କେସିଙ୍ଗା, ୧୭।୧୨ (ଡି.ଏନ୍.ଏ.)-
କଳାହାଣ୍ଡି ଜିଲା କେସିଙ୍ଗା ବ୍ଲକ ଉତ୍କେଲା ପଁଚେତ୍ ଅଧୀନ ରିଗିଡ଼ିମାଲ ପଡ଼ର ବିଧବା ମହିଲା ଦମୟନ୍ତୀ ଜାନୀ। ସେ ୨ ବଛର ତଲେ ଆପ୍ନେ ଅଜିତ ଜାନୀକୁଁ ହରେଇଛନ୍। ଏନ୍ତାଥି ସେ ଦୁଇ ପୁଓକୁ ଧରି ବଡ଼ା ଗୁଲ୍ଗୁଲା ହେଇ ଦିନ୍ ବିତଉଛନ୍। ଇଆଡ଼େ ସବୁ ପରକାର ସରକାରୀ ସୁବିଧା ସୁଯୋଗରୁ ବଁଚିତ୍ ଥିବାର ସେ ଅଭିଯୋଗ କରିଛନ୍।
ସୂଚନା ଅନ୍ସାରେ ରିଗିଡ଼ିମାଲ ପଡ଼ାର ବିଧବା ମହିଲା ଦମୟନ୍ତୀ ଜାନୀ(୨୯)କଁର ପରିବାର କହେଲେ ପୁଓ ଧର୍ମାନନ୍ଦ(୭) ଆର ଓମପ୍ରକାଶ(୪)କେ ନେଇ ସଁସାର। ୨ ବଛର ତଲେ ଆପ୍ନେ ଅଜିତ ଜାନୀ କିଡ୍ନୀ ରୋଗ୍ରେ ପଡ଼ି ଆରପାରକେ ଚାଲିଯାଇଛନ୍। ପରିବାରଟା ନିହାତି ଗରିବ୍, ଜମିବାଡ଼ି ବଲି କିଛି ନାଇଁ। ସଖାଲ ପାଏଲେ ଦମୟନ୍ତୀ ପରହର ଗୁତି କରି ଯାହା ଆନୁଛନ୍ ସେଥ୍ରେ ଛୁଆକୁ ପାଲପୋଷ କରବାର ସଂଗେ ପାଠ୍ ପଢ଼ଉଛନ୍। ବଡ଼ ପୁଓ ଧର୍ମାନନ୍ଦ ଗଁାରୁ ଏକ କି.ମି. ଦୂରିଆ କନ୍ଦେଇମାଲ ପ୍ରାଥମିକ ସ୍କୁଲକେ ପଢ଼ି ଯାଉଛନ୍। ସେନ୍ତା ସାନ୍ପୁଓକେ ଧରି ଦମୟନ୍ତୀ ପରହର କାମ୍ବୁତା କରୁଛନ୍। ହେଲେ ଦମୟନ୍ତୀ ଆଏଜ୍ତକ ହରିଶ୍ଚନ୍ଦ୍ର ଯୋଜନାର ସାହାଯ୍ ନାଇଁପାଇ। ସେନ୍ତା ବିଧବା ଭତାର ଲାଗି ପଁଚେତ୍କେ ଦଉଡ଼ି ଦଉଡ଼ି ନିରାଶ ହେଇଥିବାର ସେ ଅଭିଯୋଗ କହିଛନ୍। ସବୁଥିରୁ ଦୁଖର କଥା ଗଲା ମାସୁ ଉତ୍କେଲା ପଁଚେତ୍ରୁ ପରିବାର ପାଉଥିବାର ୧୦ କେ.ଜି. ଚାଉଲ ବି ବଁଦ୍ ହେଇଯାଇଛେ। ଏନ୍ତାଥି ୩ ପରାନୀ କୁଟୁମ ବଡ଼ା ଗୁଲ୍ଗୁଲା ହେଇ ଦିନ୍ ବିତଉଛନ୍। ଯେନ୍ମାନକର ପକାଘର ଅଛେ ସେମାନକୁ ଆବାସ ଯୋଜନାରେ ସାମିଲ କରାଯାଉଛେ, ପିଡିଏସ୍ ଚାଉଲ ଆର କାଳିଆ ଟଁକା ଦିଆଯାଉଛେ। ହେଲେ ଆମର ଲେଖେଁ ନିହାତି ଗରିବ୍ ଦୁଖିକୁ ରାଏଜ୍ ସରକାର, ପରଶାସନ ଅନ୍ଦେଖା କରୁଛେ ବଲି ଦମୟନ୍ତୀ ଅଭିଯୋଗ କରିଛନ୍। ଇ ବାବ୍ଦେ ଉତ୍କେଲା ପଁଚେତ୍ କାର୍ଯ୍ୟ ନିର୍ବାହୀ ଅଧ୍କାରୀକୁଁ ପଚ୍ରାଲାରୁ ଜାନୁୟାରୀରୁ ଦମୟନ୍ତୀକୁଁ ବିଧବା ଭତା ମିଲବା, ପିଡିଏସ୍ ଚାଉଲ ବାବ୍ଦେ ଯୋଗାଣ ବିଭାଗକେ ପଚ୍ରାବାକେ ପଡ଼ବା ବଲି ସେ କହିଥିଲେ। ଜିଲା ପରଶାସନ ଇ ଦୁଖି ପରିବାର ଉପରେ ଦୁରୁଷ୍ଟି ଦେଇ ଆବାସ ଯୋଜନାରେ ସାମିଲ କରବାର ସଂଗେ ମାସିକ ୩୫ କେ.ଜି. ଚାଉଲ ଆର ଦମୟନ୍ତୀକୁଁ ବିଧବା ଭତା ଯୁଗେଇ ଦେବାକେ ଗଁାବାସୀ ଦାବି କରିଛନ୍।
