ନୟାଗଡ଼ ଅଫିସ,୨୮।୧୨: ବୃକ୍ଷ ଓ ପରିବେଶ ସୁରକ୍ଷା ବାର୍ତ୍ତା ନେଇ ପାରାଦୀପରୁ ସାଇକେଲରେ ବ୍ରହ୍ମପୁର ଅଭିୁମୁଖେ ବାହାରିଥିବା ପରିବେଶବିତ ଅମରେଶ ନରେଶ ସାମନ୍ତଙ୍କୁ ଶୁକ୍ରବାର ନୟାଗଡ଼ ଜିଲାର ବିଭିନ୍ନ ଅଞ୍ଚଳରେ ସ୍ବାଗତ କରାଯାଇଥିଲା। ପ୍ରଥମେ ନୟାଗଡ଼ ଠାରେ ପହଞ୍ଚିବା ପରେ ବନ ବିଭାଗ ପକ୍ଷରୁ ତାଙ୍କୁ ସ୍ବାଗତ କରାଯାଇଥିଲା। ନୟାଗଡ଼ ଡିଏଫଓ ଧନରାଜ ଏଚଡି ଓ କର୍ମଚାରୀମାନେ ଅମରେଶଙ୍କୁ ସ୍ବାଗତ କରିବା ସହିତ ପରିବେଶ ପ୍ରତି ତାଙ୍କର ଏହି ଅବଦାନକୁ ସାଧୁବାଦ ଜଣାଇଥିଲେ। ସେହିଭଳି ଅମରେଶ ଶରଣକୁଳଠାରେ ପହଞ୍ଚିବା ପରେ ପଞ୍ଚରିଡ଼ା ରେଞ୍ଜର ଅର୍ଚ୍ଚନା ଗମାଙ୍ଗେ।, ଫ୍ରେଣ୍ଡ୍ସ ହେଲ୍ପ ଗ୍ରୁପ୍ର ସଦସ୍ୟ, ଗ୍ରୀନ କ୍ଲବର ସଦସ୍ୟମାନେ ତାଙ୍କୁ ଶୁଭେଚ୍ଛା ଜଣାଇଥିଲେ। ପ୍ରକାଶ ଯେ ଅମରେଶ ଗତ ୨୧ ତାରିଖଠାରୁ ପରିବେଶ ବିଷୟରେ ଲୋକମାନଙ୍କୁ ସଚେତନତ କରାଇବା ଉଦ୍ଦେଶ୍ୟରେ ପାରାଦୀପରୁ ସାଇକେଲରେ ବାହାରି କେନ୍ଦ୍ରାପଡ଼ା, ରାଜନଗର, ସାତଭାଇଆ ପେଣ୍ଠ, ଭିତରକନିକା, ଢେଙ୍କାନାଳ, କପିଳାସ, ମଙ୍ଗୁଳି, କଟକ, ଭୁବନେଶ୍ୱର, ଖୋର୍ଦ୍ଧା ପରେ ଶୁକ୍ରବାର ନୟାଗଡ଼ରେ ପହଞ୍ଚିଥିଲେ। ୨୯ ତାରିଖ ସୁଦ୍ଧା ସେ ଗଞ୍ଜାମ ଜିଲାର ବିଭିନ୍ନ ଅଞ୍ଚଳ ବୁଲି ଗୋପାଳପୁର ବେଳାଭୂଇଁରେ ପହଞ୍ଚିବେ ବୋଲି ପ୍ରକାଶ କରିଛନ୍ତି। ଅମରେଶ ଏହି ସାଇକେଲ ପରିକ୍ରମାରେ ଜନସାଧାରଣଙ୍କୁ ବୃକ୍ଷରୋପଣ, ପଲିଥିନ ବର୍ଜନ, ବାୟୁ ଓ ଜଳ ପ୍ରଦୂଷଣରୁ ମୁକ୍ତ ରହିବାପାଇଁ ସଚେତନ କରାଉଛନ୍ତି।
