ସିନାପାଲି, ୨୯।୭ (ଡି.ଏନ୍.ଏ): ନୂଆପଡ଼ା ଜିଲା ସିନାପାଲି ବ୍ଲକର ଅନେକ ଅଙ୍ଗନଓ୍ବାଡି କେନ୍ଦ୍ରର ନିଜର ଘର ନଁାଇଁନ। ଯେନ୍ଥିରଲାଗି ଅନେକ କେନ୍ଦ୍ର ଭଡ଼ା ଘରେ ଚାଲୁଥିଲାବେଲେ ସେଠାନେ ଛୁଆକର ପାଠ୍ପଢ଼ା ସଂଗେ ରଁଧା ଖାଏଦ୍ ଦିଆଯାଉଛେ। ଇ ବାବ୍ଦେ ବାରବାର ପରଶାସନକେ ଅଭିଯୋଗ କଲେ ବି କିଛି ଲାଭ ନାଇଁ ହେଉଥିବାର କେତେ ଗଁାବାସୀ କହିଛନ୍।
ସୂଚନା ହିସାବେ ସିନାପାଲି ବ୍ଲକ ସଦରନୁ ୧୦ କି.ମି. ଦୂରେ ପାହାଡ଼ ଜଂଗଲ ଭିତରେ ରହିଛେ ଖଇରପଦର ଗଁା। ଇ ଗଁାର ଅଙ୍ଗନଓ୍ବାଡି କେନ୍ଦ୍ର(କ)ରେ ଏହେଦେ ୪୦ ଛାତ୍ରୀଛାତ୍ର ପାଠ୍ ପଢ଼ୁଛନ୍। ହେଲେ କେନ୍ଦ୍ରର ନିଜର ଘର ନାଇଁଥିବାର ଲାଗି ଗଁାର ଝନକର ଇନ୍ଦିରା ଆବାସ ଘରେ କେନ୍ଦ୍ରଟା ଭଡ଼ାରେ ଚାଲୁଛେ। ଇ କେନ୍ଦ୍ରର ପୁରନା କୁଠାଟା ଦଦ୍ରା ହେଲାରୁ ବିପଦ୍ ଦେଖେଇ ୨୦୧୬ରେ ବଁଦ୍ କରିଦିଆଗଲା। ହେଲେ ଆଏଜ୍କେ ୩ ବଛର ବିତିଯାଇଥିଲେ ବି ନୂତନ କୁଠା ତିଆରି ଦିଗେ ପରଶାସନ ପଦକ୍ଷେପ ନାଇଁ ନେବାର। ଗଁାବାସୀକର କହିବାର ହିସାବେ ଇ ଅସ୍ତାଇ କେନ୍ଦ୍ରରେ ରଁଧାବଢ଼ା ସୁବିଧା ନଁାଇଁନ, ପାଚିକା ନିଜର ଘରୁ ରଁଧା ଖାଏଦ୍ ଆନି ଛୁଆକୁ ଦେଉଛନ୍। କେନ୍ଦ୍ରଟା ଚାଲୁଥିବାର ଇନ୍ଦିରା ଅବାସ ଘରଟା ମାଟି ଆର ଇଟାରେ ତିଆର ହେଇଛେ। ଘରର କଁାଥିମାନ ବି ସିମେଟ ଛପେଇ ନାଇଁ ହେଇ। ଅଲପ ବରଷାରେ ଛାତୁ ପାଏନ୍ ଗଲବାର ସଂଗେ ମୁଖିଆ ଦୁଆର ହେଇ ଭିତରକେ ପାଏନ୍ ଢୁକୁଛେ। ଯେନ୍ଥିରଲାଗି କେନ୍ଦ୍ରରେ ପାଠ୍ପଢ଼ୁଥିବାର ଛୋଟ ଛୋଟ ଛୁଆମାନେ ଭିନେ ଭିନେ ସମିଆରେ ବଡ଼ା ହଇରାନ ହରକତ ହେଉଥିବାର ଗଁାବାସୀ ଅଭିଯୋଗ କରିଛନ୍। ସେନ୍ତା କଇଁଟପଦର ଅଙ୍ଗନଓ୍ବାଡି କେନ୍ଦ୍ରର ବି ନିଜର ଘର ନଁାଇଁନ। ଇ କେନ୍ଦ୍ରଟା ବି ଝନକର ଇନ୍ଦିରା ଆବାସ ଘରର ବାରନ୍ଡ଼ାରେ ଚାଲିଛେ। ସେନ୍ତା ଦର୍ଲିପଡ଼ା ଅଙ୍ଗନଓ୍ବାଡି କେନ୍ଦ୍ରର ଘର ଅଭାବୁ ଜଂଗଲ ବିଭାଗର ଗୁଟେ ଫରେଷ୍ଟ ଗାର୍ଡ କୁଠିଥି ଚାଲିଛେ। ଇ ସବୁ ଦୁରୁଶ୍ ଦେଖ୍ଲେ ଝନେ ସାଧାରନ୍ ଲୋକ ସହଜେ ବୁଝିପାରବା ଯେ, ସିନାପାଲି ବ୍ଲକରେ ସମନ୍ବିତ ଶିଶୁ ବିକାଶ ସେବା ଯୋଜନା କେନ୍ଥେଇ ଚାଲିଛେ। କେନ୍ଦ୍ର ଆର ରାଏଜ୍ ସରକାର ଇ ଯୋଜନାରେ କୋଟି କୋଟି ଟଁକା ଖରଚ୍ କରୁଥିଲାବେଲେ ଥାନୀୟ ପରଶାସନିକ ଅଧ୍କାରୀମାନକର ଖାମଖିଆଲି ମନଭାବ ଯୋଜନାକେ ବାଟବନା କରୁଛେ। ଇ ବାବ୍ଦେ ସିନାପାଲି ସମନ୍ବିତ ଶିଶୁ ବିକାଶ ଅଧ୍କାରିଣୀକୁଁ ପଚରାଲାରୁ ଘଟନାର ତଦଁତ୍ କରବାର ଲାଗି ଇ କେନ୍ଦ୍ରମାନକେ ଯିମି। ଯେତେ ଜଲଦି ହେବା କେନ୍ଦ୍ରମାନକର ଘର ତିଆରି ଲାଗି ଉଚ କତୁରପକ୍ଷକୁଁ ଜନାମି ବଲି ସେ କହିଥିଲେ। ସେନ୍ତା ଇ ବାବ୍ଦେ ଖଇରପଦର ପଁଚେତ୍ର କର୍ଯ୍ୟନିର୍ବାହୀ ଅଧ୍କାରୀ ସତ୍ୟ ମାଝିକୁଁ ପଚରାଲାରୁ ପଁଚେତ୍ ତରଫୁ ଦେଢ଼ ଲାଖ୍ ଟଁକାର ଖରଚ୍ ଅଟକଲ କରାଯାଇଛେ। ହେଲେ ଅଙ୍ଗନଓ୍ବାଡି କରମୀ ମରାମତି ଜାଗାରେ ନୂତନ କୁଠା ତିଆର କରବାର ଲାଗି କହୁଛନ୍, ସେଥିରଲାଗି ଡେରି ହେଉଛେ ବଲି ସେ କହିଥିଲେ।
