କୁଜଙ୍ଗ, ୨୧ା୩ (ଡି.ଏନ୍.ଏ.):ଏରସମା ବ୍ଲକ ଅନ୍ତର୍ଗତ ଢିଙ୍କିଆ, ଗଡ଼କୁଜଙ୍ଗ ଓ ନୂଆଗାଁ ପଞ୍ଚାୟତରେ ହରିଣ ଓ ବାର୍ହା ଯୋଗୁ ଡାଳୁଅ ଧାନ ଫସଲ ନଷ୍ଟ ହେଉଛି। ପରିବାର ପ୍ରତିପୋଷଣ ପାଇଁ ଢିଙ୍କିଆ ଚାରିଦେଶର ଅଧିକାଂଶ ଚାଷୀ ଡାଳୁଅ ଧାନ ଉପରେ ନିର୍ଭର କରନ୍ତି। କିନ୍ତୁ ଶିଳ୍ପ ପାଇଁ ଜଙ୍ଗଲ ସଫା ହୋଇଯାଇଥିବାରୁ ହରିଣ ଓ ବାର୍ହାମାନେ ସେମାନଙ୍କ ଖାଦ୍ୟ ପାଇଁ ଡାଳୁଅ ଧାନ କିଆରି ମୁହାଁ ହୋଇଛନ୍ତି। ଚଳିତ ବର୍ଷ ଢିଙ୍କିଆ ପଞ୍ଚାୟତରେ ପ୍ରାୟ ୩୦୦ ଏକରରୁ ଊର୍ଦ୍ଧ୍ୱ ଜମିରେ ଡାଳୁଅ ଧାନ ଚାଷ ହୋଇଛି। ଏହି ଢିଙ୍କିଆ ତଣ୍ଡାରେ ପ୍ରାୟ ୫୦୦ରୁ ଊର୍ଦ୍ଧ୍ୱ ହରିଣ ଓ ବହୁ ସଂଖ୍ୟାରେ ବାର୍ହା ରହିଛନ୍ତି। ଶିଳ୍ପ ପାଇଁ ଜଙ୍ଗଲ କଟାଯିବା ପରେ ସେମାନେ ବିଭିନ୍ନ ବୁଦାଳିଆ ଜଙ୍ଗଲ, କିଆ ଗୋହିରି ଓ ସମୁଦ୍ର ତଟକୁ ଲାଗିଥିବା ଝାଉଁ ଜଙ୍ଗଲରେ ଆଶ୍ରୟ ନେଉଛନ୍ତି। ରାତିରେ ହେଲେ ସେମାନେ ଡାଳୁଅ ଧାନ କିଆରିରେ ପଶି ଖାଇବା ସାଙ୍ଗକୁ ନଷ୍ଟ କରୁଛନ୍ତି।
ଫଳରେ ଚାଷୀଙ୍କ ବ୍ୟାପକ କ୍ଷୟକ୍ଷତି ହେଉଛି। ଏନେଇ ରାତିରେ ଚାଷୀ ମେଳି ହୋଇ ଯେତେ ଜଗିଲେ ବି କିଛି ସୁଫଳ ମିଳୁନି। ଏହାସତ୍ତ୍ୱେ ବନବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ ବୋଲି ଚାଷୀ ଦେବଦତ୍ତ ସ୍ବାଇଁ, ଲୋକନାଥ ସ୍ବାଇଁ, ବିଜୟ ଦାସ, ଶରତ ଲେଙ୍କା, ହେମନ୍ତ ସ୍ବାଇଁ, ଜଗବନ୍ଧୁ ମଲ୍ଲିକ୍ ଓ ତ୍ରିନାଥ ମଲ୍ଲିକ ପ୍ରମୁଖ କହିଛନ୍ତି। ଅପରପକ୍ଷରେ ବନ୍ୟଜନ୍ତୁମାନଙ୍କ ସୁରକ୍ଷା ପାଇଁ ପଦକ୍ଷେପ ନେବାକୁ ବନ ବିଭାଗ ନିକଟରେ ସେମାନେ ଦାବିକରିଛନ୍ତି। ଏ ସମ୍ପର୍କରେ କୁଜଙ୍ଗ ରେଞ୍ଜର ରଞ୍ଜନ ମିଶ୍ରଙ୍କ ମୋବାଇଲ୍ ନମ୍ବର ୯୪୩୮୦୪୪୭୦୯କୁ ଯୋଗାଯୋଗ କରାଯାଇଥିଲେ ମଧ୍ୟ ଏହା ବନ୍ଦ ଥିବାରୁ ପ୍ରତିକ୍ରିୟା ମିଳିପାରିନାହିଁ।
