ନୂଆଦିଲ୍ଲୀ,୨୪ା୪(ପି.ଟି.): ସଂରକ୍ଷଣ ସୁବିଧା ପାଇଆସୁଥିବା ଜାତି ତାଲିକାର ନା ସମୀକ୍ଷା କରାଯାଉଛି, ନା ସଂରକ୍ଷଣ ବ୍ୟବସ୍ଥାର ଅନ୍ତ ହେଉଛି। ଏହାକୁ ନେଇ ଦେଶରେ ସୃଷ୍ଟି ହୋଇଥିବା ଚ୍ୟାଲେଞ୍ଜର ସମ୍ମୁଖୀନ ହେବା ଲାଗି ନିର୍ବାଚିତ ସରକାରଙ୍କର କ୍ୱଚିତ ରାଜନୈତିକ ଇଚ୍ଛାଶକ୍ତି ରହିଛି। ସଂରକ୍ଷଣ ସୁବିଧା ପ୍ରକୃତ ଗରିବ ଓ ଅନଗ୍ରସର ପାଇବା ଲାଗି ଏହି ତାଲିକାରେ ସଂଶୋଧନ ହେବା ଆବଶ୍ୟକ ବୋଲି ସୁପ୍ରିମକୋର୍ଟ କହିଛନ୍ତି।
ସମାଜରେ ଅବହେଳିତ ଓ ପାତରଅନ୍ତରର ଶିକାର ହୋଇ ଆସୁଥିବା ଅନୁସୂଚିତ ଜାତି, ଜନଜାତି, ପଛୁଆ ବର୍ଗଙ୍କୁ ସୁବିଧା ଦେବା ଲାଗି ସଂରକ୍ଷଣ ବ୍ୟବସ୍ଥା ପ୍ରଚଳନ ହୋଇଥିଲା। ଏହାଦ୍ୱାରା ୧୦ ବର୍ଷ ମଧ୍ୟରେ ଦେଶରୁ ସାମାଜିକ ଅସମାନତା, ଅର୍ଥନୈତିକ ଅନଗ୍ରସରତା ଦୂର ହୋଇଯିବ ବୋଲି ଲକ୍ଷ୍ୟ ରଖାଯାଇଥିଲା। ପରେ ଏଥିରେ ସଂଶୋଧନ କରାଯାଇ ସମୟସୀମା ବଢ଼ାଗଲା। କିନ୍ତୁ ସମୀକ୍ଷା କରାଗଲା ନାହିଁ କି ସଂରକ୍ଷଣ ବ୍ୟବସ୍ଥାର ଅନ୍ତ ହେଲାନାହିଁ ବୋଲି ଜଷ୍ଟିସ୍ ଅରୁଣ ମିଶ୍ରଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ସାମ୍ବିଧାନିକ ପୀଠ କହିଛନ୍ତି। ଏହା ପରିବର୍ତ୍ତେ କୋଟା ବଢ଼ାଇବା ଓ ସଂରକ୍ଷଣ ଭିତରେ ସଂରକ୍ଷଣ ଯୋଗାଇଦେବାକୁ ଦାବି ହୋଇଆସୁଛି। ଏହାକୁ ବଦଳାଇବା କୌଣସି ନିର୍ବାଚିତ ସରକାରଙ୍କ ପାଇଁ କଷ୍ଟକର ହୋଇପଡ଼ିଛି ବୋଲି ଖଣ୍ଡପୀଠ କହିଛନ୍ତି।
