ନଏଡା,୧୬।୪: ଉତ୍ତରପ୍ରଦେଶ ନୋଏଡାରେ କରୋନା ହଟ୍ସ୍ପଟ ଅଞ୍ଚଳକୁ ନଜର ରଖିଥିବା ପୋଲିସର ଏକ ଡ୍ରୋନ୍ ହଠାତ୍ ନିଖୋଜ ହୋଇଯାଇଥିବା ଜଣାପଡ଼ିଛି। ଏହି ଡ୍ରୋନ୍କୁ ଏକ ସୋସାଇଟି ଉପରେ ନଜର ରଖିବାକୁ ଲଗାଯାଇଥିଲା। ହେଲେ ୪ରୁ ୫ ଦିନ ହେବ ହଠାତ୍ ଡ୍ରୋନ୍ ନିଖୋଜ ହୋଇଯାଇଥିବା ବେଳେ ଉତ୍ତରପ୍ରଦେଶ ପୋଲିସ ଏହାକୁ ଖୋଜିବା ପାଇଁ ଉଦ୍ୟମ ଚଳାଇଛି। ଏଥିପାଇଁ ଏହି କାର୍ଯ୍ୟରେ ଆଉ ଏକ ଡ୍ରୋନ୍ ଲଗାଯାଇଥିବା ସୂଚନା ମିଳିଛି। ସୂଚନାଯୋଗ୍ୟ, ଉତ୍ତରପ୍ରଦେଶରେ ଲକ୍ଡାଉନ୍ ଜାରି ରହିଥିବା ବେଳେ ୧୫ଟି ଜିଲାକୁ ହଟ୍ସ୍ପଟ ଅଞ୍ଚଳ ଘୋଷଣା କରାଯାଇଛି। ଏଥିସହ ନଏଡାରେ ୨୭ଟି ଅଞ୍ଚଳକୁ ସିଲ୍ କରାଯାଇଛି। ଏହି କ୍ରମରେ ନଏଡା ସେକ୍ଟର-୭୫ ସ୍ଥିତ ସୁପରଟେକ କେପଟାଉନ୍ ସୋସାଇଟିକୁ ହଟ୍ସ୍ପଟ ଘୋଷଣା କରାଯାଇଥିଲା। ଏହି ସୋସାଇଟି ଉପରେ ନଜର ରଖିବା ପାଇଁ ପୋଲିସ ୪ରୁ ୫ ଦିନ ପୂର୍ବରୁ ଏକ ଡ୍ରୋନ୍କୁ ନିୟୋଜିତ କରିଥିଲା। କିଛି ସମୟ ପର୍ଯ୍ୟନ୍ତ ସୋସାଇଟିର ସମସ୍ତ ଭିଡିଓ ରେକର୍ଡ ହୋଇଥିବା ବେଳେ ହଠାତ୍ ଭୂତଳରେ ଥିବା ଅପରେଟର ସହ ଡ୍ରୋନ୍ର ସମ୍ପର୍କ ବିଚ୍ଛିନ୍ନ ହୋଇଯାଇଥିଲା। ଡ୍ରୋନ୍ ସହ ସମ୍ପର୍କ କରିବାକୁ ଯେତେ ଚେଷ୍ଟା କଲେ ମଧ୍ୟ ହୋଇପାରି ନ ଥିଲା।
