ନୂଆଦିଲ୍ଲୀ,୩୧।୫: ବର୍ତ୍ତମାନ ଦେଶର ଅର୍ଥ ବ୍ୟବସ୍ଥା ସାମ୍ନାରେ ବିଭିନ୍ନ ଚ୍ୟାଲେଞ୍ଜ ରହିଛି। ଲକ୍ଡାଉନ ଶେଷ ହେବା ପରେ ଅର୍ଥ ବ୍ୟବସ୍ଥା ଧୀରେ ଧୀରେ ପୁଣି ଥରେ ଟ୍ରାକ୍କୁ ଫେରିବା ଲାଗି ସମୟ ଲାଗିବ। ବର୍ତ୍ତମାନ ପ୍ରବାସୀ ଶ୍ରମିକଙ୍କ ସମସ୍ୟା ଗମ୍ଭୀର ସ୍ଥିତିରେ ରହିଛି। ବର୍ତ୍ତମାନ ସୁଦ୍ଧା ୫୦ ଲକ୍ଷରୁ ଉର୍ଦ୍ଧ୍ୱ ପ୍ରବାସୀ ଘରେ ପହଞ୍ଚିଛନ୍ତି। ଶ୍ରମିକମାନେ କାର୍ଯ୍ୟସ୍ଥଳକୁ ନ ଫେରିଲେ ଶିଳ୍ପଗୁଡିକର ସମସ୍ୟା ଲାଗି ରହିବ। ଏହାକୁ ନେଇ ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର ବଡ ବୟାନ ଦେଇଛନ୍ତି। ଶ୍ରମିକଙ୍କୁ ପୁଣି ଥରେ କାର୍ଯ୍ୟକ୍ଷେତ୍ରକୁ ଫେରାଇ ଆଣିବା ଲାଗି ସରକାର ସ୍ବତନ୍ତ୍ର ଟ୍ରେନ୍ ବ୍ୟବସ୍ଥା କରିବେ। ଶ୍ରମିକଙ୍କ ସହ ସମ୍ପର୍କରେ ରହିବା ନେଇ ସେ ଶିଳ୍ପଜଗତକୁ ପରାମର୍ଶ ଦେଇଛନ୍ତି। ଲକ୍ଡାଉନରୁ ଆଶ୍ୱସ୍ତି ମିଳିଲେ ଲୋକମାନଙ୍କୁ ପୁଣି ଥରେ ଶ୍ରମ କ୍ଷେତ୍ରକୁ ଫେରାଇ ଆଣିବା ଲାଗି ବ୍ୟବସ୍ଥା ଉପରେ ସେ ମତ ରଖିଛନ୍ତି। ଯଦି ଶ୍ରମିକମାନେ କାର୍ଯ୍ୟକ୍ଷେତ୍ରକୁ ନ ଫେରନ୍ତି ତେବେ ଅର୍ଥ ବ୍ୟବସ୍ଥାର ଗାଡି ଟ୍ରାକ୍କୁ ଫେରିବା କଷ୍ଟକର ହେବ। ୨୫ ମାର୍ଚ୍ଚରୁ ହୋଇଥିବା ଲକ୍ଡାଉନ ଯୋଗୁ ଶ୍ରମିକମାନେ ବିଭିନ୍ନ ସମସ୍ୟା ସାମ୍ନା କରୁଛନ୍ତି। ମେ ପହିଲାରୁ ଶ୍ରମିକମାନେ ଘରକୁ ଫେରିବା ଲାଗି ସରକାର ସ୍ବତନ୍ତ୍ର ଟ୍ରେନ୍ ବ୍ୟବସ୍ଥା କରିଛନ୍ତି। ସେହିଭଳି ବର୍ତ୍ତମାନ ହୋଇଥିବା ଶ୍ରମିକ ଟ୍ରେନ୍ ନେଇ ରାଜ୍ୟଗୁଡିକ ଯୋଜନା ଏବଂ ସମନ୍ବୟ ରକ୍ଷା କରିବାକୁ ରେଳ ମନ୍ତ୍ରଣାଳୟ ନିବେଦନ କରିଛି। ଫସି ରହିଥିବା ଲୋକ କିଭଳି ଘରକୁ ଫେରିପାରିବେ ତାକୁ ଧ୍ୟାନରେ ରଖି ବ୍ୟବସ୍ଥା ହାତକୁ ନେବାକୁ କୁହାଯାଇଛି।
