ଭୁବନେଶ୍ୱର,୧୬।୧୨(ବ୍ୟୁରୋ): ସ୍ବାଭିମାନ ଅଞ୍ଚଳରେ ଶିକ୍ଷକ କ୍ଲଷ୍ଟର ପ୍ରତିଷ୍ଠା ଲାଗି ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ପ୍ରଥମ ପର୍ଯ୍ୟାୟରେ ମାଲକାନଗିରି ଅଞ୍ଚଳର ୭ଟି ପଞ୍ଚାୟତର ସ୍କୁଲ ଉପକୃତ ହେବ। ଏଥିପାଇଁ ୮କୋଟି ଟଙ୍କା ଖର୍ଚ୍ଚ ହେବ ବୋଲି ସ୍କୁଲ ଓ ଗଣଶିକ୍ଷା ବିଭାଗ ମନ୍ତ୍ରୀ ସମୀର ରଞ୍ଜନ ଦାଶ ସୂଚନା ଦେଇଛନ୍ତି। ମନ୍ତ୍ରୀ ଦାଶ କହିଛନ୍ତି ଯେ, ଗୁରୁପ୍ରିୟା ସେତୁ ହେବାପରେ ମଧ୍ୟ ସ୍ବାଭିମାନ ଅଞ୍ଚଳର ଦୁଇଟି ପଞ୍ଚାୟତ ପଣସପୁଟ, ଜଡାଆମ୍ବ ପଞ୍ଚାୟତର ସ୍କୁଲକୁ ଆସୁଥିବା ଶିକ୍ଷକମାନଙ୍କୁ ବିଶେଷ ଅସୁବିଧା ହେଉଛି। ସେହିପରି କ୍ଲଷ୍ଟର ପ୍ରସ୍ତୁତ ହେବାଦ୍ୱାରା ସ୍ବାଭିମାନ ଅଞ୍ଚଳର ଅନ୍ୟ ୫ ପଞ୍ଚାୟତ ଯଥା ପାପରମେଟେଲା, ବଡପଦର, ଅଣ୍ଡରାପାଲି, ଜନ୍ତ୍ରୀ ଓ କାଜୁଲମାମୁଡ଼ିରେ ଥିବା ସ୍କୁଲର ଶିକ୍ଷକମାନେ ମଧ୍ୟ ଉପକୃତ ହେବେ। ସେହି ଅଞ୍ଚଳରୁ ଆସୁଥିବା ଶିକ୍ଷକମାନେ ଲଞ୍ଚରେ ଯିବା ଆସିବା କରୁଛନ୍ତି। ତେଣୁ ସେଠାରୁ ଆସୁଥିବା ଶିକ୍ଷୟିତ୍ରୀ, ଶିକ୍ଷକଙ୍କୁ ଯିବା ଆସିବାରେ ୬ ଘଣ୍ଟା ଯାଉଛି। ସେମାନଙ୍କ ସମୟ ନଷ୍ଟ ନ ହେବା ସକାଶେ ସରକାର ଏହି ନିଷ୍ପତ୍ତି ନେଇଛନ୍ତି। ପ୍ରଥମ ପର୍ଯ୍ୟାୟରେ କ୍ଲଷ୍ଟରରେ ୧୫ଜଣ ଶିକ୍ଷକ କ୍ଲଷ୍ଟରରେ ନିଯୁକ୍ତି ପାଇବେ ବୋଲି ସମୀର କହିଛନ୍ତି।
