ନୂଆପଡା ଅଫିସ,୨୪ା୪- ସରକାର ସବୁ ଗରିବ୍ ପରିବାରକେ ପକାଘର ଆର ଜମି ପଟ୍ଟା ଦେବାର ବେବସ୍ତା କରୁଛନ୍। ହେଲେ ବହୁତ୍ ଜାଗାରେ ଇ ସବୁ ଯୋଜନା କାଗଜ କଲମରେ ସୀମିତ ହେଇ ରହିଯାଉଛେ। ଯେନ୍ଥିରଲାଗି ହକ୍ଦାର ହିତାଧିକାରୀ ଯୋଜନାର ସୁଫଲ ପାଏବାରୁ ବଁଚିତ୍ ହେଉଛନ୍। ସେନ୍ତା ଭିନେ ଭିନେ ସମିଆରେ ଗରିବ ଦୁଖିମାନେ ସାଧାରନ୍ ମଉଲିକ ସୁବିଧା ପାଏବାର ଲାଗି ବାରଦୁଆର ହେଉଥିବାର ଦେଖ୍ବାକେ ମିଲୁଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ନୂଆପଡ଼ା ଜିଲା ସିନାପାଲି ବ୍ଲକର ଶରଧାପୁର ଗଁାରେ। ଇ ଗଁାର ସଞ୍ଜୟ ସୁନାନୀ। ସେ ନିହାତି ଗରିବ୍ ହେଇଥିଲାବେଲେ ସବୁ ପରକାର ସରକାରୀ ସୁବିଧା ସୁଯୋଗରୁ ବଁଚିତ ହେଇ ରହିଛନ୍। ଏନ୍ତା କି ତାକର ଜମିବାଡ଼ି, ଘରଡ଼ିହ ବଲି କିଛି ନାଇଁ।
ସୂଚନା ହିସାବେ ଆଏଜ୍କେ ଚାଲିଶ ବଛର ତଲେ ସିନାପାଲି ବ୍ଲକର ସିତଲିଖଳିଆ ଗଁାର ଧର୍ମୁ ସୁନାନୀ ପେଟ୍ ପାଲବାର ଲାଗି କୁଟୁମବସିଆ ଭୋପାଲ ଦାଦନ ଖଟିଯାଇଥିଲେ। ସେଠାନେ କେହେନ୍ସି ରୋଗରେ ପଡ଼ି କୁଟ୍ମର ବଡ଼ଭାଗି ଲୋକ୍ ମରିଗଲେ। ହେଲେ ଭାଏଗ୍ ବଲେ ସଞ୍ଜୟ ସୁନାନୀ ବଁଚି ଯାଇଥିଲେ। ସେଠାନେ ଝନେ ସହୁରୁଦ୍ ଲୋକ ତାହାକୁ ପାଲପୋଷ୍ କରି ରଖିଥିଲେ। ଇ ଖବର ପାଇ ସଞ୍ଜୟର ମାମୁ ସେଠାନୁ ଶରଧାପୁର ନିଜର ଘରକେ ନେଇ ଆସିଥିଲେ। ପଛେ ସଞ୍ଜୟ ୨୦୧୩ ସାଲେ ଧନମତୀକୁଁ ପେମ୍ କରି ବିହା ହେଇଥିଲେ। ସେଦିନ୍ଠାନୁ ସଞ୍ଜୟ ଆର ଧନମତୀକେ ଦୁଇ ପରିବାର ଲୋକ୍ ଘରୁ ତଡ଼ି ଦେଇଛନ୍। ଇଆଡ଼େ ସଞ୍ଜୟର ନଁାରେ ଜମିବାଡ଼ି, ଘରଡ଼ିହ ବଲି କିଛି ନାଇଁ। ଗୁଟେ ମେଲା ଜାଗାରେ କୁରିଆଟେ କରି ସଞ୍ଜୟ ନିଜର ପରିବାରକେ ରଖିଛନ୍। ଏହେଦେ ସଞ୍ଜୟର ପରିବାର କହେଲେ ମାଏକିନା ଧନମତୀ, ଦୁଇ ଛୁଆ ଶିବା(୪) ଆର କରିସ୍ମା(୧) ରହିଛନ୍। ଇଆଡ଼େ ସଞ୍ଜୟ ଯାହା କମାନି କରୁଛନ୍ ସେଟା ପରିବାରକେ ନିହଁଟ୍ ହେଉଛେ, ଏନ୍ତାଥି ଫେର ଘର ଖଁଡ଼େର ଚିନ୍ତା ସବୁବେଲେ ତାହାକୁ ଖାଇଯାଉଛେ। ଖରା, ବରଷା, ଶୀତ କାକରରେ କୁରିଆଟା ପରିବାରର ସାହାଭରସା ପାଲଟିଛେ। ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ସଞ୍ଜୟ ବ୍ଲକରୁ ଜିଲା କାର୍ଯ୍ୟାଳୟକେ ବାରବାର ଦଉଡ଼ି ନିରାଶ ହେଇଥିବାର କହିଛନ୍। ଇ ବାବ୍ଦେ ବ୍ଲକ ଅଧ୍ୟକ୍ଷା ତପସ୍ବିନୀ ମାଝୀକୁଁ ପଚରାଲାରୁ ଘଟନା ବାବ୍ଦେ ତଦଁତ୍ କରି ତାହାକୁ ସରକାରୀ ଯୋଜନାରେ ଘରଖଁଡ଼େ ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ। ହେଲେ ନୂଆପଡ଼ା ଜିଲାର ଝାର ଜଂଗଲ, ତରେଠୁଟେ ଏନ୍ତା କେତେ ଯେ ସଞ୍ଜୟ ସରକାରୀ ସୁବିଧା ସୁଯୋଗରୁ ବଁଚିତ ହେଇ ରହିଛନ୍ ସଠିକ୍ କିଛି କହି ନାଇଁହୁଏ। ଏନ୍ତା ଦୁଖି ଗରିବ୍କୁ ଚିନ୍ହଁଟ କରି ସବୁପରକାର ସରକାରୀ ସୁବିଧା ସୁଯୋଗ ଯୁଗେଇ ଦେବାକେ ଅଂଚଲର ବୁଧିଜୀବୀ ମହଲରେ ମତ ପରକାଶ ପାଉଛେ।
