କରାଚୀ, ୧୬ା୬ (ପି.ଟି.)-ଇଂଲଣ୍ଡ ଟୁର୍ ବେଳେ ଖେଳାଳି ଓ ଅଫିସିଆଲମାନେ ସେମାନଙ୍କ ସାଥିରେ ପରିବାର ନେଇ ଯିବାକୁ ଅନୁମତି ଦେବ ନାହିଁ ପାକିସ୍ତାନ କ୍ରିକେଟ ବୋର୍ଡ (ପିସିବି)। କୋଭିଡ୍-୧୯ ଦୃଷ୍ଟିରୁ ସତର୍କତାମୂଳକ ପଦକ୍ଷେପ ସ୍ବରୂପ ଏହି ନିଷ୍ପତ୍ତି ନିଆଯାଇଛି। ଚଳିତ ମାସ ଶେଷ ଭାଗରେ ୨୯ ଖେଳାଳି ଓ ୧୪ଅଫିସିଆଲଙ୍କୁ ଏକ ସ୍ବତନ୍ତ୍ର ଚାଟର୍ଡ ବିମାନରେ ଇଂଲଣ୍ଡ ଆଣିବା ଲାଗି ଇଂଲିଶ କ୍ରିକେଟ ବୋର୍ଡ (ଇସିବି)ପ୍ରାୟ ୫ ଲକ୍ଷ ପାଉଣ୍ଡ ଖର୍ଚ୍ଚ କରୁଥିବା କୁହାଯାଉଛି।
ପିସିବି ପକ୍ଷରୁ ସ୍ପଷ୍ଟ କରାଯାଇଛି ଯେ, ଖେଳାଳିମାନଙ୍କ ସହ ସେମାନଙ୍କ ପରିବାର ଇଂଲଣ୍ଡ ଗସ୍ତରେ ଯିବା କିଛି ମାନେ ନାହିଁ। କାରଣ କୋଭିଡ୍-୧୯ ଯୋଗୁ ସେଠାରେ ଖେଳାଳିମାନଙ୍କୁ ଅଲଗା ରଖାଯିବାର ବ୍ୟବସ୍ଥା ହୋଇଛି। ପରିବାର ସଦସ୍ୟଙ୍କ ସହ ଖେଳାଳିମାନେ କଥାବାର୍ତ୍ତା ହୋଇପାରିବେ ନାହିଁ। ଏହି ଟୁର ସେପ୍ଟେମ୍ବରରେ ଶେଷ ହେବ। ଇଂଲଣ୍ଡରେ ପାକିସ୍ତାନ ୩ ଟେଷ୍ଟ ଏବଂ ସମାନ ସଂଖ୍ୟକ ଟି୨୦ ଖେଳିବ। କୋଭିଡ୍-୧୯ ମହାମାରୀ ଆଶଙ୍କା ଯୋଗୁ ଜୈବ-ସୁରକ୍ଷା ପରିବେଶ ମଧ୍ୟରେ ଏହି ସିରିଜ ଜୁଲାଇ ୩୦ରୁ ଆରମ୍ଭ ହେବ। ବୋର୍ଡ ଖେଳାଳିମାନଙ୍କୁ କହିଛି ସେମାନେ ଇଂଲଣ୍ଡରେ ପହଞ୍ଚତ୍ବାମାତ୍ରେ ବର୍ମିଂହାମ୍ରେ ୧୪ ଦିନ କ୍ୱାରାଣ୍ଟାଇନ୍ରେ ରହିବେ। ସେଠାରୁ ସେମାନେ ମାଞ୍ଚେଷ୍ଟର ଯାଇ ଆଇସୋଲେଶନରେ ୩ ରୁ ୪ ସପ୍ତାହ ରହି ପ୍ରାକ୍ଟିସ ଓ ଟ୍ରେନିଂ କରିବେ।
