ଢେଙ୍କାନାଳ ଅଫିସ, ୨୨।୧୨ – ଢେଙ୍କାନାଳ ସମଗ୍ର ଶିକ୍ଷା କାର୍ଯ୍ୟାଳୟ ସଭାଗୃହରେ ଶନିବାର ଜିଲାସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଜିଲାପାଳ ଭୂମେଶ ଚନ୍ଦ୍ର ବେହେରା ଅଧ୍ୟକ୍ଷତା କରିଥିଲେ। ଜିଲାର କେତେକ ସ୍କୁଲରେ ସମସ୍ୟା ଲାଗି ରହିଛି। ସମ୍ପୃକ୍ତ ବ୍ଲକର ବିଇଓମାନେ ବ୍ୟକ୍ତିଗତ ଭାବେ ଉପସ୍ଥିତ ରହି ଏହାର ସମାଧାନ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି।
ସାଥ୍-ଇ ଟିମ୍ ସର୍ବେକ୍ଷଣରେ ଢେଙ୍କାନାଳ ଜିଲା ୬ମାସ ଧରି ୧ନଂ. ସ୍ଥାନରେ ରହିଥିଲା। ଅକ୍ଟୋବର ଓ ନଭେମ୍ବରରେ ଜିଲା ଦ୍ୱିତୀୟ ସ୍ଥାନକୁ ଖସିଆସିଛି। ମିଳିତ ପ୍ରୟାସ ମାଧ୍ୟମରେ ଜିଲାକୁ ପୂର୍ବସ୍ଥିତିକୁ ଫେରାଇ ଆଣିବା ଦିଗରେ ଉଦ୍ୟମ କରିବାକୁ ଜିଲାପାଳ ଆହ୍ବାନ ଦେଇଥିଲେ। ବ୍ଲକୱାରି ସମୀକ୍ଷା କରି ମାପକରେ ଉନ୍ନତି ଆଣିବାକୁ ଜିଲାପାଳ ପରାମର୍ଶ ଦେଇଛନ୍ତି। ନଭେମ୍ବରରେ ହାରାହାରି ସଫଳତାଭିତ୍ତିରେ ଓଡ଼ାପଡ଼ା ବ୍ଲକ ଜିଲାରେ ପ୍ରଥମ ଏବଂ ରାଜ୍ୟରେ ୨୦ତମ ସ୍ଥାନରେ ରହିଛି। ଆସନ୍ତା ମାସରୁ ପ୍ରଥମ ସ୍ଥାନରେ ରହୁଥିବା ୩ ବ୍ଲକକୁ ପ୍ରଶଂସାପତ୍ର ଦିଆଯିବ। ଶେଷସ୍ଥାନରେ ରହିଥିବା ୩ବ୍ଲକକୁ କାରଣ ଦର୍ଶାଅ ନୋଟିସ ଜାରି କରାଯିବ। କାର୍ଯ୍ୟକ୍ରମ ଅଧୀନରେ ବିଦ୍ୟାଳୟରେ ୧୦୦% ବିଦ୍ୟୁତ୍ ସଂଯୋଗ, ଶୌଚାଳୟରେ ପରିଚ୍ଛନ୍ନତା ରକ୍ଷା, ଆଧାର ପଞ୍ଜୀକରଣ, ଉପସ୍ଥାନ ବୃଦ୍ଧି ଦିଗରେ ଯଥାବିଧି ଦୃଷ୍ଟି ଦେବାକୁ ମଣ୍ଡଳ ଶିକ୍ଷାଧିକାରୀ, ଗୋଷ୍ଠୀ ଶିକ୍ଷା ସଂଯୋଜକଙ୍କୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଏହି ଅବସରରେ ବିଦ୍ୟାଳୟର ଦୈନିକ ତଥ୍ୟ ମୋବାଇଲ ମାଧ୍ୟମରେ ପ୍ରଦାନ ନେଇ ପ୍ରଧାନ ଶିକ୍ଷକଙ୍କୁ ତାଲିମ ପ୍ରଦାନ କରାଯାଇଥିଲା।
ବୈଠକରେ ଜିଲା ଶିକ୍ଷାଧିକାରୀ ସୁଧାନନ୍ଦ ପରିଡ଼ା, ଜିଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନର ଅଧ୍ୟକ୍ଷ ସଚ୍ଚିଦାନନ୍ଦ ମିଶ୍ର, ସାଥ୍-ଇ ଟିମ୍ ପକ୍ଷରୁ ତେଜସ୍ବିନୀ ପାଣିଗ୍ରାହୀ, ସମସ୍ତ ମଣ୍ଡଳ ଶିକ୍ଷାଧିକାରୀ, ଗୋଷ୍ଠୀ ଶିକ୍ଷା ସଂଯୋଜକ, ବ୍ଲକ ଯୋଜନା ସଂଯୋଜକ, ସମଗ୍ର ଶିକ୍ଷାର କର୍ମକର୍ତ୍ତାମାନେ ଉପସ୍ଥିତ ଥିଲେ।
