ନୂଆଦିଲ୍ଲୀ,୧୫-୮: ବୟନଶିଳ୍ପ କ୍ଷେତ୍ରରେ ଯୁବତୀଯୁବକଙ୍କୁ ଦକ୍ଷ କରିବା ଲାଗି କେନ୍ଦ୍ର ବୟନଶିଳ୍ପ ମନ୍ତ୍ରଣାଳୟ ପକ୍ଷରୁ ଏକ ‘ସମର୍ଥ ଯୋଜନା’ ହାତକୁ ନିଆଯାଇଛି। ଏହି ଯୋଜନା ଅଧୀନରେ ଦେଶର ୪ ଲକ୍ଷ ଯୁବତୀଯୁବତୀଙ୍କ ଦକ୍ଷତା ବୃଦ୍ଧି ପାଇଁ ସେମାନଙ୍କୁ ପ୍ରଶିକ୍ଷଣ ଦିଆଯିବ। ଏଥିପାଇଁ ଓଡ଼ିଶା ସମେତ ୧୮ ରାଜ୍ୟ ସହ କେନ୍ଦ୍ର ସରକାର ଚୁକ୍ତି ସ୍ବାକ୍ଷର କରିଛନ୍ତି। କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କ ଉପସ୍ଥିତିରେ ବୁଧବାର ଏହି ଚୁକ୍ତି ସ୍ବାକ୍ଷର ହୋଇଛି। ବୟନଶିଳ୍ପ କ୍ଷେତ୍ରରେ କାର୍ଯ୍ୟରତ ଶ୍ରମିକଙ୍କୁ କୁଶଳ କାରିଗର ଭାବେ ଗଢ଼ିତୋଳିବା ଏହି ଯୋଜନାର ଲକ୍ଷ୍ୟ ବୋଲି କୁହାଯାଉଛି। ଏହି ଅବସରରେ କେନ୍ଦ୍ରମନ୍ତ୍ରୀ ଇରାନୀ କହିଛନ୍ତି ଯେ, ରାଜ୍ୟ ସରକାରଗୁଡ଼ିକର ପ୍ରତିନିଧି ଏଠାରେ ଉପସ୍ଥିତ ହୋଇ ନିଜର ତତ୍ପରତା ଦର୍ଶାଇଛନ୍ତି। କେନ୍ଦ୍ର ସରକାର ସମେତ ସମସ୍ତ ୧୮ ରାଜ୍ୟ ସରକାର ଗୋଟିଏ ଛାତ ତଳେ ରହି ୪ ଲକ୍ଷ ଲୋକଙ୍କୁ ଦକ୍ଷ କରିବା ଲାଗି ସଙ୍କଳ୍ପ ନେଇଛନ୍ତି। ତାଙ୍କ ମତରେ ଏହା ଦେଶର ଇତିହାସରେ ଅବ୍ୟାବଧି ନିଆଯାଇଥିବା ସବୁଠୁ ବଡ଼ ପଦକ୍ଷେପ। ସ୍ବାକ୍ଷର କରିଥିବା ରାଜ୍ୟଗୁଡ଼ିକ ହେଲେ ଓଡ଼ିଶା, ଅରୁଣାଚଳ ପ୍ରଦେଶ, ଜମ୍ମୁ-କଶ୍ମୀର, କେରଳ, ମିଜୋରାମ, ତାମିଲନାଡୁ, ତେଲେଙ୍ଗାନା, ଉତ୍ତର ପ୍ରଦେଶ, ଆନ୍ଧ୍ରପ୍ରଦେଶ, ଆସାମ, ମଧ୍ୟପ୍ରଦେଶ,ତ୍ରିପୁରା, କର୍ନାଟକ, ମଣିପୁର,ହରିୟାଣା, ମେଘାଳୟ, ଝାଡ଼ଖଣ୍ଡ ଓ ଉତ୍ତରାଖଣ୍ଡ। ବୟନଶିଳ୍ପ କ୍ଷେତ୍ରରେ ଜଡିତ ଶ୍ରମିକଙ୍କୁ ବସ୍ତ୍ର ନିର୍ମାଣ, ବୁଣା ହୋଇଥିବା ବସ୍ତ୍ର, ଧାତୁ ହସ୍ତକଳା, ହସ୍ତତନ୍ତ, ହସ୍ତକଳା ଓ କାର୍ପେଟ ଆଦି ନିର୍ମାଣ କୌଶଳ ସମ୍ପର୍କରେ ପ୍ରଶିକ୍ଷଣ ଦିଆଯିବ। ଜୀବନଧାରଣ ପାଇଁ କାର୍ଯ୍ୟରତ ଶ୍ରମିକଙ୍କୁ ଦକ୍ଷ କରିବା ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୋର୍ ଦେଉଥିବା ଇରାନୀ କହିଛନ୍ତି।
