ନୂଆଦିଲ୍ଲୀ,୧୩-୧୦: ଦେଶର ବିତ୍ତୀୟ ନିଅଣ୍ଟ ବଢୁଥିବା ବେଳେ ଏହା ଘରୋଇ ବଜାରକୁ ଖରାପସ୍ଥିତି ଆଡକୁ ଟାଣି ନେଉଛି। ଏଭଳି ବିଭିନ୍ନ କାରଣ ଲାଗି ଭାରତର ଅର୍ଥ ବ୍ୟବସ୍ଥା ଘୋର ସଙ୍କଟ ଆଡକୁ ଗତି କରୁଛି। ବିମୁଦ୍ରୀକରଣ ଏବଂ ଠିକ୍ ଭାବେ କାର୍ଯ୍ୟକାରୀ ହୋଇ ନ ଥିବା ଜିଏସ୍ଟି ମାନ୍ଦାବସ୍ଥାର କାରଣ ହୋଇଛି ବୋଲି ରିଜର୍ଭ ବ୍ୟାଙ୍କର ପୂର୍ବତନ ଗଭର୍ନର ରଘୁରାମ ରାଜନ ଶନିବାର କହିଛନ୍ତି। ବ୍ରାଉନ ୟୁନିଭର୍ସିଟିଠାରେ ଓପି ଜିନ୍ଦଲ ଲେକଚର କାର୍ଯ୍ୟକ୍ରମରେ ସେ କହିଛନ୍ତି, ଭାରତରେ ଅର୍ଥନୈତିକ ଦୃଷ୍ଟିଭଙ୍ଗୀ ଠିକ୍ ନ ରହିବା ଯୋଗୁ ଏହା ଦେଶକୁ ଅସୁବିଧା ସ୍ଥିତି ଆଡକୁ ଟାଣି ନେଉଛି। ଦେଶର ଜିଡିପି ଅଭିବୃଦ୍ଧି ୨୦୧୬ର ପ୍ରଥମ ତ୍ରୈମାସରେ ୯% ଥିବା ବେଳେ ଏଥିରେ କ୍ରମାଗତ ଭାବେ ହ୍ରାସ ପାଇ ଚାଲିଛି। ଭାରତ ଏହାର ଅର୍ଥନୈତିକ ଅଭିବୃଦ୍ଧି ଧାରାକୁ ହରାଇଛି। ଠିକ୍ ଭାବେ ଅର୍ଥନୈତିକ ଲକ୍ଷ୍ୟ ନ ରଖି କ୍ଷମତା କେନ୍ଦ୍ରୀକରଣ ସହ କାର୍ଯ୍ୟ କରିବା ଫଳରେ ଏଭଳି ସ୍ଥିତି ଉପୁଜିଛି।
ଚଳିତ ବର୍ଷ ଏପ୍ରିଲ-ଜୁନ ତ୍ରୈମାସରେ ଦେଶର ଅଭିବୃଦ୍ଧି ହାର ୬ ବର୍ଷର ସର୍ବନିମ୍ନ ସ୍ତର ୫% ରହିଛି। ଏହା ଜୁଲାଇ ସେପ୍ଟେମ୍ବରରେ ୫.୩% ରହିବା ନେଇ ଆକଳନ କରାଯାଇଛି। ଅଗଷ୍ଟରେ ଔଦ୍ୟୋଗିକ ଅଭିବୃଦ୍ଧି ନକାରାତ୍ମକ ସ୍ଥିତିରେ ରହିବା ସହ ୧.୧%କୁ ଖସି ଆସିଛି। ରେଟିଂ ଏଜେନ୍ସି ମୁଡିସ୍ ଭାରତର ଜିଡିପି ଅଭିବୃଦ୍ଧି ଆକଳନକୁ କମାଇବା ସହ ୬.୨%ରୁ ୫.