ବାରଙ୍ଗ,୧୨ା୮(ଡି.ଏନ୍.ଏ.)- ସୋମବାର ଥିଲା ବିଶ୍ୱ ହସ୍ତୀ ଦିବସ। ଚଳିତବର୍ଷ ନନ୍ଦନକାନନ ଓ ସ୍କୁଲ ସୋମବାର ବନ୍ଦ ଥିବାରୁ ଏହି ଦିବସକୁ ସ୍କୁଲପିଲାଙ୍କ ଗହଣରେ ପାଳିଥିବାର ଦେଖିବାକୁ ମିଳିଛି। ନନ୍ଦନକାନନରେ ଥିବା ଜୁଲି, ଗୌରୀ, କମଳା ଓ ମାମାକୁ ନେଇ ୪ ହାତୀ ଏଥିରେ ସାମିଲ ହୋଇଥିଲେ। ଏଥିମଧ୍ୟରୁ ମାମା ସବୁଠୁ ଛୋଟ ଥିବାରୁ ସମସ୍ତଙ୍କ ପାଇଁ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲା। ବର୍ଷାପାଗ ଥିବାରୁ ସକାଳ ୯ଟାରେ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ସମୟ ପୂର୍ବରୁ ଏହି ୪ ହାତୀ ଆସି ଗେଟ କମ୍ପ୍ଲେସ ଆଗରେ ଛିଡା ହୋଇଥିଲେ। ଏହାସହ ଆଖପାଖର ୧୨ଟି ସ୍କୁଲର ପିଲାଙ୍କ ସହ ଅତିଥିମାନେ ବର୍ଷାହେବା ସତ୍ତ୍ୱେ ସମୟ ପୂର୍ବରୁ ପହଞ୍ଚତ୍ ଯାଇଥିଲେ। ମୁଖ୍ୟଅତିଥି ଭାବେ ଜଟଣୀ ବିଧାୟକ ସୁରେଶ ରାଉତରାୟ ଓ ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ ରାଉତ ଯୋଗଦେଇଥିଲେ। ଅତିଥି ଓ ପିଲାମାନେ ହାତୀମାନଙ୍କୁ ସୁସ୍ବାଦ ଖାଦ୍ୟ ମକା, ସେଓ, କଦଳୀ, ନଡ଼ିଆ ଓ ଆଖୁ ଆଦି ପ୍ରଦାନ କରିଥିଲେ। ଏହି ଅବସରରେ ଅତିଥିମାନଙ୍କ ଦ୍ୱାରା ୯ଜଣ ମାହୁନ୍ତଙ୍କୁ ୨ହଜାର ଟଙ୍କା ସହ ପ୍ୟାଣ୍ଟଶାର୍ଟ ଦିଆଯାଇଥିଲା। ପରେ କନଫରେନ୍ସ ହଲରେ ଏକ ସଭା ଆୟୋଜନ ହୋଇଥିଲା। ଏଥିରେ ନନ୍ଦନକାନନର ମୁଖ୍ୟ ବନସଂରକ୍ଷକ(ବନ୍ୟପ୍ରାଣୀ) ଡ.ଅଜୟ କୁମାର ମହାପାତ୍ର, ନିର୍ଦ୍ଦେଶକ ଶଶିପଲ, ଉପନିର୍ଦ୍ଦେଶକ ଜୟନ୍ତ କୁମାର ଦାସ, ପର୍ଯ୍ୟଟନ ପରିଚାଳନା ଦାୟିତ୍ୱରେ ଥିବା ଏସିଏଫ ଅମୂଲ୍ୟ କୁମାର ପରିଡା, ଜନ୍ତୁବିଭାଗ ଦାୟିତ୍ୱରେ ଥିବା ଏସିଏଫ ଅଶୋକ ଦାସ, ଏସିଏଫ ପ୍ରଶାନ୍ତ କୁମାର ପଣ୍ଡା, ରେଞ ଅଫିସର କୁମର ବେହେରା, କମଳ ପଟ୍ଟନାୟକଙ୍କ ସମେତ ପ୍ରମୁଖ ଉପସ୍ଥିତ ଥିଲେ। କାର୍ଯ୍ୟକ୍ରମରେ ବିଧାୟକ ରାଉତରାୟ ହାତୀର ଜୟଗାନ କରି ହାତୀମାନଙ୍କ ପାଇଁ ତାଳି ମାରିବାକୁ ଉପସ୍ଥିତ ପିଲାମାନଙ୍କୁ କହି ହସାଇଥବାର ଦେଖିବାକୁ ମିଳିଥିଲା। ଫନୀରେ କ୍ଷତିଗ୍ରସ୍ତ ନନ୍ଦନକାନନର ପୁନରୁଦ୍ଧାର କାର୍ଯ୍ୟ ଶୀଘ୍ର ସରିଥିବାରୁ ଦୁଇ ବିଧାୟକ ନନ୍ଦନକାନନ କର୍ତ୍ତୃପକ୍ଷଙ୍କୁ ଧନ୍ୟବାଦ ଦେଇଥିଲେ ।
