ଧାଙ୍ଗଡ଼ା ମାଝି ଓ ଗତିକୃଷ୍ଣ ନାୟକଙ୍କ ସମେତ ବହୁ ଛାତ୍ରୀଛାତ୍ର ୮ଦିନ ଧରି ଏହି ମୂର୍ତ୍ତି ତିଆରି କରିବାରେ ସଫଳ ହୋଇନ୍ତି। ଏମାନେ କୁହନ୍ତି, ଐତିହ୍ୟ, କୀର୍ତ୍ତିରାଜି, କଳା ଓ ସ୍ଥାପର୍ଯ୍ୟର ରକ୍ଷଣାବେକ୍ଷଣ ଏବଂ ସେଗୁଡିକର ପ୍ରଚାରପ୍ରସାର ପାଇଁ ଏପରି ପ୍ରୟାସ କରାଯାଇଛି। ଛାତ୍ରଛାତ୍ରୀଙ୍କ ଏଭଳି ଉଦ୍ୟମକୁ ମହାବିଦ୍ୟାଳୟ ଅଧ୍ୟକ୍ଷ ତଥା ଚିତ୍ରଶିଳ୍ପୀ ପଞ୍ଚାନନ ସାମଲ, ସମ୍ପାଦକ ମିହିରକାନ୍ତ ପ୍ରହରାଜ, ଅଧ୍ୟାପକ ମାନସ ରଞ୍ଜନ ନାୟକ, ବିଶ୍ୱକାନ୍ତ ପଣ୍ଡା, ରାମଶଙ୍କର ସାହୁ, ସସ୍ମିତା କାମିଳା, ଲକ୍ଷ୍ମୀଧର ସ୍ବାଇଁ ପ୍ରମୁଖ ପ୍ରଶଂସା କରିଛନ୍ତି।
