ନୂଆଦିଲ୍ଲୀ,୪-୧୦:ପୁରୀ ଶ୍ରୀଜଗନ୍ନାଥ ମନ୍ଦିର ଚତୁଃପାର୍ଶ୍ୱ ଉଚ୍ଛେଦ କାର୍ଯ୍ୟରେ ସୁପ୍ରିମକୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି। ଉଚ୍ଛେଦ ପୂର୍ବରୁ ଜଗଦ୍ଗୁରୁ ଶଙ୍କରାଚାର୍ଯ୍ୟ ଓ ବରିଷ୍ଠ ସେବାୟତମାନଙ୍କ ସହ ପରାମର୍ଶ କରିବାକୁ ସର୍ବୋଚ୍ଚ ଅଦାଲତ ଓଡ଼ିଶା ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଶ୍ରୀମନ୍ଦିର ଚତୁଃପାର୍ଶ୍ୱରେ ଥିବା ପୁରାତନ ମଠ ମନ୍ଦିର ଭଙ୍ଗାଯିବା ଠିକ୍ ନୁହେଁ ବୋଲି ଜଷ୍ଟିସ୍ ଅରୁଣ ମିଶ୍ର, ବିନୀତ ସରନ ଓ ରବୀନ୍ଦ୍ର ଭଟ୍ଟଙ୍କୁ ନେଇ ଗଠିତ ୩ ଜଣିଆ ଖଣ୍ଡପୀଠ ଅନୁଭବ କରିଛନ୍ତି। ତେଣୁ ଉଚ୍ଛେଦ ଅଭିଯାନ ପୂର୍ବରୁ କେଉଁ ଅଟ୍ଟାଳିକା ଭଙ୍ଗାଯିବ ଓ କାହାକୁ ସଂରକ୍ଷିତ ରଖାଯିବ ସେ ନେଇ ବରିଷ୍ଠ ସେବାୟତଙ୍କ ସହ ସରକାର ବୈଠକ କରିବାକୁ ଖଣ୍ଡପୀଠ କହିଛନ୍ତି।
ପୁରାତନ ମଠ ଓ ମନ୍ଦିରଗୁଡ଼ିକୁ ଧ୍ୱଂସ କରିଦିଆଯାଉଛି। ଏହି କ୍ଷୁଦ୍ର ମନ୍ଦିରଗୁଡିକ ମୁଖ୍ୟ ମନ୍ଦିର ପାଇଁ ବହୁତ ସହାୟକ ଥିଲେ। ଐତିହାସିକ ଓ ଧର୍ମୀୟ ଗୁରୁତ୍ୱ ବହନ କରୁଥିବା ମଠ ମନ୍ଦିରଗୁଡ଼ିକୁ ଏଭଳି ଭାଙ୍ଗିଦିଆଯାଇପାରିବ ନାହିଁ ବୋଲି ସର୍ବୋଚ୍ଚ ଅଦାଲତ କହିଛନ୍ତି। ଯଦି ଆପଣମାନେ ଏହି ସ୍ମାରକସ୍ଥଳୀଗୁଡ଼ିକର ସଂସ୍କୃତି ଓ ଗୁରୁତ୍ୱ ବୁଝିପାରୁନାହାନ୍ତି ତେବେ ଉଚ୍ଛେଦ ଅଭିଯାନ ପୂର୍ବରୁ ଧର୍ମୀୟ ପୂଜକମାନଙ୍କ ସହ ପରାମର୍ଶ କରନ୍ତୁ ବୋଲି ଖଣ୍ଡପୀଠ କହିଛନ୍ତି। ଏହା ଜୀବନ ଜୀବିକାର ପ୍ରଶ୍ନ। ଶହ ଶହ ବର୍ଷ ଧରି ସ୍ଥାନୀୟ ଲୋକେ ଶ୍ରୀମନ୍ଦିର ଚତୁଃପାର୍ଶରୁ ରୋଜଗାର କରିଆସୁଥିଲେ। ରାଜ୍ୟ ସରକାରଙ୍କ ନିଷ୍ପତ୍ତିରେ ଶଙ୍କରାଚାର୍ଯ୍ୟ ମଧ୍ୟ ସନ୍ତୁଷ୍ଟ ନୁହନ୍ତି ବୋଲି ଅଦାଲତ କହିଛନ୍ତି।
ରାଜ୍ୟ ସରକାରଙ୍କ ଶ୍ରୀମନ୍ଦିର ଚତୁଃପାର୍ଶ୍ୱ ଭଙ୍ଗା ଅଭିଯାନ ସମ୍ପର୍କରେ ଆମିକସ୍ କ୍ୟୁରି ରଞ୍ଜିତ୍ କୁମାର ଅଦାଲତରେ ରିପୋର୍ଟ ଦାଖଲ କରିଥିଲେ। ସରକାରଙ୍କ ଉଚ୍ଛେଦ ଅଭିଯାନରେ ଆମିକସ୍ କ୍ୟୁରି ସମ୍ପୂର୍ଣ୍ଣ ସନ୍ତୁଷ୍ଟ ନ ଥିବା ରିପୋର୍ଟରେ ଜଣାଇଛନ୍ତି। ମାମଲାର ପରବର୍ତ୍ତୀ ଶୁଣାଣି ଅକ୍ଟୋବର ୨୨ରେ ହେବ। ଶଙ୍କରାଚାର୍ଯ୍ୟ ଓ ବରିଷ୍ଠ ସେବାୟତମାନଙ୍କ ସହ ପରାମର୍ଶ କରି ଉପଯୁକ୍ତ ଉଚ୍ଛେଦ ଯୋଜନା ସହ ଆସିବାକୁ ଖଣ୍ଡପୀଠ ରାଜ୍ୟ ସରକାରଙ୍କୁ କହିଛନ୍ତି। ନଚେତ୍ ଅଦାଲତ ଉଚ୍ଛେଦ ଅଭିଯାନର ଅନୁଧ୍ୟାନ ଲାଗି ଉଚ୍ଚ କ୍ଷମତାସମ୍ପନ୍ନ କମିଟି ସହ ପରାମର୍ଶ କରିବେ ବୋଲି ଆବେଦନକାରୀଙ୍କ ଓକିଲ ସୂଚନା ଦେଇଛନ୍ତି। ପୁରୀରେ ଥିବା ଗୁରୁଦ୍ୱାର ଉଚ୍ଛେଦ ବନ୍ଦ ଲାଗି ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବା ପାଇଁ ଆବେଦନକାରୀ ସର୍ବୋଚ୍ଚ ଅଦାଲତଙ୍କ ଦ୍ୱାରସ୍ଥ ହୋଇଥିଲେ। ଖଣ୍ଡପୀଠ ଏଥିପାଇଁ କୌଣସି ଲିଖିତ ନିର୍ଦ୍ଦେଶନାମା ଦେଇନାହାନ୍ତି। ତେବେ ଉକ୍ତ ଧାର୍ମିକ ପୀଠକୁ ଭଙ୍ଗାଯିବ ନାହିଁ ବୋଲି ଅଦାଲତ ଆବେଦନକାରୀଙ୍କୁ ପ୍ରତିଶ୍ରୁତି ଦେଇଛନ୍ତି।
