ବଡ଼ବିଲ, ୩୦।୧୨(ସ୍ବ.ପ୍ର.)- କେନ୍ଦୁଝର ଜିଲା ବଡ଼ବିଲରେ ତାପମାତ୍ରା ହ୍ରାସ ପାଇ ପାରଦ ସର୍ବନିମ୍ନ ସ୍ତର ୪ ଡିଗ୍ରୀକୁ ଖସିଆସିଛି। ପୌରାଞ୍ଚଳ ଉପକଣ୍ଠ ତଥା ଆଖପାଖ ଅଞ୍ଚଳରେ ଥିବା ବିଭିନ୍ନ ସ୍ଥାନ ଯଥା, ବେଲକୁଣ୍ଡି ରାସ୍ତା, ଡ୍ୟାମ୍ ରୋଡ୍, ଠାକୁରାଣୀ, ସୟାବାଲି, ହାୟାରବୁରୁ, ବଲାଣୀ, କିରିବୁରୁ ଓ ନାଲଦା ଆଦି ଅଞ୍ଚଳର ଖୋଲାସ୍ଥାନରେ ଥିବା ଘାସପତ୍ର ଓ ବିଭିନ୍ନ ଗାଡ଼ି ଉପରେ ବରଫର ଆସ୍ତରଣ ଜମିଥିବା ପରିଲକ୍ଷିତ ହୋଇଛି। ଶନିବାର ସକାଳେ ପାରଦ ୩ ଡିଗ୍ରୀ ତଳକୁ ଖସି ଆସିଥିବାବେଳେ ରବିବାର ସକାଳେ ତାପମାତ୍ରା ବୃଦ୍ଧିପାଇ ପାରଦ ୪ଡିଗ୍ରୀକୁ ବଢିଛି। ତେବେ ସକାଳ ୧୦ଟା ପର୍ଯ୍ୟନ୍ତ ଜନଜୀବନ ସ୍ବାଭାବିକ ହୋଇପାରୁନାହିଁ। ଲୋକେ ସ୍ଥାନେସ୍ଥାନେ ନିଆଁ ପୁଇଁ ହେଉଥିବାବେଳେ ଚା’ ଦୋକାନଗୁଡିକରେ ବେଶ୍ ଭିଡ଼ ଜମୁଛି। ବାଇକ୍ ଚାଳକଙ୍କ ଯାତାୟାତ ଏକପ୍ରକାର ଠପ୍ ହୋଇଯାଇଛି। କାଁ ଭାଁ ବାଇକ୍ ଚଳାଚଳ କରୁଥିବା ଦେଖାଯାଉଛି। ସକାଳର ଖରାକୁ ଆଶ୍ରା କରିଛନ୍ତି। ଜନସାଧାରଣଙ୍କ ସହ ଜୀବଜନ୍ତୁ, ଲୋକେ ଦିନରାତି ଶୀତବସ୍ତ୍ର ପରିଧାନ କରୁଥିଲେ ହେଁ ଶୀତ ଛାଡ଼ିବାର ନାଁ ଧରୁନାହିଁ। ଘର ଭିତରେ ମଧ୍ୟ ଶୀତଦାଉରୁ ନିସ୍ତାର ନାହିଁ। ତେବେ ଦୀର୍ଘ ୧୫ ବର୍ଷ ପରେ ବଡ଼ବିଲ ଅଞ୍ଚଳରେ ଏଭଳି ଶୀତ ଅନୁଭୂତ ହୋଇଥିଲେ ହେଁ ଶୀତର ପ୍ରକୋପ ଆଗଭଳି ନ ଥିବା ପୁରୁଖା ଲୋକେ କହିଛନ୍ତି। ତେବେ ପାଣିପାଗ ବିଭାଗ ତରଫରୁ ଅଞ୍ଚଳରେ ତାପମାତ୍ରା ମାପିବାର କୌଣସି ସୁବିିଧା ନ ଥିବାରୁ ଘରୋଇ ମାପକ ଯନ୍ତ୍ରରୁ ବଡ଼ବିଲରେ ତାପମାତ୍ରା ୪ ଡିଗ୍ରୀ ରହିଥିବା ଜଣାପଡ଼ିଛି।
