ବ୍ରହ୍ମପୁର ଅଫିସ,୧୩ା୫: ଏକ ହତ୍ୟା ମାମଲାର ମୁଖ୍ୟ ସାକ୍ଷୀ ପୂର୍ଣ୍ଣ ଜେନାଙ୍କୁ ହତ୍ୟା ଉଦ୍ୟମ ଘଟଣାର ୪ ଅଭିଯୁକ୍ତଙ୍କୁ ସଦର ଥାନା ପୋଲିସ କେସ ନମ୍ବର ୧୩୧/୨୦ରେ ବୁଧବାର ଗିରଫ କରି କୋର୍ଟ ଚାଲାଣ କରିଛି । ସେମାନେ ହେଲେ ରୋହିଗାଁର ପ୍ରଭାକର ଜେନା, ଟୁଲୁ ଜେନା, ଭିକା ଓରଫ ଭିକାରୀ ଜେନା ଓ ଟୁନା ସେଠୀ। ଅଭିଯୁକ୍ତଙ୍କ ଜାମିନ ନାମଞ୍ଜୁର ହେବା ପରେ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିବା ଜଣାପଡ଼ିଛି । ଅନ୍ୟପଟେ ଘଟଣାର ମାଷ୍ଟରମାଇଣ୍ଡ୍ କୁହାଯାଉଥିବା ବଶିଷ୍ଠଜେନା ଫେରାର ରହିଥିବା ପୋଲିସ କହିଛି ।
ଘଟଣାରୁ ପ୍ରକାଶ ଯେ, ୨୦୧୫ ସେପ୍ଟେମ୍ବର ୭ ତାରିଖରେ ପୂର୍ବ ଶତ୍ରୁତାକୁ କେନ୍ଦ୍ର କରି ପୂର୍ଣ୍ଣ ଜେନାଙ୍କୁ ବଶିଷ୍ଠ ଓ ତାଙ୍କ ସହଯୋଗୀମାନେ ହତ୍ୟା ଉଦ୍ୟମ କରି ଗିରଫ ହୋଇଥିଲେ। ଏପରିକି ଗତ ୨୦୧୭ ମାର୍ଚ୍ଚ ୧୮ ରେ ପୂର୍ଣ ଜେନାଙ୍କ ଭାଇ ଅଶୋକ ଜେନାଙ୍କୁ ମଧ୍ୟ ପୂର୍ବ ଶତ୍ରୁତାକୁ କେନ୍ଦ୍ର କରି ବଶିଷ୍ଠ ଓ ତାଙ୍କ ସହଯୋଗୀମାନେ ସଂଘବଦ୍ଧ ଭାବେ ହତ୍ୟା କରି ଜେଲ ଯାଇଥିଲେ। ଏହି ହତ୍ୟା ମାମଲାରେ ପୂର୍ଣ ଜେନା ମୁଖ୍ୟ ସାକ୍ଷୀ ଥିଲେ। ଜେଲରୁ ବଶିଷ୍ଠ ଜେନା ଓ ତାଙ୍କ ସହିଯୋଗୀମାନେ ଜାମିନରେ ଆସିବା ପରେ ପୁଣି ଥରେ ଅଞ୍ଚଳରେ ସେମାନେ ରାଜ୍ ଜାହିର ଆରମ୍ଭ କରିଥିଲେ। ଗତ ୧୦ ତାରିଖରେ ପୂର୍ଣ ଜେନାଙ୍କୁ ବଶିଷ୍ଠ ଓ ତାଙ୍କ ସହଯୋଗୀମାନେ କୋର୍ଟରେ ସାକ୍ଷୀ ନ ଦେବାକୁ ଧମକ ଦେବା ସହ ବିଭିନ୍ନ ମାରଣାସ୍ତ୍ରରେ ହତ୍ୟା ଉଦ୍ୟମ କରିଥିଲେ।
