ରାହାମା,୧୭ା୧୨(ଡି.ଏନ.ଏ.): କୁଜଙ୍ଗ ବ୍ଲକ ଅଧୀନ ରାହାମାଠାରେ ଏକ ସୁପର ସ୍ପେଶିଆଲିଟି କିମ୍ବା ସବ୍ଡିଭିଜନାଲ ହସ୍ପିଟାଲ ପ୍ରତିଷ୍ଠା ନେଇ ଦାବି ଜୋର ଧରିଛି। ଏନେଇ ରାହାମାସ୍ଥିତ ଗୁଣ୍ଡିଚା ମନ୍ଦିର ପ୍ରାଙ୍ଗଣରେ ପ୍ରତାପ ଚନ୍ଦ୍ର ସ୍ମାରକୀ ସ୍ବାସ୍ଥ୍ୟସେବା କମିଟି ପକ୍ଷରୁ ଏକ ବୈଠକ କରାଯାଇ ଏହି ଦାବି ଉପରେ ଆଲୋଚନା କରାଯାଇଛି। ରାଜ୍ୟ ଏବଂ କେନ୍ଦ୍ର ସରକାର ହସ୍ପିଟାଲ ପ୍ରତିଷ୍ଠା କରିବାରେ ବିଳମ୍ବ କରୁଥିବାରୁ ଆଗାମୀ ଦିନରେ ଗଣଆନ୍ଦୋଳନ ସହିତ ରେଳରୋକୋ ଓ କଟକ-ପାରାଦୀପ ରାଜ୍ୟପଥ ଅବରୋଧ ଓ ସମସ୍ତ ସରକାରୀ ଏବଂ ବେସରକାରୀ ଅନୁଷ୍ଠାନ ବନ୍ଦ କରାଯିବ ବୋଲି ସ୍ବାସ୍ଥ୍ୟସେବା କମିଟି ସମ୍ପାଦକ ତଥା କ୍ରିୟାନୁଷ୍ଠାନ କମିଟି ମୁଖ୍ୟ ସଂଯୋଜକ ପ୍ରତାପ ଚନ୍ଦ୍ର ମହାନ୍ତି ସୂଚନା ଦେଇଛନ୍ତି। ତିର୍ତୋଲର ବରିଷ୍ଠ ସାମାଜିକ କର୍ମୀ ନିତ୍ୟାନନ୍ଦ ଜେନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ କୁଜଙ୍ଗ, ତିର୍ତୋଲ, ଏରସମା, କେନ୍ଦ୍ରାପଡ଼ା ଜିଲାର ଗରଦପୁର, ମହାକାଳପଡ଼ା ବ୍ଲକ ଆଦି ୭୦ ପଞ୍ଚାୟତର ସରପଞ୍ଚ, ସମିତିସଭ୍ୟାସଭ୍ୟ, ଜିଲା ପରିଷଦ ସଭ୍ୟ, ବରିଷ୍ଠ ନାଗରିକ ମଞ୍ଚ, ଛାତ୍ର ପ୍ରତିନିଧି, କ୍ରିୟାନୁଷ୍ଠାନ କମିଟିର ସମସ୍ତ ଆବାହକ ଯୋଗଦେଇ ଉପରୋକ୍ତ ନିଷ୍ପତ୍ତି ନେଇଛନ୍ତି। ୧୯୯୪ରୁ ସ୍ବାସ୍ଥ୍ୟସେବା କମିଟି ମାଧ୍ୟମରେ ସରକାରଙ୍କ ପାଖରେ ଦାବି ଉପସ୍ଥାପନ କରାଯାଉଥିଲେ ମଧ୍ୟ ସରକାର ଏହା ଉପରେ କୌଣସି ପଦକ୍ଷେପ ନେଉ ନ ଥିବା କମିଟି ଅଭିଯୋଗ କରିଛି। ବୈଠକରେ ଆବାହକ କମିଟି ସଭ୍ୟ ଅଜୟ ସାହୁ, ରାଜ୍ୟ ମହିଳା ସଂଗଠନ ସମ୍ପାଦିକା ସବିତା ମହାପାତ୍ର, କାଠକୋଟ ସରପଞ୍ଚ ମିହିର ପଟ୍ଟନାୟକ, ତାଳପଡା ସରପଞ୍ଚ ମମତା ସାହୁ, ଗୋରଡ ସରପଞ୍ଚ ସ୍ବର୍ଣ୍ଣଲତା ବିଶ୍ୱାଳ, ବଣିତୋ ସରପଞ୍ଚ ସଞ୍ଜୟ ଷଡ଼ଙ୍ଗୀ, ମହାକାଳପଡା ବ୍ଲକର ଗଙ୍ଗାଧର ପରିଡା, ଗାରେଇ ସରପଞ୍ଚ ସଂଗ୍ରାମ ମନ୍ତ୍ରୀ, ବାଲିକଣି ସରପଞ୍ଚ ଜ୍ଞାନରଞ୍ଜନ ଚୌଧୁରୀ, ଅଭୟ ବାରିକ, ଚିନ୍ମୟ ଦାସ, ଶରତ ମହାନ୍ତି, ନାରୀନେତ୍ରୀ ମନୋରମା ମହାପାତ୍ର, ପାର୍ବତୀ ଭୂୟାଁ ଓ ସରସ୍ବତୀ ଦାସ ପ୍ରମୁଖଙ୍କ ସମେତ ଶତାଧିକ କର୍ମୀ ଯୋଗ ଦେଇଥିଲେ।
