ରାୟଗଡ଼ା ଅଫିସ,୧ା୮- ରାୟଗଡ଼ା ଜିଲା ସୂଚନା ଅଧିକାର ଅଭିଯାନ ତରଫରୁ ସୂଚନା ଅଧିକାର ସଂଶୋଧନ ବିଲ ପ୍ରତ୍ୟାହାର ଦାବିରେ ଏକ ସ୍ମାରକପତ୍ର ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଜିଲାପାଳ ପ୍ରମୋଦ କୁମାର ବେହେରାଙ୍କୁ ପ୍ରଦାନ କରାଯାଇଛି। ସମଗ୍ର ଦେଶରେ କୌଣସି ବିତର୍କ ନ କରାଇ ଅତ୍ୟନ୍ତ ମନୋମୁଖୀ ଭାବେ କେନ୍ଦ୍ର ସରକାର ସଂସଦରେ ସୂଚନା ଅଧିକାର ବିଲକୁ ପାସ କରିଛନ୍ତି। ଏହି ସଂଶୋଧନ ବିଲକୁ ସ୍ବୀକୃତି ନ ଦେବା ପାଇଁ ପୁନଃ ବିଚାର ଲାଗି ସଂସଦକୁ ଫେରାଇ ଦେବାକୁ ନିବେଦନ କରିଛନ୍ତି। ଏଠାରେ ସୂଚନାଯୋଗ୍ୟ ଯେ, କେନ୍ଦ୍ରସରକାର ଏହି ସଂଶୋଧନ ବିଲରେ କେନ୍ଦ୍ରୀୟ ସୂଚନା କମିଶନ ଏବହ ରାଜ୍ୟ କମିଶନମାନଙ୍କ ଦରମା, ଭତ୍ତା, ଚାକିରି ସର୍ତ୍ତାବଳୀ, ନିଯୁକ୍ତି ସମୟସୀମା ଆଦି କେନ୍ଦ୍ରସରକାର ସରକାରୀ ବିଜ୍ଞପ୍ତି ଜରିଆରେ ସ୍ଥିର କରିବେ ବୋଲି ଉଲ୍ଲେଖ କରିଛନ୍ତି। ଏହାଦ୍ୱାରା କମିଶନଙ୍କ ସ୍ବାତନ୍ତ୍ରତା ଏବଂ ସ୍ବାଧୀନତା କ୍ଷୂର୍ଣ୍ଣ ହେବ। ସୂଚନା ପ୍ରଦାନ କ୍ଷେତ୍ରରେ ସୂଚନା କମିଶନ କୌଣସି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇ ପାରିବେ ନାହିଁ। ଏଥିସହ ଏହି ବିଲକୁ ରାଜ୍ୟସଭାରେ ବିଜେଡ଼ିର ସମର୍ଥନକୁ ନାପସନ୍ଦ କରାଯାଇଛି। ରାଜ୍ୟରେ ଦୀର୍ଘ ୧୨ ବର୍ଷ ଧରି ନବୀନ ସରକାର ଯେପରି ସୂଚନା ଆଇନକୁ ଅକାମୀ କରି ରଖିଛନ୍ତି। ସେହିପରି ସମଗ୍ର ଦେଶରେ ସୂଚନା ଆଇନକୁ ଅକାମୀ କରିବା ପାଇଁ ମୋଦିଙ୍କ ସହିତ ହାତ ମିଳାଇଛନ୍ତି ବୋଲି ଅଭିଯୋଗ କରାଯାଇଛି । ତେଣୁ ଏହି ସଂଶୋଧନ ବିଲକୁ ସ୍ବୀକୃତି ନ ଦେବା ପାଇଁ ଅଭିଯାନ ତରଫରୁ ରାଜ୍ୟରେ ସପ୍ତାହବ୍ୟାପୀ ବିଭିନ୍ନ କାର୍ଯ୍ୟକ୍ରମ ଓ ସଚେତନତା କାର୍ଯ୍ୟକ୍ରମ କରିବାକୁ ସ୍ଥିର କରାଯାଇଥିତ୍ବା ସ୍ମାରକପତ୍ରରେ ଉଲ୍ଲେଖ କରାଯାଇଛି । ସ୍ମାରକପତ୍ର ପ୍ରଦାନ ସମୟରେ ଓଡ଼ିଶା ସୂଚନା ଅଧିକାର ଅଭିଯାନ ରାୟଗଡ଼ା ଶାଖାର ଜିଲା ଆବାହକ ସନ୍ତୋଷ ପାଢୀ, ଓଡ଼ିଶା ସୂଚନା ଅଧିକାର ଅଭିଯାନ ରାୟଗଡ଼ା ଶାଖା ବରିଷ୍ଠ ଉପଦେଷ୍ଟା ତଥା ଆଇନଜୀବୀ କିଶୋର ସାହୁ, ରଜତ ରଞ୍ଜନ ଖଟୁଆ, ଜିଲା ଆବାହକ ସନ୍ତୋଷ କୁମାର ପାଢୀ, ଜିଲା ସଂଯୋଜକ ପରମାନନ୍ଦ ପ୍ରଧାନ, ସେନାପତି ସନ୍ତୋଷୀ, ଭାଗ୍ୟ ଶବର ପ୍ରମୁଖ ଉପସ୍ଥିତ ଥିଲେ।