୮% ଖସାଇଛି। ଚାହିଦା ହ୍ରାସ, ନିଯୁକ୍ତି କମ୍ ହେବା ଏବଂ ଗ୍ରାମାଞ୍ଚଳ ପରିବାରଗୁଡିକରେ ଆର୍ଥତ୍କ ସ୍ଥିତି ଖରାପ ହେବାରୁ ମୁଡିସ ଏଭଳି ମତ ରଖିଛି। ଗତ ସପ୍ତାହରେ ରିଜର୍ଭ ବ୍ୟାଙ୍କ ଦେଶର ଜିଡିପି ଅଭିବୃଦ୍ଧି ଆକଳନକୁ ମଧ୍ୟ ୬.୮%ରୁ ୬.୧%କୁ ହ୍ରାସ କରିଛି। ରାଜନ କହିଛନ୍ତି, ଦେଶରେ ଲାଗି ରହିଥିବା ପୁରୁଣା ଆର୍ଥତ୍କ ସମସ୍ୟାଗୁଡିକୁ ସମାଧାନ କରାଯାଇ ନାହିଁ। କ୍ଷତିଗ୍ରସ୍ତ ଆର୍ଥତ୍କ ଏବଂ ଶକ୍ତି କ୍ଷେତ୍ରକୁ ତୁରନ୍ତ ଭିତ୍ତିରେ ଧ୍ୟାନ ଦେବାର ଆବଶ୍ୟକତା ରହିଛି। ମାତ୍ର ଏଭଳି ସ୍ଥିତିରେ ଭାରତ ଅଭିବୃଦ୍ଧିର ନୂଆ ଉତ୍ସକୁ ଚିହ୍ନି ପାରୁନାହିଁ। ଦେଶରେ ନିବେଶ ହ୍ରାସ, ଚାହିଦାରେ ଗଭୀର ପ୍ରଭାବ, ରପ୍ତାନି ହ୍ରାସ ଏବଂ ଏନ୍ବିଏଫ୍ସି ସମସ୍ୟା ଉପରେ ରାଜନ ଉଦବେଗ ପ୍ରକାଶ କରିବା ସହ ବିମୁଦ୍ରୀକରଣ ଏବଂ ଠିକ୍ ଭାବେ କାର୍ଯ୍ୟକାରୀ ହୋଇ ନ ଥିବା ଜିଏସ୍ଟି ଦ୍ୱାରା ଅର୍ଥ ବ୍ୟବସ୍ଥା କିଭଳି ପ୍ରଭାବିତ ହୋଇଛି ସେ ଉପରେ ମତ ଦେଇଛନ୍ତି। ବିମୁଦ୍ରୀକରଣର ଉଦାହରଣ ଦେଇ ସେ କହିଛନ୍ତି, କେନ୍ଦ୍ରୀକୃତ ତଥା ଏକାକୀ ଭାବେ କୌଣସି କଥା ଚିନ୍ତା ନ କରି ସରକାର ଏହାକୁ ଲାଗୁ କଲେ। ମାତ୍ର ତାର ପ୍ରଭାବ ଅର୍ଥବ୍ୟବସ୍ଥାକୁ ସହିବାକୁ ପଡୁଛି। ବିମୁଦ୍ରୀକରଣ ପରେ ସରକାର ଜିଏସ୍ଟିକୁ ଠିକ୍ ଭାବେ ଲାଗୁ ନ କରାଇବା କାରଣରୁ ଏହା ଅର୍ଥ ବ୍ୟବସ୍ଥାର ମେରୁଦଣ୍ଡକୁ ଭାଙ୍ଗିଥିବା ସେ ମତ ଦେଇଛନ୍ତି। ମୋଦିଙ୍କ ନେତୃତ୍ୱାଧୀନ ସରକାର ଦେଶର ଅଭିବୃଦ୍ଧିକୁ ଧ୍ୟାନ ଦେବା ପରିବର୍ତ୍ତେ ବଣ୍ଟନ ଏବଂ ଲୋକ ମଙ୍ଗଳକୁ ଅଧିକ ପ୍ରାଥମିକତା ଦେଉଛନ୍ତି। ରାଜସ୍ବ କମ୍ ରହିଥିବା ବେଳେ ଯୋଜନାଗୁଡିକରେ ଖର୍ଚ୍ଚ କରିବାର ଯଥାର୍ଥତାକୁ ନେଇ ପ୍ରଶ୍ନ ଉଠାଇଛନ୍ତି।
