ବମ୍ବେ: କରନ୍ ଜୋହରଙ୍କ ଫିଲ୍ମ ‘ଷ୍ଟୁଡେଣ୍ଟ ଅଫ୍ ଦ ଇଅର’ରେ ଡେବ୍ୟୁ କରିବା ପରେ ଅନେକ ସଫଳତାର ଫର୍ଦ୍ଦ ଯୋଡ଼ା ହୋଇ ସାରିଲାଣି ଅଭିନେତା ସିଦ୍ଧାର୍ଥ ମଲହୋତ୍ରାଙ୍କ ଅଭିନୟ ଜୀବନରେ। ବିଶେଷକରି ରୋମାଣ୍ଟିକ ହିରୋ ଭୂମିକାରେ ସେ ନଜର ଆସିଥାନ୍ତି। ହେଲେ ଏଥିରେ ବ୍ୟତିକ୍ରମ ସ୍ବରୂପ ସେ ଜଣେ ଯବାନ ଭୂୂମିକାରେ ନିଜର ଆଗାମୀ ଫିଲ୍ମ ‘ଶେରଶାହ’ରେ ନଜର ଆସିବେ। ଗୁରୁବାର ସିଦ୍ଧାର୍ଥଙ୍କ ଜନ୍ମଦିନ ଅବସରରେ ଫିଲ୍ମର ଫାଷ୍ଟ ଲୁକ୍ ରିଲିଜ କରାଯାଇଛି। ଏହାକୁ କରନ-ସିଦ୍ଧାର୍ଥ ନିଜର ସୋସିଆଲ ପୃଷ୍ଠାରେ ଶେୟାର କରିଛନ୍ତି। ଏହାକୁ ଶେୟାର କରିବା ସମୟରେ ସିଦ୍ଧାର୍ଥ କ୍ୟାପ୍ଟେନ ବିକ୍ରମ ବତ୍ରାଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି।
ଫିଲ୍ମର କାହାଣୀକୁ ଦେଖିଲେ ଭାରତୀୟ ଯବାନଙ୍କ ଶ୍ରେଷ୍ଠତାର ପରିଚୟ ଦେଉଥିବା ୧୯୯୯ ମସିହାର କାରଗିଲ ଯୁଦ୍ଧ ବିଜୟ ସମୟର କାହାଣୀ ଉପରେ ଏହା ପର୍ଯ୍ୟବେଶିତ। ଏଥିରେ ସିଦ୍ଧାର୍ଥ କ୍ୟାପ୍ଟେନ ବତ୍ରା ଏବଂ ତାଙ୍କ ଭାଇ ବିଶାଳ ବତ୍ରାଙ୍କ ଭୂମିକାରେ ଅଭିନୟ କରିଛନ୍ତି। ତାଙ୍କ ବ୍ୟତିତ କିଆରା ଆଡଭାଣୀ, ଜାଭେଦ ଜାଫ୍ରି, ହିମାଂଶୁ ମଲହୋତ୍ରା, ପରେଶ ରାଓ୍ବଲ ପ୍ରମୁଖ ନଜର ଆସିବେ। ଫିଲ୍ମର ନିର୍ଦ୍ଦେଶନା ଦେଇଛନ୍ତି ବିଷ୍ଣୁ ବର୍ଦ୍ଧନ। ଜୁଲାଇ ୩ରେ ଏହା ପରଦାକୁ ଆସିବ।
