ବଇଣ୍ଡା,୨୫।୩(ଡି.ଏନ.ଏ.)- ଅନୁଗୋଳ ଜିଲା କିଶୋରନଗର ବ୍ଲକ ପ୍ରଶାସନ ଓ ବିଭିନ୍ନ ସ୍ବାସ୍ଥ୍ୟକେନ୍ଦ୍ରରେ ରାଜ୍ୟ ବାହାରୁ ଫେରିଥିବା ୧୪୭ ଶ୍ରମଜୀବୀ ବୁଧବାର ନାମ ପଞ୍ଜୀକରଣ କରିଛନ୍ତି। ସେମାନେ ସମସ୍ତେ ସ୍ବାସ୍ଥ୍ୟ ପରୀକ୍ଷା କରାଇବା ସହ ହୋମ କ୍ୱାରାଣ୍ଟାଇନରେ ରହିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଥିବା ବିଡିଓ ଅମୃତା ପ୍ରିୟମ୍ବଦା ସୂଚନା ଦେଇଛନ୍ତି। ସେହିପରି କିଶୋରନଗର, ହଣ୍ଡପା ପୋଲିସ ସହ ବିଡିଓ, ତହସିଲଦାରଙ୍କୁ ନେଇ ଗଠିତ ୪ଟି ଟିମ୍ ବିଭିନ୍ନ ଅଞ୍ଚଳ ବୁଲି ଲକ୍ଡାଉନ୍ ତଦାରଖ କରୁଛନ୍ତି। ତେବେ ପରିବାଠାରୁ ଆରମ୍ଭ କରି ବିଭିନ୍ନ ଅତ୍ୟାବଶ୍ୟକ ସାମଗ୍ରୀର ହଠାତ୍ ମୂଲ୍ୟ ବୃଦ୍ଧି ପାଇଥିବାରୁ ଏ ନେଇ ବଇଣ୍ଡା ଗ୍ରାମବାସୀ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଏ ସମ୍ପର୍କରେ ଆଠମଲ୍ଲିକ ଉପଜିଲାପାଳ ଡ. ରଜନୀକାନ୍ତ ବିଶ୍ୱାଳ କହିଛନ୍ତି, କଳାବଜାର ଉପରେ ନଜର ରଖାଯାଇଛି। ସମ୍ପୃକ୍ତ ବ୍ୟବସାୟୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେହିପରି ଛେଣ୍ଡିପଦା ବ୍ଲକ ଅଞ୍ଚଳରେ ମଙ୍ଗଳବାର ସୁଦ୍ଧା ୧୬୩ ଜଣ ବାହାର ରାଜ୍ୟ ଫେରନ୍ତା ଶ୍ରମଜୀବୀଙ୍କୁ ଚିହ୍ନଟ କରାଯାଇଥିବା ବେଳେ ବୁଧବାର ଆଉ ୪୪ ଜଣଙ୍କୁ ଚିହ୍ନଟ କରାଯାଇଛି। ସେମାନଙ୍କୁ କ୍ୱାରାଣ୍ଟାଇନରେ ରହିବାକୁ ତହସିଲଦାର ଡାନିଏଲ ଏକ୍କାଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି। ଏହାର ଅବମାନନା କଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ତହସିଲଦାର ଏକ୍କା ପ୍ରକାଶ କରିଛନ୍ତି।
