ଭୁବନେଶ୍ୱର,୨୨।୯ (ଅଭୟ ଦାଶ):ଭାରତ ସରକାରଙ୍କ ଖଣି ମନ୍ତ୍ରଣାଳୟ ଅଧୀନ ନବରତ୍ନ କମ୍ପାନୀ ନାଲ୍କୋର ୪୨ତମ ବାର୍ଷିକ ସାଧାରଣ ବୈଠକ ଗୁରୁବାର ଭିସି (ଭର୍ଚୁଆଲ ମୋଡ୍) ଜରିଆରେ ଅନୁଷ୍ଠିତ ହୋଇଯାଇଛି। ଏହି ପରିପ୍ରେକ୍ଷୀରେ କମ୍ପାନୀର ଅଂଶଧନଧାରୀମାନେ ଆର୍ଥିକ ବର୍ଷ ୨୦୨୨-୨୩ ନିମନ୍ତେ ୧୪,୧୪୧ କୋଟି ଟଙ୍କାର ବିକ୍ରୟ କାରବାର ସହ ୧,୫୪୪ କୋଟିର ଲାଭାଂଶ ଏବଂ ୪,୨୧୭ କୋଟି ଟଙ୍କାର ରପ୍ତାନି ସମ୍ବନ୍ଧୀୟ ବାର୍ଷିକ କାରବାରକୁ ଅନୁମୋଦନ କରିଛନ୍ତି। ଏଥିସହ ଇକ୍ୱିଟି ଶେୟାର ପିଛା ୧ ଟଙ୍କା ହିସାବରେ ୨୦% ଚୂଡ଼ାନ୍ତ ଲାଭାଂଶକୁ ମଧ୍ୟ ବୈଠକରେ ଅନୁମୋଦନ କରାଯାଇଛି। ଉଲ୍ଲେଖଯୋଗ୍ୟ, ୨୦୨୨-୨୩ ଆର୍ଥିକ ବର୍ଷରେ କମ୍ପାନୀ ମୋଟ ୯୧୮.୩୨ କୋଟି ଟଙ୍କାର ଲାଭାଂଶ ପ୍ରଦାନ କରିଛି। ଏପରିକି ୨୦୨୨-୨୩ ଆର୍ଥିକ ବର୍ଷରେ ନାଲ୍କୋ ସର୍ବକାଳୀନ ରେକର୍ଡ ବକ୍ସାଇଟ ଉତ୍ତୋଳନ କରିବା ସହ ୨୧.୩ ଲକ୍ଷ ଟନ ଆଲୁମିନା ହାଇଡ୍ରେଟ ଉତ୍ପାଦନ କରିଛି, ଯାହା ଉତ୍ପାଦନ କ୍ଷମତା ବିନିଯୋଗର ୧୦୧.୧% ବୋଲି କୁହାଯାଇଛି। ସେହିପରି ନାଲ୍କୋ ମୋଟ ୪.୬୪ ଲକ୍ଷ ଟନର ଧାତୁ ବିକ୍ରୟ ସହ ଘରୋଇ ବଜାରରେ ସର୍ବକାଳୀନ ରେକର୍ଡ ଧାତୁ ବିକ୍ରି କରିପାରିଛି। ବିଶେଷକରି କାରଖାନାର ଯନ୍ତ୍ରାଂଶଗୁଡ଼ିକ ଠିକ୍ ରକ୍ଷଣାବେକ୍ଷଣ ଯୋଗୁ ୪ ଦଶନ୍ଧିରୁ ଅଧିକ ସମୟ ହୋଇଥିଲେ ମଧ୍ୟ ପୂର୍ଣ୍ଣ କ୍ଷମତାର ଉର୍ଦ୍ଧ୍ୱରେ କାର୍ଯ୍ୟ କରିବା ସହ ଆଶାନ୍ବିତ ଉତ୍ପାଦନ ହାସଲ କରିପାରିଛି। ଏ ସମ୍ପର୍କରେ ନାଲକୋର ଅଧ୍ୟକ୍ଷ ଶ୍ରୀଧର ପାତ୍ର ଅଂଶଧନଧାରୀମାନଙ୍କୁ ସମ୍ବୋଧିତ କରି ସେମାନଙ୍କ ନିରନ୍ତର ବିଶ୍ୱାସ ଓ ନାଲ୍କୋ ସମୁଦାୟର ସହଯୋଗ ବଳରେ କମ୍ପାନୀ ଉଭୟ ଉତ୍ପାଦନ ଓ ବ୍ୟବସାୟିକ ସଫଳତା ହାସଲ କରିପାରିଛି ବୋଲି ପାତ୍ର ମତପ୍ରକାଶ କରିଛନ୍ତି। ସେହଭଳି ସର୍ବନିମ୍ନ ଉତ୍ପାଦନ ଖର୍ଚ୍ଚରେ ବକ୍ସାଇଟ ଓ ଆଲୁମିନା ଉତ୍ପାଦକ ହେବାର ରେକର୍ଡ ନାଲ୍କୋ ପାଖରେ ରହିଛି। ବର୍ତ୍ତମାନ ସମୟରେ କମ୍ପାନୀ ତା’ର ୫ମ ଷ୍ଟ୍ରିମ୍ ରିଫାଇନେରି ପ୍ରକଳ୍ପର ତ୍ୱରିତ ସମାପ୍ତି ଏବଂ ପୋଟାଙ୍ଗି ବକ୍ସାଇଟ୍ ମାଇନ୍ସର ବିକାଶ ଏବଂ ଓଡ଼ିଶାରେ କମ୍ପାନୀର ଅବଶିଷ୍ଟ ଆବଣ୍ଟିତ କୋଇଲା ବ୍ଲକକୁ କାର୍ଯ୍ୟକ୍ଷମ କରିବା ଉପରେ ଗୁରୁତ୍ୱ ଦେଉଛି ବୋଲି ପାତ୍ର କହିଛନ୍ତି।
