ତାଳଚେର, ୨୯।୩(ନି.ପ୍ର.) – କରୋନାଜନିତ ସ୍ବାସ୍ଥ୍ୟ ସଙ୍କଟକୁ ଦୃଷ୍ଟିରେ ରଖି ଅନୁଗୋଳ ଜିଲା କଣିହଁାସ୍ଥିତ ଏନ୍ଟିପିସି ପକ୍ଷରୁ ଓଡ଼ିଶା ତଥା ଦେଶର ଅନ୍ୟ ରାଜ୍ୟକୁ ନିରବଚ୍ଛିନ୍ନ ବିଜୁଳି ଯୋଗାଣ ନିମନ୍ତେ ବିଭିନ୍ନ ପଦକ୍ଷେପ ନିଆଯାଉଛି। ଏଥିପାଇଁ ପ୍ଲାଣ୍ଟର ସିଜିଏମ୍ଙ୍କ ନେତୃତ୍ୱରେ ଏକ ଟାସ୍କଫୋର୍ସ ଗଠନ କରାଯାଇଛି। ସରକାରଙ୍କ ଦ୍ୱାରା ଜାରି ସ୍ବାସ୍ଥ୍ୟଗତ ମାର୍ଗଦର୍ଶିକାଗୁଡ଼ିକୁ ଯୁଦ୍ଧକାଳୀନ ଭିତିରେ ପାଳନ କରିବାକୁ ଆବଶ୍ୟକ ପଦକ୍ଷେପ ଗ୍ରହଣ କରାଯାଉଛି। ବିଶେଷକରି ସାମାଜିକ ଦୂରତ୍ୱ ବଜାୟ ରଖିବା, କାର୍ଯ୍ୟାଳୟରେ ମାନବ ସମ୍ବଳ ହ୍ରାସ, ଅତି ଆବଶ୍ୟକ ନ ଥିବା ବିଭାଗୀୟ କର୍ମଚାରୀଙ୍କୁ ଘରେ ରହି କାର୍ଯ୍ୟ କରିବାକୁ ନିର୍ଦ୍ଦେଶ ଜାରି କରାଯାଇଛି। ସେହିପରି ସ୍ଥାନୀୟ ଟାଉନଶିପ୍ ଅଞ୍ଚଳର ଦୋକାନ, ବଜାରରେ ଉପଭୋକ୍ତାଙ୍କ ମଧ୍ୟରେ ୧ ମିଟର ଦୂରତା ବଜାୟ ରଖିବା ନିମନ୍ତେ ରେଖାଙ୍କିତ ସ୍ଥାନ ମଧ୍ୟରେ ଠିଆ ହେବା ପାଇଁ ନିର୍ଦ୍ଦେଶ ଦିଆଯାଇଛି। ଏହି ସଂକ୍ରମଣରୁ ବର୍ତ୍ତିବା ପାଇଁ କ’ଣ କରାଯିବା ଉଚିତ ସେ ନେଇ କର୍ମଚାରୀ ଏବଂ ସ୍ଥାନୀୟ ବାସିନ୍ଦାଙ୍କୁ ବିଭିନ୍ନ ଉପାୟରେ ସଚେତନ କରାଯାଉଛି। ସମସ୍ତ କର୍ମଚାରୀ, ଠିକା ଶ୍ରମିକ ଏବଂ ସିଆଇଏସ୍ଏଫ୍ କର୍ମଚାରୀଙ୍କୁ ମାସ୍କ ବଣ୍ଟନ କରାଯାଇଛି। ସମସ୍ତଙ୍କୁ ବାରମ୍ବାର ହାତ ଧୋଇବା ସହ ପରିଷ୍କାର ପରିଚ୍ଛନ୍ନତା ବଜାୟ ରଖିବାକୁ ପ୍ରୋତ୍ସାହିତ କରାଯାଉଛି। ମୁଖ୍ୟ ଫାଟକରେ କର୍ମଚାରୀ ଏବଂ ଠିକା ଶ୍ରମିକଙ୍କ ଥର୍ମାଲ ସ୍କାନିଂ କରାଯାଉଛି। ଏନ୍ଟିପିସି ହସ୍ପିଟାଲରେ ଆଇସୋଲେଶନ୍ ଓ ଓପିଡି ୱାର୍ଡ ଖୋଲାଯାଇ ସମସ୍ତ ଅତ୍ୟାବଶ୍ୟକ ଚିକିତ୍ସାସେବା ଉପଲବ୍ଧ କରାଯାଉଛି ବୋଲି ଜନସମ୍ପର୍କ ଅଧିକାରୀ ଅମିତ କୁମାର ବେହେରା ସୂଚନା ଦେଇଛନ୍ତି।
